ඉතින් ඔබට මතකද ඔබේ පළමු වන මංගල සංවත්සරය සැමරූ දිනය. එදා දවස මොන වගේද ඇහුවොත් ඔබට දැනෙන හැඟීම් ඔබට මතකද? එතකොට දෙවන මංගල සංවත්සරය, තුන් වන සංවත්සරය, ඔබට මතකද? බොහෝ සහකරුවන් හට කල්යත්ම මංගල සංවත්සර සැමරීම කිසිදු විශේෂත්වයක් නොමැති දෙයක් වනවා. කල් යත්ම එය තවත් එක් දවසකට පමණක් සීමා වනවා.
නමුත් ඔබ සිහි තබාගත යුත්තක් නම් ඔබගේ මංගල සංවත්සර දිනය අති සුවිශේෂී දිනයක් බවයි. මෙම දිනය විශේෂ ආකාරයකින් සැමරිය යුතු දිනයක් වීමට හේතු කාරනා කිහිපයක් තමා මේ;
1. මේ දවස ඔබ දෙදෙනාට සුවිශේෂී වූ ඔබ දෙදෙනාටම ආවේණික වූ විශේෂිත විදියකින් සමරන්නට පුළුවන් දවසක්.
අධිවේගයෙන් ගමන් කරන ජීවිතයේ මඳකට නැවතී පසුපස හැරී ඔබ දෙදෙනා ආ ගමන් මග දෙස මොහොතකට නැවතී බලා සතුටු වන්නට මෙවැනි දවසක් විශේෂයෙන්ම උපකාර වනවා. එපමණක් නොවේ ඔබේ මංගල දිනයේදී සිදු වූ විශේෂ සිදුවීම්, නැටුම් ගැයුම්, ඔබේ මිතුරන්ගේ උසුළු විසුළුවලට ලක්වෙමින් විනෝද වූ හැටි සිහිකර ගන්නට හැකිවන දවසක්.
ඉතින් ඔබට අභියෝගයක් දෙනවා හැකිනම් බාරගන්න. ඔබ දෙපලට පුලුවන්නම් මොහොතකට නැවතී, ඔබට ඒ දවසේ දැනුණු හැඟීම්, දැනුණු විශේෂ ආදරය භක්තිය වැනි ඔබ දෙදෙනා විවාහ දිවියට පා තැබූ ඒ සුවිශේෂී දිනයේ ඇති වූ සියලු හැඟීම් වල මතකයන් අවදි කොට එය මුළුමනින්ම අත් විඳින්නට මොහොතක් ගත කරන්නට ඔබට පුළුවන්ද? මේ හැම දේටම වඩා, ඒ මුල් දිනයේ දී ඔබේ සහකරු ඔබ දුටු විට ඇතිවුණ හැඟීම, ඇතිවුණු ආදරය, ඇතිවුණු උවමනාව ඔබට මෙනෙහි කරන්නට හැකිද?
ඉතින් ඔබ දෙදෙනා අත්වැල් බැඳගෙන ජීවිතේ සොඳුරු කාල වලදීත්, දුෂ්කර කාලයන්හිදීත් එක්ව නොසැලී ආ ගමන් මග දෙස ආදරයෙන් නැවතී බලා මෙනෙහි කරන්නට යෙදෙන සුවිශේෂී දවසක් තමා ඔබගේ මංගල සංවත්සර දිනය. අතීතයට දිව ගොස් ඔබකල කී දේ ඇතුළු දෙදෙනා එකට එකතුව බාධක ජය ගනිමින් ආ ගමන් මඟ ගැන මෙනෙහි කිරීම තුළින් ඔබේ හදවතේ ආදරය නැවුම් කරන අතර ඉන් ඔබට ලැබෙන ආත්මික පෝෂණය මෙපමණයි කියන්නට බැහැ.
2. ඔබ දෙදෙනා අතර සබදතාවය පිරික්සා බලන දවසක්
වසරක් පාසා ඔබගේ විවාහය විවාහය තුළ ඔබ දෙදෙනාගේ සබඳතාවය පිරික්සා බැලීමට ඔහු පුරුද්දක් කරගත යුතුයි. ඔබ වෙනස් කලයුතු යමක් වේද? ඔබ වෙනස් කළ යුතු ඔබේ චරියාවක් තිබේද? ඔබට මීටත් වඩා හොඳින් කළ හැකි යමක් වේ දැයි කියා ඔබගේ සහකරුගේ විමසා බලන්න.
එමෙන්ම විවාහක යුවලක් ලෙස ඔබ දෙදෙනාට එක් වී ඉදිරි අනාගතයට යම් යම් ඉලක්ක ඇති කරගන්නටත්, විවිධ තීරණ සැලසුම් කරගැනීමටත් හැකියාව තිබෙනවා. ඔබට තියෙනවට වඩා විශාල නිවසට යන්නට ආශාවක් ඇති වෙන්නට පුළුවන්, තව දරුමල්ලන් හදන්නට අදහසක් ඇති වන්නට පුළුවන්, විදේශ සංචාරයක යෙදෙන්නට ආසාවක් වෙන්නට පුළුවන්. ඉතින් මෙවැනි කටයුතු වලට සාර්ථක ඉලක්ක ඇතිකර ගැනීමේ හොඳ අවස්ථාවක් තමා ඔබේ මංගල සංවත්සර දිනය.
3. විවාහක යුවලක් ලෙස ඔබ දෙදෙනාගේ සබඳතාවය සමරන දිනයයි
සංවත්සරය අනිවාර්යයෙන්ම සැමරිය යුතු දිනයක් වෙනවා. මක් නිසාද යත් ඔබ තවත් වසරක් සාර්ථක ලෙස එකට ගෙවා සොඳුරු මතකයන් සනිටුහන් කර තිබෙන සුන්දර දවසක්. එවන් සුන්දර මතක සටහන් සැමරිය යුතු නොවේද?
ඔබේ සහකරුගේ අගය ඔහුට කියා පාන්නට ඔහු හෝ ඇය ඔබට කොයිතරම් වටිනවාද යන්න කියාපාන්නට මීට වඩා සුදුසු දිනයක් තවත් නැහැ.
පුංචි ත්‍යාගයකින් හෝ පුංචි කාඩ් පතකින් ඔහු හෝ ඇය කෙතරම් සුවිශේෂීදැයි පෙන්වන්නට ඔබට පුලුවන්. ඉතින් විවාහයේ තවත් වසරක් නැතහොත් තවත් කඩඉමක් පහසු කරන මේ වෙලාවේ ඔබගේ ආදරය විශේෂ ආකාරයෙන් සමරන්න. ඔබේ සහකරු හෝ සහකාරිය සමඟ කල් වේලා ගත කර ඔබගේ පවුලේ අයත් එක් කොට විශේෂ ආකාරයකින් මේ දවස ගත කරන්නට පුළුවන්.
TheAsianparent හි අනුමැතිය ඇතිව පරිවර්තනය කර ප්‍රකාශිතයි.
පරිවර්තනය: නිලුෆ පෙරේරා
