දෙමාපියන් හැමදෙනාම අද ඉතාම කාර්යබහුල නිසා දරුවන්ගේ කටයුතු කළමනාකරණය කරගන්න ඉතා පරිශ්‍රමයක් දරන්න සිදුවෙලා. විශේෂයෙන් දරුවන්ව ආරක්ෂිතව පාසලට යවන්නත් නැවත නිවසට ඒමත් දෙමාපියන්ට විශාල ගැටළුවක්.
වැඩිපුර දෙමාපියන් රැකියාවට පිටත්ව ගිය පසු නැවත දරුවන් නිවසට රැගෙන යාමට අවකාශයක් ලැබෙන්නේ නැහැ. අනෙක් අතට පොදු ප්‍රවාහන සේවයන් වල ඇති අනාරක්ෂිත බව හා අධික කලබලකාරී ස්වභාවය ගැන දෙමාපියන්ට ඇති චකිතය නිසා ඔවුන් ඊට නව පහසු ආරක්‍ෂිත පියවරක් ලෙස පෞද්ගලික ප්‍රවාහන සේවා බස් රථ වලට දරුවන් බාර දෙනවා.
ඇත්තටම එය ආරක්ෂිතද?
මෙහිදී ඔබ දරුවා ඇතුළත් කරන පාසල් සේවා බස් රථය ගැන ඉතා හොඳින් දැනුවත්ව තිබීම වැදගත්.
දැනුවත් විය යුත්තේ කුමන කාරණා ගැනද?
- රියදුරු පිළිබඳ තොරතුරු
- රියදුරු බලපත්‍රය
- එහි හිමිකරු පිළිබඳ තොරතුරු
- රියදුරු සමග සහයට යන පුද්ගලයා පිළිබඳ තොරතුරු
- ඔවුන්ගේ දුරකථන අංක
- රථය ගමන් කරන මාර්ග
- තම නිවසට ළඟා වෙන වෙලාව (දළ වශයෙන්)
- රථය පාසලින් පිටත් වෙන වෙලාව
- රථය ළමුන් එකතු කරන අනෙකුත් පාසල්
- එහි යන අනෙකුත් දරුවන්ගේ දෙමාපියන් කිහිප දෙනෙකුගේ හෝ දුරකථන අංක
- වාහනයේ ප්‍රමිතිය
- රථය ගාල්කර තබන ස්ථාන
- පාසල් සේවා රථයක් ලෙස ලියාපදිංචි වී ඇති බව
මේ සෑම සියුම් කාරණාවක්ම ඔබ දැනගත යුත්තේ ඇයි?
වර්තමානයේ බොහෝ අනතුරු පාසල් සේවා රථය තුළදී හා මහමගදී සිදුවීම නිසා දරුවන්ගේ ජීවිත නැතිවූ බොහෝ අවස්ථා අපට අසන්නට ලැබී තිබෙනවා. බොහෝ දුරට රියදුරෙකුට රියදුරු බලපත්‍රයක් තිබුනත් ඊට ඔහුට ඇති නිපුනතාවය ඉන් සනාථ කරන්න බැහැ. ශ්‍රී ලංකාවේ අයතා ලෙස සහතික ලබාගන්නා ක්‍රම ඇති බව සිතීම වැදගත්. මේ නිසා අනාරක්ෂිත රේල් ගේට්ටු අසලින් පාසල් ළමුන් ගෙනයන රථ පැදවූ රියදුරන් ගැන අපි කොතෙකුත් අසා තිබෙනවා. වෑන් අංකල්ගේ නොමනා ලිංගික යෝජනා වගේම අපයෝජනයට ලක්වූ අහිංසක මල් කැකුළු ගැන අපි කොතෙකුත් අසා තිබෙනවා.
නොසැලකිල්ල නිසා පාසල් අවසානයේ දරුවන් නිසි ලෙස වාහනයට රැගෙන නොයෑමෙන් අතරමං වන දරුවන් අපිට ඕනෑතරම් මුණගැසී තිබෙනවා. දරුවන් ප්‍රවාහනයට හා සෞඛ්‍යාරක්ෂිත නොවන වාහන අපි කොතෙකුත් දැක තිබෙනවා. සමහර වාහන වල නුසුදුසු ප්‍රමිතියෙන් යුතු ආසන, මල කෑ උපාංග ආදිය අපේ ඇස ගැටී තිබෙනවා. මේ නිසා දරුවන්ට අනතුරු ඇතිවිය හැකි වගේම දිර්ඝකාලිනව අස්ථි වේදනා ආදිය හටගැනීමට හේතුවිය හැකි වෙනවා. අනෙක් අතට උවමනාවට වඩා ඒ කියන්නේ ප්‍රමාණය ඉක්මවා දරුවන් බඳවා ගැනීමෙන් ඔවුන් ආර්ථික වාසි බලාපොරොත්තු වුනත් ඉන් දරුවන් වෙහෙසටත් පීඩාවටත් පත් වීමෙන් ඔවුන්ගේ පාසල් ගමන ඉතා වෙහෙසකර අත්දැකීමක් බවට පත්වෙනවා. නිසි ලෙස ආසන පහසුකම් නොතිබීම නිසා දරුවන් අනවශ්‍ය තෙරපුමකටත් වෙහෙසටත් පත්වීමෙන් ඔවුන් තුළ ඇති ජවය ශක්තිය හීන වී යනවා. ඒ නිසා ඔබ කොතරම් කාර්යබහුල වුනත් දරුවා යන පාසල් රථයේ තොරතුරු ගැන නිතර සොයා බලා දැනුවත්ව සිටින්න.
ඔබ විසින් රියදුරු හා හිමිකරු දැනුවත් කර තැබිය යුතු කාරණා
- ඔබගේ දුරකථන අංක
- දරුවාට රෝගාබාද ඇත්නම් හෝ වෙනත් අපහසුතා ඇත්නම් ඒ පිළිබඳ දැනුවත් කර තැබීමෙන් හදිසි අවස්ථාවක ක්‍රියාත්මක වීමට පහසු වීම.
- ඔබගේ සේවා ස්ථානයේ ලිපිනය
- අසල්වැසි නිවසේ හෝ ඥාති කෙනෙකුගේ ලිපිනය හා දුරකථන අංක
- දරුවා පාසල් රථයේ යන හා නොයන දවස්
- දරුවාට පාසලෙන් පසු අමතර ක්‍රියාකාරකම් ඇති දවස්
- දරුවාව ඔබ විසින් රැගෙන යන අවස්ථාවන්
නිරන්තර අවධානය, විමසිලිමත් බව අපේ දරුවන්ගේ ජීවිත අකාලයේ අනුන්ගේ ගොඳුරු බවට පත්වීම වළකා ගන්න හැකි සුදුසුම මගයි.
