කතරගමදී දැරියක් අතුරුදහන් වී දින කිහිපයකින් නැවත හමු වේ
සෙනග ගැවසෙන ස්ථාන වල හෝ අමුත්තන් වැඩි ස්ථාන වල දරුවා අතරමං වීම හෝ මග හැරීම වැලැක්විය හැකි ක්‍රම කිහිපයක්.
පසුගිය 21 වනදා නින්දේ සිටියදී අතුරුදහන් වූ සින්ගිත්තියකගේ පුවතක් කතරගම තිස්සමහාරාමයෙන් වාර්තා වන්නේ හිරු ප්‍රවෘත්තියකට අනුවයි. තුන් හැවිරිදි නෙතුමි අනුෂ්කා ඇතුළු ඇගේ සිව් හැවිරිදි සොහොයුරාත්, මවත් කතරගම සියඹලා ගසක් යට නින්දට ගියේ ඔවුන් ඒ අසලම මල් වෙළඳම් කරන බැවිනි. ඉතාමත්ම දිළිඳු තත්වයේ සිටින මෙම මව හා දරු දෙදෙනා සල්මල් විකුණමින් ජිවත් වන්නේ එම පදික වේදිකාව මතයි. මෙම මවට අනුව දරුවන්ගේ පියා සිරගතව සිටින අතර ඔහු බෙරා ගැනීමට සල් මල් විකුණන බව පවසනවා.
කෙසේ නමුත් ඉකුත් 24 වනදා උදෑසන හිරු ප්‍රවෘත්ති වලට අනුව මෙම දැරිය සිවිල් ආරක්ෂක කඳවුර මගින් පවත්වනු ලබන වෙළඳසැලක් අසල රෙද්දකින් වසා දමා ගොස් තිබියදී සොයා ගෙන තිබෙනවා. වාසනාවකට මෙන්රි දැරියට කිසිඳු අනතුරක් සිදු වී නැහැ.
මේ පුවතත් සමඟ සෙනගක් අතර සිටින අවස්ථා වල කුඩා දරුවකුගේ ආරක්ෂාව ගැන සැලකිලිමත් වන ආකාරය ගැන ලියන්නට සිතුවේ දරුමල්ලන් හදිසියේ අතුරුදහන් වීම, විශේෂයෙන්ම සෙනග ගැවසෙන තැන් වල දෙමාපියන් බොහෝ දෙනෙක් මුහුණ දෙන බොහෝ සුලභ අත් දැකීමක් වන නිසයි.
සෙනග වැඩි තැන් වල, නිවසේ අමුත්තන් රැසක් සිටින අවස්ථාවන් වලදී ආදිය අප අවධානය ලෙහෙසියෙන්ම බිඳෙනවා. පොඩ්ඩා පහසුවෙන් මග ඇරෙන්න යන්නේ ඇසි පිය ගැටෙන කාලය පමණයි. ඉතින් මෙවන් අවස්ථා වල දරුවාගේ ආරක්ෂාව සැලකිය හැකි ක්‍රම කිහිපයක් ගැන සලකා බලමු.
1. නිවසේ සාදයක් හෝ අමුත්තන් පිරිසක් ආ අවස්ථාවක දරුවාගේ රැකවරණය
මගේ දරුවාට යන්තම් මාස අටක් පිරුණු කාලෙ මට මතකයි අමුත්තන් කිහිප දෙනෙක් ගෙදර ඇවිත් බබා අප ලඟින්ම එහෙට මෙහෙට බද ගාමින් සිටිය. අප සතුටු සාමිචියේ ඉද්දි එක් වරම පොල් ගෙඩියක් වැටෙන්නා සේ ශබ්ධයක් ඇවිත් බලන විට බබා හිට ගන්නට තැත් කිරීමේදී පිටුපසට වැටී තිබෙනවා. මට එදා අමතක නොවන දවසක්. අදටත් දුකයි මතක් වෙනකොට. ඉතින් ඇහැක් වාගේ ලඟින් ඉඳන් අවධානය බිඳක් එහෙ මෙහෙ වූ විට මෙවන් අනතුරු සිදු වන්නට පුළුවන්.
මීට විසඳුම නම් කල් තියාම නිවසට කවුරු හෝ එන්නේ නම් දරුවා පසු පසින්ම සිටීමේ වගකීම නිවසේ කෙනෙක්ට භාර දිය යුතුයි. හැමෝම දරුවා පසු පස කවුරු හෝ ඇතැයි උපකල්පනය කරනවාට වඩා මේ ක්‍රමය ඉතා යෝග්‍යයි.
2. සංචාරයක යෙදෙන විට දරුවාගේ ආරක්ෂාව ගැන සැලකිලිමත් වන්නේ කෙසේද?
