ඔබේ දරුවාට කරන්නට බල නොකළ යුතු කාරණා 6 ක් (පලවෙනි කොටස)

lead image

මේ දේවල් කරන්න දරුවාට බල කරනවද?

“කෑම පිඟානම ඉවර කරන්න ඕනේ”

“අන්කල් ට කිස් එකක් දෙන්න”

“ අද සුවිමින් ක්ලාස් යන්න”

දරුවෝ දන්නේ නැහැ එයාලට හොඳමදේ මොනවද කියලා. ඉතින් දෙමාපියන්ට ඔවුන්ට හොඳම දේ තෝරලා දෙන්න වගේම සමහර විට ඊට බල කරන්නත් වෙනවා. පුංචි කාලේදී දෙමාපියන්ගේ තල්ලුවක් නැතිව බැහැ.

දෙමාපියන් හැටියට ඔබ හරි වෙන්න පුළුවන්. එත් ඔබ බලකරන සමහර දේවල් ගැන මීට වඩා සැලකිලිමත් වෙන්න වෙනවා. මොකද සමහර දේවල් ඔවුන්ට විවිධ බලපෑම් ඇති කිරීමට වගේම පෙරලා ඔබටත් බලපෑම් ඇති කිරීමට සමත් වෙනවා.

ඉතින් ඔබ දරුවාට බල නොකළ යුතු කරණා කිහිපයක් ගැන දැන් බලමු.

1. කිසි විටෙකත් ශාරීරිකව නෑදෑයින් සමග ළංවීමට බල කරන්න එපා

කිස් එකක් දෙන්න, තුරුල් කර ගන්න, උකුලේ ඉඳගන්න එක වගේ ඔබ හා නෑදෑයනුත් දරුවාට බල කරන අවස්ථා තියෙනවා. දරුවාගේ අකමැත්තෙන් එසේ කිරීමට බලකිරීම නිසා ඔවුන්ටම හිමි වුන ඔවුන්ගේ පෞද්ගලික නිදහස හා පෞද්ගලිකත්වය නැති වී යනවා. එය ලිංගික අපයෝජනයක ලක්‍ෂණ කියාපානවා.

අපි අපේ දරුවන්ගේ ශරීරයට ගෞරව කිරීම ඉතාම වැදගත්. මේ නිසා දරුවන් කලකිරීමටත්, නරක පුරුදු වලටත් යොමු වෙන්නත් පුළුවන්.

එසේ ඔවුන්ට බල කිරීම වෙනුවට දුර සිටන් ඔවුන්ට ආචාර කිරීමට, කුළුපගව කතා කිරීමට පියවරෙන් පියවර කියා දෙන්න.

2. කවදාවත් සුදානම් නැති අවස්ථාවක කෙනෙකුගෙන් සමාව අයදින ලෙස කියන්න එපා

දරුවා ඊට මනසින් සුදානම් නැති නම් බලහත්කාරයෙන් සමාව ගන්නා ලෙස බල කිරීම මගින් ඔවුන් තුළ තරහව හා ලැජ්ජාව ඇති වෙනවා.

මේ රත්තරන් හා සමාන යැයි සලකන ‘සමාවෙන්න’ යන වචනය පිට කරන්න ඉස්සෙල්ල ඔවුන් කළ වැරැද්ද අවබෝධ කර දෙන්න බලන්න.

ඔවුන්ට ටිකක් සන්සුන් වෙන්න ඉඩක් දීලා ඔවුන් වැරැද්ද කල එක ගැන නැවතසිතන්න කෙටි කාලයක් දෙන්න. ඉන් පසු ඔහු සිතින්ම සමාව ගන්න පෙළඹෙන වාතාවරණයක් හදාගන්න ඔහුට ඉඩ දෙන්න.

3. දරුවාට කියවීමට බල කරන්න එපා

හැමෝම දෙමාපියන්ට ඕනේ දරුවා ඇති දක්ෂයෙක් වෙනවා බලන්නයි. ඉතින් කියවීම ඊට උදවුවක් වුනත් ඔවුන්ට අවශ්‍ය නැති වෙලාවට කියවන්න බලකිරීමෙන් කියවීම පිළිබඳ ඇති වටිනාකම ඔවුන් සැහැල්ලුවෙන් හිතන්න පුළුවන්.

එහෙම නොකර දරුවාට පොත් ගැන අසා ඇති වෙන්න ඔහුට ඇහෙන්න පොත් ශබ්ද නගා කියවන්න. ඉන් ඔවුන්ගේ කුතුහලය ඇවිස්සෙනවා.

