ජංගම දුරකථන වලින් ඇති වන නොයෙක් අකාරයේ විපාක ගැන විවිධ ලිපි හා පුවත් මගින් නිතර කියවෙනවා. නොයෙක් උපාංග හා මෘදුකාංග ඔස්සේ ජංගම දුරකථන අද බාල මහලු කොයි කාවත් ග්‍රහණයට නතු කරගෙන තිබෙනවා. මෙයින් ඇති වන සම්බන්ධතා ගැටළු, මානසික හා ශාරීරික ගැටළු හා ඒවාට පිළියම් ගැන නොයෙකුත් දැනුවත් වීම් කෙරෙනවා. ඒ අපගේ අනාගත පරපුර මේ ජංගම දුරකථන බිල්ලෙන් මුදා ගැනීමටයි. එනමුත් දුරකථනය නිසා ඇතිවන ජිවිත හානිය මේ හැම දෙයකටම වඩා බරපතලයි.
මාස කිහිපයකට උඩදී සිදුවූ මේ හදිසි අනතුරත් අහස පොලව නුහුලන ඉතාමත්ම ඛේදනීය පුවතක්. ටයිම්ස් ලංකා අඩවියේ පළ වූ මේ පුවත අනුව මෙසේ මියගියේ අනුරාධපුර නව නගරයේ පදිංචිව සිටි තිලක් ලක්ෂාන් රණවීර (12) සහ ශෂී මධුෂාන් රණවීර (24) නම් වූ සොයුරන් දෙදෙනෙකි. ශෂී මධුෂාන් සිංගප්පුරුවේ හෝටල් කළමනාකරණය සම්බන්ධයෙන් උපාධියක් ලබා මෙරටට පැමිණියේ එදිනයි. ඔහු කැඳවා ඒමට අනුරාධපුරයේ සිට පැමිණි පවුලේ උදවිය ඔහුත් කැටුව ගුවන් තොටුපළෙන් ගාලු මුවදොරට සැම දෙන සතුටින් නික්ම යන්නේ විශේෂයෙන්ම පුංචි පුතු ලක්ෂාන්ගේ ආසාව නිසයි. ඔවුන් අවසන් වරට ගත් මෙම සෙල්ෆි චායාරුපය හද සසල කරවන්නේ ජීවිතය කෙතරම් අවිනිශ්චිතදැයි අපට යළි යළිත් පසක් කරමින්. නමුත් මෙය වලක්වාගත හැකිව තිබුනා නොවේද?
මේ ලිපිය ලියන්නේ මෙවන් මල් කැකුළු අකලට මිලින වීම යම් තාක් දුරට පාලනය කරන්නට වෙර දරන්නැයි දෙමාපිය ඔබට කරන ආයාචනයක් ලෙසයි.
නිවැරදි ලෙස ජංගම දුරකථන පාවිච්චිය දරුවන්ට හුරු කල හැකි ක්‍රම කිහිපයක්.
1. දරුවන්ට ජංගම දුරකථනය පාවිච්චියට දීම පාලනය කිරීම.
අද කාලයේ දෙමාපියන්ගේ ජංගම දුරකථන බොහෝ විට තියෙන්නේ දරුවන් ළඟ. දරුවන් සීග්‍රයෙන් තාක්ෂණය උකහා ගන්නා නිසා බොහෝ දෙමාපියන් දුරකථන පාවිච්චිය සඳහා යැපෙන්නේ දරුවන්ගෙන්.
මෙවන් තත්වයක් තිබේ නම් ඔබ අකමැත්තෙන් හෝ ස්මාට් ෆෝන් භාවිතයෙන් වැලකී සිටින්නට ඕනේ. මොකද ස්මාට් ෆෝන් වල ඇති විශාල ප්‍රශ්නයක් වන්නේ එහි ඇති අනේකවිධ විශේෂාංග නිසා මෙය පාවිච්චි කරන දරුවන් පමණක් නොව වැඩිහිටියන් පවා වෙනම ලෝකයක අතරමං වන්නේ ඉන්නා හිටිනා තැන හා වෙලාවක් ගැන නිනව්වක් නැතිව.
ඉහත සිදුවීමේදී පවා කැමරාව හසුරුවන්නේ වයස අවුරුදු දොළහක දරුවෙක්. මෙහි නොයෙකුත් සංඛේත පරිහරණය කරමින් පින්තුරු ගන්නා විට ඔහුට අවට වට පිටාව ගැන මොහොතකට නිනව්වක් නැති වෙන්නට ඇති. මේ නිසා දරුවන් වැඩිහිටියන් බවට පත් වන තුරුම දුරකථනය නොදී සිටීම ඉතාම යෝග්‍ය වන අතර, එය නොදීම බැරි නම් දිනකට පයක පමණ කාලයක් වෙන් කොට දී ඉන් ඔබ්බට දුරකථනය පාවිච්චි කරන්නට දීමෙන් වැලකී සිටිය යුතුයි.
2. දරුවන්ව හැකි තරම් එළිමහන් ක්‍රීඩා වලට යොමු කරවීම.
මෙය දුරකතනයට සම්බන්ධ මාතෘකාවක් නූනත්, එළිමහන් ක්‍රීඩා වල යෙදීමෙන් දරුවාට ඔබ හිතනවාට වඩා බොහෝ ගුණදායි ප්‍රතිපල ගෙන දෙනවා. අවට පරිසරය හා පුද්ගලයින් සමග ගැටීමෙන් දරුවා අවට ජිවත් වීමට, භාහිර අභියෝග වලට මුහුණ දීමට සිතින් හා ගතින් සුදානම් වනවා. මෙයින් දරුවන්ගේ පංචේන්ද්‍රියන් අවට පරිසරයේ ශබ්ධ, උෂ්ණත්වය, සුළඟ යනාදී සියළු වෙනස් වීම් කෙරෙහි මනාව සංවේදී වනවා. මෙවිට දරුවාට නිතැතින්ම භාහිර පරිසරයේ, මග තොටේ ආදී ආරක්ෂාකාරීව හැසිරීම සාමාන්‍ය දෙයක් වනවා.
3. දරුවන් ගැන විපරමින් සිටින්න
දරුවන් කෙරේ හැම විටම විපරමින් සිටීම ඉතා වැදගත්. ගමන් බිමන් යන දරුවන්ට අද බොහෝ මව්පියන් ආරක්ෂාව පිණිස ජංගම දුරකථන ලබා දෙනවා. මෙසේ දෙන්නට අවශ්‍යම නම් ස්මාර්ට් ෆෝන් නොදී සාමාන්‍ය ජංගම දුරකතනයක් අරන් දීම වැදගත්. මොවුන් පාර තොටේ තනිව ගමන් කරන්නේ නම් කිසි විටෙකත් ගීත ඇසීමට headphone යනාදිය පාවිච්චි නොකිරීමට උපදෙස් දිව යුතුයි. මේවා කන පැළඳීමෙන් පාර තොටේ ශබ්ධය නොදැනෙන අතර එය බොහෝ අනතුරුදායක වනවා.
මෙවන් ක්‍රම අනුගමනය කිරීමෙන් අපට යම් තාක් දුරට දරුවන් ආරක්ෂා කර ගැනීමට හැකියාව ලැබෙනවා. නමුත් දරුවන් ආරක්ෂා කිරීමට මත්තෙන් අපද වැඩිහිටියන් හැටියට මේ නරක පුරුදු වලින් මිදී පොළොවේ පැය ගසා වටපිටාව ගැන සීරුවෙන් හා අවබෝධයෙන් කටයුතු කල හැකියි.
ඡායාරූප හිමිකම්: දිනමිණ
