කිසිඳු රෝග පිඩාවක් නැතිව මනා සෞක්‍යයකින් සිට ක්‍රීඩාවේ යෙදෙමින් සිටියදී දරුවෙක් හදිසියේ ඇද වැටි මිය යාම දෙමාපියන් කෙසේ නම් දරන්නද? මේ දුක්මුසු පුවත වාර්තා වන්නේ මහනුවරින්. පසුගිය පළමුවනදා උදෑසන 11.00ට පමණ රග්බි ක්‍රීඩා පුහුණුව සඳහා මහනුවර ත්‍රිත්ව විදුහලේ සිට පල්ලේකැලේ පිහිටි ත්‍රිත්ව විද්‍යාලීය ක්‍රීඩාංගණය දක්වා ගොස් ඇඟ උණුසුම් කිරීමේ ව්‍යායාම සඳහා ප්‍රධාන මාර්ගයේ දුවමින් සිටියදී පල්ලේකැලේ ප්‍රදේශයේදී 17 හැවිරිදි භාතිය ඒකනායක සිසුවා හදිසියේ සිහිසුන්ව ඇද වැටී ඇත. ඉන්පසු ත්‍රිරෝද රථයකින් මහනුවර රෝහලට ඔහු ඇතුළත් කර තිබුණු අතර ඊයේ නොහොත් ඔක්තෝබර් 2වනදා ඔහු මියගොස් ඇති බව පොලීසිය පැවසුවා.
මෙසේ මියගොස් ඇත්තේ මහනුවර බෝවලවත්ත ඔගස්ටාවත්ත ප්‍රදේශයේ පදිංචි භාතිය ඒකනායක නැමැති දාහත් හැවිරිදි සිසුවායි. ඔහු අපොස උසස් පෙළ පන්තියේ අධ්‍යාපනය ලබමින් සිට ඇත.
පාසල් රග්බි වාරය නිමවී සියලු රග්බි ක්‍රීඩකයන් මාස දෙකකට වැඩි කාලයක්‌ විවේකීව සිට ඇති අතර ලබන (2018) පෙබරවාරියේ යළි රග්බි වාරය ආරම්භ වන බැවින් පෙරේදා (01 වැනිදා) පෙරවරුවේ නැවත පුහුණුවීම් ආරම්භ කර ඇත. මහනුවර සිට පල්ලේකැලේ රග්බි ක්‍රීඩාංගණය දක්වා මහා මාර්ගයේ දුවමින් ඇඟ උණුසුම් කිරීමේ ව්‍යායාමයන්හි නියුතුව සිටි තිස්‌දෙනකුට අධික ක්‍රීඩකයන් පිරිස අතර සිටි මෙම ක්‍රීඩකයා තැන්නේකුඹුර ප්‍රදේශයේදී සිහිසුන්ව ඇදවැටී ඇතැයි පොලිස්‌ පරීක්‍ෂණවලදී අනාවරණය වී තිබේ.
මියගිය ශිෂ්‍යයාගේ දේහය පිළිබඳ මහෙස්‌ත්‍රාත් පරීක්ෂණය අද (03 දා) පැවැත්වීමට නියමිත අතර පල්ලේකැලේ පොලිසිය වැඩිදුර පරීක්ෂණ පවත්වයි.
ත්‍රිත්ව විද්‍යාලයේ විදුහල්පතිවරයා කියා සිටියේ තම පාසලේ දරුවකු මෙවැනි හදිසි මරණයකට ලක්‌වීම පිළිබඳව තමා දැඩි කම්පනයට පත් වී ඇති බවයි. මෙම සිද්ධිය සම්බන්ධයෙන් ගුරුවරුන් සහ පුහුණුකරුවන් ඇතුළු පාසල් කමිටුවක්‌ හරහා පුළුල් පරීක්‍ෂණයක්‌ සිදු කළ බවද, එම පරීක්ෂණ වාර්තාව පාසල් මට්‌ටමෙන් දැනටමත් අවසන් කර ඇති බවද විදුහල්පතිවරයා සඳහන් කළේය.
