ශ්‍රී ලංකාවේ මාර්ග නීති තිබුණත් ඒවා විටින් විට සංශෝධනය වීම වගේම ඒ පිළිබඳව බරපතල ලෙස ක්‍රියාමාර්ග නොගැනීම නිසාම වාහනයක් තුළ දරුවන් රැගෙන යන විට වැඩිහිටියන් සිතන ප්‍රමාණය අඩුදැයි අපට සිතෙනවා.
බොහෝ රටවල රිය අනතුරු වළක්වා ගැනීමටත්, ජීවිත රැකගැනීමටත් ඇති අපේක්ෂාව නිසා නීති තදින් ක්‍රියාත්මක කරන අතර ජනතාව නිරායාසයෙන් ඊට හුරුපුරුදු වී තිබෙනවා. මේ නිසා සිදුවිය හැකි බොහෝ අනපේක්ෂිත අනතුරු වලින් වැළකෙන්නට පුළුවන්. වාහනයක් තුළ ගමන් කරන විට විශේෂයෙන් වැඩිහිටියන් දරුවන් ගැන සැලකිලිමත් වීම වැදගත් කාරණයක්.
ආරක්ෂක බඳ පටි
රථයක ගමන් කරන විට ආරක්ෂක පටි පැළඳ ගැනීම මූලික ආරක්‍ෂිත පිළිවෙත වුනත් ඒ පිළිබඳ බොහෝ දෙනාගේ සැලකිල්ල අඩු බව පෙනී යනවා. දරුවෙකු වාහනයේ ඉදිරිපස ගමන් කරනවා නම් අනිවාර්යයෙන්ම ආසන බඳ පටි පැළඳීමට මතක තබා ගන්න. ඉන් දරුවාගේ ජීවිතයට අනතුරකදී විය හැකි බරපතල වගේම හානි රැසක් වළක්වා ගන්නට පුළුවන්. මෙලෙස ආරක්ෂක බඳ පටි පැළඳ නොසිටියත් රථයේ වායු බෑග් ක්‍රියාත්මක වීමට ප්‍රමාද වීමක් හෝ අක්‍රමිකතාවයක් සිදුවුවහොත් ඔබට ඒ ගැන බිය විය යුතු නැහැ.
ආරක්‍ෂිත ළදරු ආසන
ඔබ බිළිඳු දරුවෙකු සමග රථයක ගමන් කරනවා නම් ආරක්‍ෂිත ළදරු ආසනයක් තබාගන්න අමතක කරන්න එපා. නමුත් කුඩා කළ සිට එය දරුවාට හුරු කිරීම තරමක් අපහසු වුනත් එය ක්‍රමයෙන් හුරුකර ගැනීම තුළින් රිය පැදවීම පහසු වීම වගේම ආරක්ෂාවත් හොඳින් ලැබෙනවා. ඔබට ආරක්‍ෂිත ළදරු ආසනයක් නැත්නම් පුංචි දරුවෙකු රැගෙන පසුපස ආසනයේ ගමන් කිරීම ඉතාම සුදුසුයි. නමුත් ළදරු ආසනයක් තිබීම හැම අතින්ම ආරක්‍ෂිත වුනත් එය නිසි ලෙස අසුනට සවිකර තිබීමද වැදගත්.
යතුරු පැදි හිස් වැසුම්
යතුරු පැදි වල ගමන් ගන්නා විට හිස් වැසුම් පැළඳ ගමන් කිරීම අනිවාර්ය කොට ඇතත් බොහෝ දෙනා දරුවන් සමග යනවිට ඔවුන්ට හිස් වැසුම් පැළඳවන්නේ නැතුව රැගෙන යන ආකාරය අපි දැකලා තියෙනවා. අනෙක් අතට දරුවන් ඉදිරිපස හැඬලය හා රියදුරු අතර මැද හිඳගෙන යාම ඉතාම අනාරක්ෂිත බව වටහා ගැනීම වැදගත්. මෙහිදී තිරිංග තද කිරීමකදී වුනත් දරුවා විසිවී යාමෙන් ඉතා භයානක අනතුරු සිදුවන්නට පුළුවන්. මේ නිසා අනෙක් අතට වැරදි ආදර්ශයක් දරුවන්ට ලැබෙන අතර ආරක්ෂාව පිළිබඳ ඔවුන්ගේ සැලකිල්ලද අඩුවීමට හේතු වෙනවා.
