බිත්තර සැන්විච් වෙනස් විදියකට හදලා දෙමුද?

හැමදාම එකම විදියට කෑම කන්න කවුරුත් කැමති නැහැ. පොඩ්ඩොත් එහෙමයි. හැමදාම ආහාරයට ගන්න බිත්තර සැන්විච් (egg sandwich) පොඩ්ඩක් වෙනස් කරලා බලමුද?

බිත්තර සැන්විච් වෙනස් විදියකට

අවශ්‍ය ද්‍රව්‍ය

1. වටේ කපා ගත් පාන් පෙති හතරක්

2. බටර් ටිකක්

බිත්තර සැන්විච් පිරවුම

1. බිත්තර 01

2. හීනියට ලියා ගත් කැරට් මේස හැදි 02

3. හීනියට ලියා ගත් ලීක්ස්  මේස හැදි 02

4. හීනියට ලියා ගත් බෝංචි මේස හැදි 02

5. හීනියට ලියා ගත් ගෝවා මේස හැදි 02

6. හීනියට ලියා ගත් ලූණු හා කරපිංචා

7. පොල්තෙල්

8. ලුණු

සාදන ක්‍රමය - පිරවුම

• භාජනයකට  තෙල් ටිකක් දමා රත් කරගන්න .

• හොදින් රත් වු තෙල් වලට සිහින්ව ලියා ගත් ලූණු, කරපිංචා දමා රන්වන් පාට වෙනතුරු බැද ගන්න.

• ඉන්පසු එයට ලියාගත් එළවළු හා රස අනුව ලුණු එක්කර බැදෙන්න හරින්න.

• අවසානයේදී  බිත්තරයද එක්කර හොදින් හැදි ගාන්න. ( කුඩු වන තෙක්)

සැන්විච් සැකසීම

• වාටි ඉවත් කර ගත් පාන්පෙති දෙකෙහිම හොදින් බටර් තවරා ඒ මත උණුසුම ගිය මිශ්‍රණය තවරන්න.

• දැන් ලස්සන හැඩයකට කපා පිළිගන්වන්නත් පුලුවන්. නැතිනම් ටෝස්ට් කර ගන්නත් පුලුවන්.

බිත්තර වල ගුණ

බිත්තර මිලෙන් අඩු, රසවත් සහ වට්ටෝරු රැසකට සකස් කරගත හැකි ආහාරයක්. ඒ වගේම තරුණ දරුවෙකු කලබලයෙන් සිටින අවසථාවක එක බිත්තරයක් ආහාරයට ලබා දෙන්න. මෙය ඔහුට සන්සුන් බව ලබා දෙන අතර හොඳ පෝෂණයක්ද ලැබෙනවා.

• කෝලින් - මොලය වර්ධනය කිරීම , ක්‍රියාකිරීම හා මතක ශක්තිය ඇති කරනවා.
• ෆොලේට් - රතු රුධිර සෛල නිෂ්පාදනය හා පාලනය.
• අයන් - සෛල වලට ඔක්සිජන් වහනය කරනවා.
• ලුතින් සහ ඇසියන්තින් - පෙනීම දියුණු කිරීම සහ UV කිරණ වලට එරෙහිව ක්‍රියා කර ඇස් ආරක්ෂා කරනවා.
• නයිසින් - සාමාන්‍ය ස්නායු ක්‍රියාකාරිත්වය දියුණු කර ශක්තිය මුදා හැරීමට උදවු වෙනවා.
• ඔමේගා-3 ෆැට්ස් - රුධිර කොලෙස්ටරෝල් ඉහළ දමනවා.
• ප්‍රෝටීන් - ශරීර ශක්තිය පවත්වා ගැනීමට උදව් වෙනවා.
• රිබෝෆ්ලෙවින් - ශරීරයේ පටක නිරෝගීව තබනවා.
• විටමින් A - පිළිකා වලට එරෙහිව ක්‍රියා කරනවා.
• විටමින් B12 - හෘදයාබාධ වලට එරෙහිව ක්‍රියා කරනවා.
• විටමින් D - අස්ථි සහ දත් නිරෝගීමත් කරනවා.
• විටමින් E - ප්‍රතිඔක්සිකාරකයක් ලෙස ක්‍රියා කරනවා.
• සින්ක් - ප්‍රතිශක්තිකරණ පද්ධතිය ශක්තිමත් කරනවා.

බලන්නකෝ ඔයාගේ පොඩ්ඩත් මේ වෙනසට කැමතිද කියලා.