ගංවතුර බැස ගිය පසු නැගී එන ආපදා වලින් දරුවන් බේරා ගන්නේ කොහොමද?

හැමවිටම ගංවතුරකින් පසු පරිසරය ඉතා අපවිත්‍ර වන නිසා බෝවන ලෙඩ රෝග වලට ඉන්පසුව අපිට මුහුණ දීමට සිදුවන එක් දැවැන්ත ප්‍රශ්නයක්. ඒනිසා ගංවතුරට පෙරත් පසුත් එක ලෙස ඒ ගැන සිටීම වැදගත්.

ගංවතුරට පෙරත් පසුවත් අපි දැන සිටිය යුතු කාරණා බොහෝමයක් තිබෙනවා. අද වන විට ගංවතුරින් ජීවිත රැසක් රටට අහිමි වුණා. දරුවන්ට දෙමාපියන් දෙමාපියන්ට දරුවන් අහිමි වී ඛේදවාචකයක නටඹුන් පමණක් ඉතිරි වුණා. නමුත් මේ ව්‍යවසනය අපි අද පමණක් මුහුණ දුන් කාරණයක් නොවෙයි.

හැම වසරකම ගංවතුරින් මිනිස් ජීවිත අහිමි වුනත් එය සති කිහිපයක් යද්දී අපටම අමතක වී යාම ඉතාම ඛේදජනකයි.

අවධානමට පෙර අපට සූදානමක් තිබුණා නම් මේ විනාශය මෙතරම් බරපතල නොවන්නට ඉඩ තිබුණා. අධික වැසි නැතුවත් සමහර තැන් ජලයෙන් යටවුණේ ඒකයි.

ගංවතුරට පෙර

නිසි ප්‍රමිතියකින් ගොඩනැගිලි සෑදීම හා කසල බැහැර කිරීම

අද වන විටත් නිවාස හා ගොඩනැගිලි සැදීමේදී ඇති නිර්දේශ නීති කඩ කරමින් අපිම අපේ ගෙවල් සාදාගන්නවා. බොහෝ විට අවධානම් කලාප වල ජීවත් වන අයට මෙය ඉතාම ගැඹුරු ප්‍රශ්නයක්. නමුත් කිසි විටකත් ප්‍රමිතියට පටහැනි ලෙස නිවාස ඉදි කිරීමට තම තමන් පෙළඹෙන්නේ නැත්නම් මේ ගැටළු අවම කරගන්න පුළුවන්.

ජලය බැස යන ක්‍රම හා නිසි කසල බැහැර කිරීමේ ක්‍රමයන් පවුල තුළින්ම ආරම්භ කිරීමට අපේ දරුවන් හා අපිත් උනන්දු වීම හා උනන්දු කිරීම කළයුතු වෙනවා.මේ ගැටළු නිසා අද වන විට ජලය බැසයාමේ ක්‍රම නැතිවීමෙන් වර්ෂාව නැතත් පාර ජලයෙන් යට වෙලා.   

ගංවතුර කියන්නේ නැරඹීමට යායුතු දෙයක්ද?

ගංවතුරෙන් විපතට පත්වූවන්ට ආධාර කරනවා හැරෙන්න අද බොහෝ දෙනා ගංවතුර නැරඹීමටත් යනවා. බොහෝ විට කුඩා දරුවන් රැගෙන තරුණ තරුණියන් පවා විනෝද ජනක ක්‍රීඩාවන් කරමින් සිටිනවා. නමුත් එහි අනතුරු දායක බව ගැන අවබෝධ කරගැනීමත් අනෙක් අතට මේ නිසා          

  • ජීවිත හානි පවා ඇතිවීමට අවධානම වැඩි බව අපි අවබෝධයක් කර ගැනීම වැදගත්.
  • වතුර නිසා පාරේ ඇති ගැඹුරු කාණු ආදියට වැටීමට ඉඩ තිබීම.
  • වතුර සමග විෂඝෝර සර්පයන් ජලයේ නොපෙනී සිටීම.
  • ඉතා අපිරිසිදු තැන් වල ජලය මුසුවීම නිසා ලෙඩ රෝග වලට ලක්වීමට ඉඩ තිබීම.

වැනි කාරණා ගැන සිතීම වැදගත්.

ඔබ අවධානම් කලාපයක ජීවත් වන්නේ නම්

මීට අමතරව ගංවතුරට පෙර විශේෂයෙන් අවධානම් කලාප වල ඔබ ජීවත් වෙනවා නම් ඔබට ආරක්‍ෂිත පිළිවෙත් කාලගුණය ව්‍යාප්ත වන ආකාරය ගැන අවබෝධයෙන් ලබාගන්න පුළුවන්.