"මට ආයේ නැති වෙන්න දෙයක්‌ නෑ.. මගේ ජීවිතේම නැතිවෙලා ඉවරයි..." භාතියගේ පියා වන සෙනවිරත්න ඒකනායක මහතා දරාගත නොහැකි වේදනාවෙන් ප්‍රකාශ කළේය. හෙතෙම ත්‍රිත්ව විදුහලේ අනධ්‍යයන කාර්ය මණ්‌ඩලයේ සේවකයෙකි. හීරැස්‌සගල ප්‍රදේශයේ පදිංචිකරුවකු වන භාතියගේ මව ඉන්දිකා දමයන්ති ඒකනායක මහත්මියයි.
සිද්ධිය සම්බන්ධයෙන් පල්ලේකැලේ හා මහනුවර පොලීසි ඒකාබද්ධව පරීක්ෂණ පවත්වයි. මළ සිරුර පිළිබඳ පශ්චාත් මරණ පරීක්ෂණය ඊයේ (02) දහවල් පැවැත්වීමට නියමිතව තිබිණි.
පාසලේ ක්‍රීඩාවේ නිරත දරුවන්ගේ ආරක්ෂාව පවත්වාගෙන යාමට උපකාර වන උපදෙස් කිහිපයක් පහත දැක්වේ:
1. ඇඟ උණුසුම් කිරීම
ක්‍රීඩා කිරීමට ප්‍රථම සැහැල්ලු ව්‍යායාම වලින් අංග උණුසුම් කිරීමෙන් වැඩි ආතතියක් නොමැතිව දරුවාගේ මාංශපේශි ක්‍රීඩාව සඳහා සුදානම් කරන්නට හැකියි.
2. නිසි ආරක්ෂක උපකරණ සහ ආරක්ෂක ඇඟලුම් සහ මෙවලම් භාවිතා කිරීම
ආරක්ෂණ උපකරණ නොහොත් මුඛ ආරක්ෂණ, හෙල්මට්, පෑඩ් සහ සපත්තු වැනි දෑ භාවිත කිරීම අනතුරු වැළැක්වීම සඳහා ඉතා වැදගත් වේ.
3. විවේකය
පුහුණු, ක්‍රීඩා අතර ප්‍රමාණවත් විවේකයක් අවශ්ය වේ. නින්ද හා විවේකය මදිකම හා මාංශ පේශි දුර්වල කොට තෙහෙට්ටුවක් ඇති කිරීම ක්‍රීඩකයාට හානිදායක විය හැක.
4. හොඳින් සජලනය වීම
ක්‍රීඩාවට පෙර, ක්‍රීඩාව අතර සහ ක්‍රීඩාවෙන් පසුව පානය සඳහා ප්‍රමාණවත් ජලය ඇති බවට දෙමාපියන් තහවුරු කර ගත යුතු අතර, තෙහෙට්ටුව, ඔක්කාරය, වමනය, ව්යාකූලත්වය හෝ කණස්සල්ල වැනි තාපයට සම්බන්ධ ලෙඩ රෝග පිළිබඳ ඇතිවිය හැකි යම් සලකුනු ගැන විමසිල්ලෙන් සිටිය යුතු වනවා.
5. යම් අසීරුතාවයක් දැනේ නම් වහාම ක්‍රීඩාව නැවත්වීම
සිරුරට දැනෙන යම් අසීරුතා නොසලකා හැරීම විශාල ගැටළු වලට මග පාදනු ඇත. දරුවා දුර්වල බවක් පිටතට පෙන්වන්නට ඇති අකමැත්ත නිසා අසීරුතාවයෙන් වුවුඅද ක්‍රීඩාවක නියැලෙන්නට පිළිවෙන. නමුත් දරුවා ගැන විමසිලිමත්ව කටයුතු කිරීම දෙමාපියන්ගේත් පුහුණුකරුවන්ගේ වගකීම වනවා.
පාසැල් දරුවන් තුල සැඟවුණු Aortic dilations (aneurysms) වැනි රෝගකාරකයන් තිබිය හැකි අතර මදක් බරපතල් ක්‍රීඩා නැතහොත් අධික පීඩනයක් ගෙන දෙන ක්‍රීඩා කිරීම් වල නියැලීමට ප්‍රථම දරුවෙකුගේ සෞක්‍ය එම ක්‍රීඩා වලට ඔරොත්තු දේදැයි තහවුරු කරගැනීම ඉතාම වැදගත් වනවා. මේවා එකෝ පරීක්ෂාවක් සිදු කරගැනීමෙන් කල හැකි වනවා.