මගේ දරුවා කුඩා කල ඇයගේ ගෙලේ පැළඳවූ සුදු යකඩ මාලයක් තිබුනා. එහි පුංච් ටැග් එකක අපගේ දුරකථන නොම්මරය පලඳවා තිබුනා. මෙය පාවිච්චියට ගැනීමට සිදු නුවත් සංචාරය කරන විටෙක හදිසි අවස්ථාවකදී ප්‍රයෝජනවත් විය හැකි විකල්පයක්. බටහිර රට වල දරුවාගේ අතේ නොම්මරය ලියා තැබීම වැනි දේවල් කළත් එතරම් විවෘත ලෙස පුද්ගලික තොරතුරු සඳහන් කිරීම හානිකර වන්නටද පුළුවන්.
මෙයට අමතරව දරුවාට ඇන්දවිය හැකි ආරක්ෂක පටියක් මා පාවිච්චි කර තිබෙනවා. මෙය පාවිච්චිය හැමෝම අනුමත නොකරන අතර ඒ ගැන විවිධ මත දරනවා. නමුත් අතින් ඇදන් යනවාට වඩා මෙම පටිය දරුවාගේ චලනයටත් විශාල පරාසයක් දෙන අතර මවට හෝ පියාටත් පරිහරණය කිරීම පහසු වනවා.
3. විනෝද චාරිකාවක හෝ සංගීත සංදර්ශන වැනි ස්ථාන වල දරුවාගේ ආරක්ෂාව සැලකිය හැකි ක්‍රම
මෙවන් අවස්ථා සඳහාද ඉහත කී පරිදි වැඩිහිටි භාරකරුගේ දුරකථන අංකය ගෙල වටා පළඳවන්නට පුළුවන්. මිට අමතරව කුඩා කල පටන්ම හදිසි අවස්ථාවක දෙමාපියන් මග හැරුණහොත් එහෙ මෙහෙ සක්මන් නොකර, කලබල නොවී වැඩිහිටි කාන්තාවක් වෙත හෝ ආරක්ෂක බලධාරියෙක් වෙතට යොමු වන්නට දරුවා හොඳින් දැනුවත් කර තැබිය යුතුයි.
4. සාප්පු සංකිර්නයකදී දරුවා මග නොහැරෙන්නට කටයුතු කිරීම
බටහිර රට වල නම් සාප්පු සංකීර්ණ වල අතරමං වන සදරුවන් සංක්‍යාව එමටයි. ලංකාවේ තවම එපමණක් සාප්පු සංකීරණ නැති වුවද පුජනීය ස්ථාන වල, වෙළඳපළවල් වල දරුවන් බොහෝ සේ අතරමං වනවා.
ඉහත කී ක්‍රම මෙහිදීත් අනුගමනය කල හැකි අතර මීට අමතරව දරුවා මදක් තේරෙන වයසක නම් මවගේ හෝ පියාගේ දුරකථන අංකය දරුවාට කට පාඩම් කර දිය හැකියි. හදිසියකදී වැඩිහිටි කාන්තාවක් හෝ ආරක්ෂක නිලධාරියෙකු වෙත හෝ යොමු වී දුරකථන ඇමතුමක් ලබාගෙන මව හෝ පියා අමතන්නට දරුවා දැනුවත් කල යුතුයි.
මෙකී ක්‍රම ඔබේ දරුවාගේ ආරක්ෂාවත් උපකාර වේ යැයි විශ්වාස කරන අතර, මගේ දරුවා කුඩා කල (අවුරුදු හතරක් පමණ) මා හැමදාටම ප්‍රයෝජනවත් වූ පුංචි ප්‍රයෝගයක් මගේ දුවට කළා. හිතුමතේ සාප්පු සංකීර්ණය පුරා දුවන පුරුද්දක් ඇයට තිබුණු අතර අප ළඟම රැඳෙන්නට යැයි කෙතරම් පහදා දුන්නද එය එතරම් සාර්ථක වුයේ නැහැ.
දිනක් ඇය මා අතහැර ගිය විටෙක මා උවමනාවෙන්ම හැංගි හැංගි ඇය පසු පසින් ගොස් මුවා වී සිටියා. වටපිට බලමින් හැකි තරම් අප සෙවූ ඈ මොහොතකින් බිය වී හඬන්නට ගත්තා. මාද ඇය සැබවින්ම අතරමං වී සම්බ වූවා සේ හැසිරුනා. ඇය වැළඳගෙන අප සමගම සිටිය යුත්තේ ඇයි දැයි පහදා දුන්නා. එදින පටන් ඇය මග නොහැරී ඉන්නට අදිටන් කර ගත්තා. මෙය සැම විටම සාර්ථක විය නොහැකි වුවත් උත්සාහ කර බැලුවාට හානියක් නෑ.