  • වටිනා ලිපි ලේඛන ලැමිනේට් කර ඉක්මණින් තමන් අතට ගත හැකි ස්ථාන වල තැබීම.
  • ගෘහ භාණ්ඩ හා විදුලි උපකරණ ආරක්‍ෂිත ස්ථාන වලට රැගෙන ගොස් තැබීම.
  • ඇඳුම් පැළඳුම් ආදිය හිතවතුන් සමග කතා කර කෙටි කාලයකට ගබඩා කිරීමට අවස්ථාවක් ඉල්ලීම.
  • දරුවන්ට අත්‍යවශ්‍ය දේවල් පහසුවෙන් රැගෙන යා හැකි ගමන් මල්ලක සුදානම් කර තැබීම.
  • අත්‍යවශ්‍ය සනීපාරක්ෂක හා බෙහෙත් සූදානම් කර තබා ගැනීම.
  • ආපදා සහන සේවාවන්හි අංක පිළිබඳ දැනුවත්ව සටහන් කර තබා ගැනීම.
  • පොලීසිය, ගුවන් හමුදාව වැනි සහන සේවා සපයන ආයතන ගැන දැනුවත්ව සිටීම.
  • ජලය ගැලීමකදී කළ හැකි ප්‍රථමාධාර ගැන දැනුවත්ව සිටීම.
  • තමන්ට දින කිහිපයකට හෝ නවාතැන් ගත හැකි නෑදෑ හෝ හිත මිතුරු පවුලක නිවාස දැනුවත් කර තැබීම.

ගංවතුරට පසු

ගංවතුර නිසා ඔබ පීඩාවට පත් වුනත් නැතත් මේ අවස්ථාවේ සෞක්‍ය ගැන සිතම වැදගත්.

  • විශේෂයෙන් උණුකර නිවාගත් ජලය පානය කිරීම.
  • දරුවන්ට නිතර පාවහන් පැළඳ සිටීමට උපදෙස් දීම.
  • පවුලේ හැමදෙනාටම කොත්තමල්ලි වැනි ඉපැරණි එහෙත් ඵලදායි බීම වැඩිපුර පානය කිරීම.
  • එළවළු පලා වර්ග හැකි තරම් ගස් උඩ හැදෙන දේවල් තෝරා ගැනීම.
  • පලා වර්ග කාලයක් යනතුරු විශ්වාසවන්ත තැනකින් හැර නොදන්නා වෙළඳුන්ගෙන් මිලදී නොගැනීම.
  • විවිධ සර්පයන් වැනි සතුන් වතුර සමග එන නිසා නිතර අවධානයෙන් සිටීම.
  • දරුවන්ට ගංවතුර සමග ක්‍රීඩා කිරීමට ඉඩ නොහැරීම.
  • සීග්‍රයෙන් බෝවෙන රෝග පැතිර යන නිසා දරුවන්ට ඒ ගැන කියා දීම.
  • නිතර දෑත් පිරිස්දුව තබා ගැනීම.
  • හැකිතරම් නිවසේ පිළියෙළ කරන ආහාර ලබාගැනීම.
  • ඔබ ගර්භණි මවක් නම් හෝ බිළිඳුන් නිවසක සිටී නම් ගංවතුරට යටවී ඇති මහාමාර්ග හා ඔබට ඉතා කඩිනමින් ළඟා විය හැකි රෝහලක් ගැන දැනුවත්ව සිටීම.
  • නිතර පාවිච්චි කරන ඖෂධ වැනි දේවල් අතිරික්තයක් මිලදී ගෙන තබා ගැනීම.
  • දරුවන්ට අත්‍යවශ්‍ය බෙහෙත් හා කිරිපිටි හා වියළි ආහාර නිවසේ තබා ගැනීම.

හැමවිටම ගංවතුරකින් පසු පරිසරය ඉතා අපවිත්‍ර වන නිසා බෝවන ලෙඩ රෝග වලට ඉන්පසුව අපිට මුහුණ දීමට සිදුවන එක් දැවැන්ත ප්‍රශ්නයක්. ඒනිසා ගංවතුරට පෙරත් පසුත් එක ලෙස ඒ ගැන සිටීම වැදගත් බව මතක් කර දෙන්නට theAsianparent Sri Lanka මේ ලිපිය සකස් කළා.

(Image: Daily Mail)