දරුවාගේ බුද්ධිය හීන කරන ආහාර වර්ග 4ක්
ආදරණීය මව් පිය වරුනි මේ ආහාර ඔබේ දරුවාට නොදීමට කරුණාකර වගබලා ගන්න
“ඔබේ ප්‍රතිරූපය ඔබ ආහාරයට ගන්නා දේවල් පිළිබිඹු කරයි!” මේ කියමන ඔබ අසා තිබෙනවාද? ඔබ ඊට එකඟද? ආහාර වලින් බුද්ධිය වර්ධනය කළ හැකිද? නැතිනම් බුද්ධිය හීන කරන ආහාර තිබෙනවාද?
කෙනෙක් දෙස යොමන එක බැල්මකින් ඔහුගේ හෝ ඇයගේ ජිවන රටාව සහ ආහාර රටාව තේරුම් ගන්නට පුළුවන්.
එම නිසා මෙම කියමන බහුතරයකටම පොදු සත්‍යක් වනවා. මෙය වැඩිහිටි අපට පමණක් නොව අපේ දරුවන්ටත් පොදු යථාර්ථයක් වනවා.
අන් කවරදාටත් වඩා ආහාර ගැන හැමෝම සැලකිලිමත් වන යුගයක, අප දරුවන්ට ලබා දෙන ආහාර ගැන විශේෂයෙන් උනන්දු වන්නේත් ඉමහත් ලෙස සැලකිල්ලෙන් තෝරා බේරා ගන්නේත් මවුපියන් හැටියට එය අපගේ මහඟු වගකීමක් නිසයි.
ඉතින් අප මෙලෙස දරුවන්ට ලබා දෙන මෙම ආහාර වර්ගයන් අතුරින් ආහාර වර්ග කිහිපයක් එදිනෙදා ජීවිතයට නුසුදුසු ඒවා වනවා.
නමුත් මෙම නුසුදුසු ආහාර වලින් කුඩා ප්‍රමාණයක් ඉඳහිට දරුවා ආහාරයට ගැනීම අහිතකර නොවේ යැයි සිතන්නට බොහෝ මව්වරුන් හුරු වී සිටිනවා.
එසේ නමුත් එවන් අහිතකර ආහාර සුළු වශයෙන් හෝ දරුවාට නොදීමට අපි සැලකිලිමත් විය යුත්තේ එය දරුවාගේ බුද්ධිය පමණක් නොව මතක ශක්තියටත් මහත් හානියක් සිදු කරන නිසාය.
බුද්ධිය හීන කරන ආහාර මොනවාදැයි බලමු
1. ඇසුරුම් කළ නොහොත් සකස් කළ ආහාර
මෙසේ සකස් කල, නැතහොත් ඇසුරුම් කළ ආහාර අතරට චිප්ස් වර්ග, බර්ගර් බනිස්, පීසා වර්ග ඇතුළු සහ මොනොසෝඩියම් ග්ලුටමේට් (monosodium glutamate) MSG වැනි රසායනික ද්‍රව්‍ය සහිත මැගී නුඩ්ල්ස් ඇතුළු තවත් ක්ෂණික නූඩ්ල්ස් වර්ග ආදිය අයත් වනවා.
Mmonosodium Glutamate නැතහොත් MSG වැනි රසකාරක ආහාරවල රසය ආකර්ෂණීය ලෙස වැඩි කරන අතරම දරුවන්ගේ මනෝභාවයට, හැසිරීමට සහ චර්යාවල වෙනස්කම් ඇති කිරීමට ද බලපෑම් ඇති කරනු ලබනවා.
එබැවින් වඩාත් යෝග්‍ය වන්නේ මෙවැනි ක්ෂණික ආහාර මුළුමනින්ම භාවිතයට නොගෙන සිටීමයි.
2. කෘතිම වර්ණක යෙදූ බුද්ධිය හීන කරන ආහාර
කෘතිම වර්ණක යෙදු ආහාර වර්ග බොහෝ රටවලින් සහමුලින්ම ප්‍රතික්ෂේප කර හෝ එම රටවලට ගෙන ඒම තහනම් කර තිබෙනවා.
මීට හේතු වන්නේ, එවන් ආහාර දරුවන්ගේ මානසික ආතතිය, කාංසාව, අධි ක්‍රියාකාරිත්වය හා හිසරදය වැනි සෞක්‍යයට හානිකර ගැටළු සහගත තත්ව ඇති කරන බැවිනි.
කෘතිම වර්ණකයන් යෙදූ අහාර දරුවන්ගේ හැසිරීම් වලද සැලකිය යුතු වෙනසක් ඇති කරයි.
3. කාබනීකරණය කළ සිසිල් බීම සහ විවිධ කෘතිම බීම වර්ග, තේ සහ කෝපි
තේ, කෝපි, චොකලට් වැනි ආහාරවල ස්වභාවිකවම අඩංගු වන සංඝටකයක් තමා කැෆේන්. මෙය නොයෙක් ඖෂධමය ප්‍රයෝජන සඳහා ද යොදා ගැනෙනවා.
නිදසුනක් ලෙස කොකාකෝලා කෑන් එකක් තුළ කැෆේන් මිලිග්‍රෑම් 36ත් 45ත් අතර ප්‍රමාණයක් අඩංගු වනවා.
මෙලෙස සිරුරට ඇතුල් වන කැෆේන් සුළු ප්‍රමාණයක් පවා පුංචි දරුවන්ගේ පුංචි සිරුරු වල බොහෝ අනිසි බලපෑම් ඇති කරන්නේ දරුවන් එවැනි සුළු ප්‍රමාණයකට හෝ බොහෝ සංවේදී විය හැකි බැවිනි.
එම කැෆේන් ඔවුන් තුළ මානසික ව්‍යාකූලත්වයක් ඇති කරන අතර නින්දට බාධා පමුණුවනවා ඇත. එමෙන්ම සිරුරේ නොයෙකුත් ව්‍යාකූලතා ඇති කරන්නට හැකියාවක් කැෆේන් වලට තිබෙනවා.
එම නිසා දරුවන්ට කැෆේන් අඩංගු පාන නොදීමෙන් ඔවුන්ව එම අවදානම් වලින් ආරක්ෂා කරගන්නට හැකි වනවා.
4. සීනි සහිත බුද්ධිය හීන කරන ආහාර
සීනි දරුවකුගේ සිරුරේ අධික්‍රියාකාරිත්වක් ඇති කරන්නට සමත් වන අතර ඔවුන්ගේ මනෝභාවයන් වෙනස් කිරීමටත් මානසික ශක්තිය හා මතක ශක්තිය හීන කිරීමටත් හේතු කාරකයක් වන අමුද්‍රව්‍යයකි.
සමීක්ෂණ වලින් පෙන්වන පරිදි සීනි අධික ආහාර ආහාරයට ගැනීම නිසා බුද්ධිය පමණක් නොව මොළයටද හානි පමුණුවනවා ඇත.
එපමණක් නොව ග්ලුකෝස් සහ ෆ්රුක්ටෝසේ අධික ඇතැම් ආහාර වර්ග සිරුරේ ඉන්සියුලින් අසමතුලිතතාවක් ඇති කරන නිසා එයින් කාලයක් පුරාවට තව දුරටත් මොළයට විශාල අලාභ හානි ඇති වන්නට පටන් ගන්න බව සොයාගෙන තිබෙනවා.
TheAsianparent හි අනුමැතිය ඇතිව පරිවර්තනය කර ප්‍රකාශිතයි.
පරිවර්තනය: නිලුෆ පෙරේරා