දොර ලොක් ස්ථිර ලෙස තද කිරීම
කාර් හා වාහන වල දරුවන් රැගෙන යන විට නිතරම දොරවල් වල ලොක් තදකර ඇතිදැයි බලන්න. විශේෂයෙන් එය ඔබේ රථයක් නම් ‘චයිල්ඩ් ලොක්’ එකක් සවිකර ගැනීම වැදගත්. ඉන් දරුවාට තනිව දොර විවෘත කළ නොහැකි අතර රියදුරුට පමණක් ලොක් එක ඇරීමේ හැකියාව තිබෙනවා. දරුවන්ගේ නොදැනුවත්කම නිසා විය හැකි අනතුරු වළකා ගන්න මෙය හොඳ විසඳුමක්.
වාහනයේ සුළං කවුළු ලොක් කිරීම
දරුවන් වාහනයේ තනිව පිටුපස ගමන් ගන්නා විට බොහෝ විට විනෝදයට වුනත් සුළං කවුළු ඇරීම, වැසීම කරන්න පුළුවන්. මේ නිසා දරුවන් හිස වාහනයෙන් එළියට දැමීමෙන් ක්ෂණිකව අනපේක්ෂිත අනතුරු සිදුවන්නට පුළුවන්. මේ
නිසා රියදුරු අසුනේ ගමන් ගන්නා අය විසින් පාලනය කළ හැකි සේ සුළං කවුළු ලොක් කිරීමෙන් මේ අනතුරු වළකා ගන්න පුළුවන්.
ත්‍රිරෝද රථ වල ගමන් කිරීමේදී ප්‍රමාණය ඉක්මවා පිරිසක් ගමන් කිරීම
ත්‍රිරෝද රථවලින් ඉක්මනින් අනතුරු සිදුවීමේ ප්‍රවණතාවයක් තිබෙනවා. විශේෂයෙන් රියදුරාට රථය පාලනය කරගත නොහැකි වීමෙන් රථය පෙරලීමට ඇති ඉඩකඩ වැඩියි. ඒ නිසා හැකිතරම් ආරක්ෂාකාරී ලෙස ඊට දැරිය හැකි පිරිසක් පමණක් එහි අසුන් ගැනීම වැදගත්. විශේෂයෙන් දෙමාපියන් දරුවන් රැගෙන යන විට මේ ගැන සිතීම ඉතා වැදගත්.
ත්‍රිරෝද රථයේ දරුවන් පමණක් යවනවාද?
මෙය ඉතාම අනාරක්ෂිත තත්වයක් බව සිතිය යුතු වෙනවා. දරුවන්ට ක්ෂණික තීරණ ගැනීමට ඇති ඉඩකඩ නිසා ඔවුන් රථයෙන් ඉවතට අත්පා දැමීම, රථයට වන අනතුරකදී කිසිදු ආරක්ෂාවක් දරුවන්ට නොමැතිකමින් විශාල අනතුරු සිදුවන්නට පුළුවන්. අනෙක් අතට ඉතා ජනාකීර්ණ ස්ථාන වල ත්‍රිරෝද රථයකින් දරුවන් පමණක් යැවීම ගැන ඔබ නිතරම දෙවරක් සිතීම වැදගත්.
ආරක්‍ෂිත පියවරවල් තිබියදී ඒවා ගැන නොසැලකීම පසු තැවිල්ලට හේතුවක් වන්නට පුළුවන්. මහමග ආරක්ෂාව අපම සලසා ගතයුතු නිසා දරුවන්ට ඒ ගැන කියා දෙමින් ඒවා අනුගමනය කරමින් ගමන් බිමන් යාම ඉතා වැදගත්.
