දරුවන් නින්දට යැවීම සමහර අම්මලාට ගැටළුකාරී අවස්ථාවක්. ඒ වෙනුවට එය ඉතා සුවබර ආදරණීය අත්දැකීමක් බවට පත්කර ගැනීමෙන් දරුවාටත් අම්මාටත් මානසික සුවයක් ලැබෙනවා.
හුඟක් අම්මලාට අධික කාර්යබහුලත්වය හා විවේක මදිකම නිසාම වෙනත් උපායන් යොදා දරුවන් නින්දට යවන්නට පෙළඹෙන අවස්ථා තියෙනවා. නමුත් දරුවන්ගේ මානසික, කායික වර්ධනයට සුවදායි නින්දක් බෙහෙවින් වැදගත් වන බව මනෝ වෛද්‍යවරුන් සඳහන් කරනවා.
සුවබර නින්ද දරුවන්ගේ මොලයේ වර්ධනයට මෙන්ම ශරීරයේ අස්ථි වර්ධනයට විශාල දායකත්වයක් ලබා දෙන බැවින් සුව නින්දකට පූර්ව සැලසුමක් දෙමාපියන්ට තිබීම වැදගත්.
දරුවන් නළවන්න තාක්ෂණයට බාර දෙනවාද?
වර්තමානයේ හුඟක් දෙමාපියන් කියන කතාවක් තමයි ලැප්ටොප් එක, ටැබ් එක නැතිනම් ෆෝන් එකෙන් තමන් දරුවන් නින්දට යවන කතාව. හුඟක් දරුවන්ව නින්දට යවන්න විතරක් නෙමෙයි කෑම කවන්නත් දෙමාපියන් යොදාගන්නේ තාක්ෂණික මෙවලම්.
හය හතර නොදන්නා කිරිකැටියා අවසානයේ ආකර්ෂණය වන්නේ දෙමාපියන්ට නොව මේ මෙවලම් වලට පමණයි. ඒ නිසා නිරායාසයෙන්ම අම්මලාට දරු නැළවිලි ගී කියන්න අමතක වෙලා ගිහින්.
දරු නැළවිලි ගී කියා පැටියා නැළවීමේ වැදගත්කම
දරුවන් දරු නැළවිලි ගී වලට ආසා කරන්නේ මව්කිරි වලට වගේමයි. මන්ද අම්මට හොඳ ගායන හැකියාවක් නැතත් ඇගේ හඬට මුසුවන ආදරය සෙනෙහස ඉන් දරුවාට හොඳින් දැනෙනවා.
නිතර නිතර ඇගේ මුවඟින් ගලා හැලෙන මේ රසබර වදන් පෙළ දරුවාගේ මනසේ සටහන් වෙනවා. දරුවා අම්මා හඳුනා ගන්නත් මවගේ ස්වරයට ඇහුම්කන් දෙන්නත් නිතැතින්ම ආසා කරන්නේ මවට ඇති අපරිමිත බැඳීම නිසයි.
එය දරුවා හා මව අතර ඇති බැඳීම ශක්තිමත් කරන්නත් දරුවා නිරවුල් මනසින් නින්දට යාමටත් හේතු වෙනවා. ඉන් දරුවන්ට සුව නින්දක් ලැබෙන අතර වර්ධනයට එය ඉතා හිතකර වෙනවා.
නැළවිලි ගී අපි දන්නේ නැහැනේ
හුඟක් අම්මලා එහෙම කියන්න පුළුවන්. දරු නැළවිලි ගී අපේ සංස්කෘතිය හා බද්ධ වී ඇති දෙයක්. එදා අම්මලා දරුවන්ට නැළවිලි ගී කිව්වේ පෙර පුහුණුවක් ඇතිව නෙමෙයි.
අතීතයේ පුංචි දරුවෙකු ඉන්න නිවසකින් දරු නැළවිලි ගීයක් නොඇසුනොත් එය පුදුමයට කාරණයක්. හුඟක් නවීකරණය වූ සමාජ ක්‍රමය තුළ ජීවත් වන අය ගමෙන් ඈත්ව ජීවත් වුවත් අපේ සංස්කෘතියේ මුල් වල ඇති වටිනාකම් අපේ දරුවන්ගේ ජීවිත වලට බෙහෙවින් වටිනා බව වැඩිහිටියන් අමතක කර දැමීම අපෙන් සිදුවන විශාල අත්වැරැද්දක්.
එදා ගෙවල් කිහිපයකට ඇහෙන්න අම්මා නැළවිලි ගී කිව්වත් එය වරදක් ලෙස සමාජය දකින්නේ නැත්තේ ඊට ගෞරවයක්, ආදරයක් හිමි වූ නිසයි. දරු නැළවිලි ගී ගැන ඔබට අත්දැකීමක් නැතිනම් ඔබේ පුංචි පැටියා වෙනුවෙන් අපි ඔබට සටහන් කරන්නම්. නමුත් ඔබට සුන්දර ළමා ගී කිහිපයක් වුනත් ගායනා කර පුංචි පැටියා සතුටින් නින්දට යවන්න පුළුවන්.
- අතට වෙරළු ඇහිඳ ගෙනේ
ඉනට පලා නෙලා ගෙනේ
බරටම දර කඩා ගෙනේ
එයි අම්මා විගස කිනේ
- ඔන්න බබෝ ඇතින්නියා
ගල් පොත්තේ සිටින්නියා
රණ උණබට තලන්නියා
අත පිඹ පිඹ දුවන්නියා
- මගේ පුතා හරි හපනා
වරුවට කොළඹට යනවා
පවුම් තිහක් පඩි කනවා
ඉන් පවුමක් මට දෙනවා