පර්යේෂණ වලට අනුව කියවීමට ඇති උනන්දුව වයස අනුව අඩුවන බව සොයාගෙන තියෙනවා. පුංචි කාලේ ඉඳන්ම දරුවන්ට කියවීමට හුරු කරන්න. ඔබ පොත් කියවන හැටි ඔවුන්ට දකින්න සලස්වන්න.  

මුල සිට පටන් ගන්න විට පින්තූර පොත් සහ ටිකෙන් ටික උපදෙස් පත්‍රිකා සහිත ක්‍රීඩාවන් ඔහුත් එක්ක කියවමින්  ක්‍රීඩාවේ යෙදෙන්න. කියවීමේ අගය විනෝදයෙන් කියා දෙන්න.

4. කිසි විටෙකත් අමතර ක්‍රියාකාරකම් වලට ඔහුගේ අකමැත්තෙන් තල්ලු කරන්න එපා

බොහෝ දෙමාපියන් තමන්ගේ ආශාවන්, තමන්ගේ ඉටු නොවූ සිහින තම දරුවන් ලවා ඉටු කර ගැනීමට බලනවා. ඒ නිසා ඔබ කැමති වුවත් සමහර ක්‍රියාකාරකම් වලට දරුවා අකමැති නම් ඊට තල්ලු කිරීම හොඳ නැහැ. එවැනි දරුවන් කිසි හවුහරණක් නැති තනිවූ දරුවන් ලෙස ඔවුන්ට හැඟෙන්න ගන්නවා.

එහෙම නොකර ඔවුන් කැමති ක්‍රියාකාරකම් ඔවුන්ට කරන්න තෝරාගන්න දෙන්න. හැම දරුවම එක සමාන නැහැ. සමහරු කලාත්මක දේවල්, සමහරු ක්‍රීඩාවන්ටත් කැමතියි. ඒ වගේම නිකන් ගෙදර සෙල්ලම් කිරීමට ඉඩ හැරීමත් වැදගත්. ඉන් දරුවන් තුළ සමාජය සමග බැඳීම, ශාරීරික ජවය ශක්තිය හා අනෙකුත් අමතර ක්‍රියාකාරකම් වලට ඇති හැකියාව ඉස්මතු වෙනවා.

5. කිසිවිටෙකත් බලෙන් කෑම කවන්න එපා

බලෙන් කෑම කැවීම දරුවන්ට දීර්ඝ කාලීනව අනිසි ප්‍රතිඵල ගෙන දෙන බව පවසනවා. මෙවැනි දරුවන් තනිවූ, හව්හරණක් නැති සේ සිතන දරුවන් බවට පත් වෙනවා. ඒ වගේම ඔවුන් කෑම වලට ඇති රුචියෙන් ඈත් වෙනවා. ආහාර වල ගුණයන් වගේම කැමැත්ත, කුසගින්න, පෙනුම හැමදේම බලපානවා.

ඒ වෙනුවට කෑම කන එක සතුටින් කරන්න හුරු කරන්න. දෙමාපියන් සමග එකට සිට හෝ නැතිනම් ඔවුන් කැමති පරිසරයක් ඊට සකසා දෙන්න.

6. කිසි විටෙකත් බෙදා ගැනීමට බල කරන්න එපා

වැඩිහිටියන් විදිහට අපි ලොකුවට කියන්නේ බෙදාගැනීම කියන්නේ අන් ඇය ගැන හිතීම කියලයි (‘sharing is caring’). අපිට එතරම්ම අපේ දරුවන් ත්‍යාගශීලි වෙනවා දකින්න ආසයි. එත් බලහත්කාරයෙන් එය කරන්න යාමෙන් ඔහු තුළ අනවශ්‍ය ලැජ්ජාවක් ඇති වෙනවා.

ඔහු සතු දෙයක් ඔහුට තබා ගැනීමට නොහැකිවීම ගැන ඔහු හිතන්න යනවා. ඒ වෙනුවට බලකිරීමෙන් තොරව බෙදාගැනීමේ වටිනාකම කියා දීමෙන් සෙල්ලම් කරන විට තමන්ගේ වාරය එනතුරු සිටීමට ඉගැන්වීම වැනි ක්‍රම තුළින් ආත්මාර්තය යටපත් කරන්න පුළුවන්.  

බලෙන් කිසිවක් ගන්නත් දෙන්නත් අපිට බැහැ. අවබෝධය මේ සියල්ල තුළම තිබිය යුතුයි. දරුවන්ට ආදරෙන් ඒ අවබෝධය ලබාදෙන්න ඔබේ හොඳම මිතුරිය theAsianparent Sri Lanka උත්සහ කරන්නේ ඒ නිසයි.  

theAsianparent හි අනුමැතිය ඇතිව පරිවර්තනය කර ප්‍රකාශිතයි.

පරිවර්තනය: නිසංසලා ලියනගේ