ලෝකයේ ජීවත් වන මිනිසුන් අතරින් ඉතාමත් සුළු පිරිසකට 'අසාමාන්‍ය' යැයි පැවසිය හැකි ලිංගික ආශාවන් තිබෙනවා.
මේවායින් සමහරක් ජුගුප්සාජනක වන අතර තවත් සමහරක් භයානක තත්ත්වයේ ලා සැලකිය හැකියි. මේ, ඒවායින් කීපයක්.
අසාමාන්‍ය ලිංගික ආශාවන් අතුරින් කිහිපයක්
1. ඩයපර් ඇඳීමෙන් ඇතිවන අසාමාන්‍ය ලිංගික ආශාවන් (Paraphilic infantilism)
මෙනමින් හැඳින්වෙන තත්ත්වය ඇති තැනැත්තන් තමන්ට ළදරුවෙක් ලෙස සලකනවාට මහත් වූ ලැදියාවක් දක්වනවා.
එමෙන්ම ළදරුවෙක් ලෙස සැරසී සිටින්නට ඔවුන් ආශා කරනවා. මොවුන් සමහරකට ලිංගික උද්දීපනය ඇතිවන්නේ ළදරුවන්ට අන්දවන ඩයපර ඇඟ ලා ගත් පසු යි.
එමඟින් ඇතිවන පහසින් ඔවුන්ගේ ලිංගික අවයව උද්දීපනය වෙනවා.
2. කෘමීන් ඇඟ පුරා දිවීමෙන් ඇතිවන අසාමාන්‍ය ආශා (Formicophilia)
මේ තත්ත්වය ඇති තැනැත්තන්ගේ ලිංගික ආශාව මදක් 'භයානක' එකක්.
ඔවුන්ට ලිංගික හැඟීම් පහළ වන්නේ සිය ශරීරය පුරා කූඹින් හෝ හැකරැල්ලන් වැනි සතුන් සක්මන් කරන විට යි.
මෙම තත්ත්වයේ දිගුවක් ලෙස සමහරෙකුට ලිංගික උද්දීපනය ඇති වීමට නම් සිය ලිංගික අවයවයන් වේදනාකාරී ලෙස කෘමීන් විසින් දෂ්ඨනය කළ යුතු වෙනවා.
3. ඇවිදීමට අපහසු තත්වයන් ඇති අය කෙරෙහි වන අසාමාන්‍ය ලිංගික ආශාවන් (Abasiophilia)
මේ තත්ත්වයත් අසාමාන්‍ය ගණයේ ලා සැලකෙන ලිංගික ආශාවක් වෙනවා.
එම තත්ත්වය ඇති පුද්ගලයින් ආකර්ෂණය වන්නේ ආබාධිත තත්ත්වයක් හේතුවෙන් ඇවිදීම අපහසු වූ අය කෙරෙහි යි.
මෙහිදී කිහිළිකරු ආධාරයෙන් ගමන් කරන අය, රෝද පුටු භාවිතා කරන අය මෙන්ම, ග්‍රීවයේ ආබාධ නිසා එයට ආධාරක පැළඳ සිටින අය සමග ද ලිංගික ක්‍රියා කිරීමට උක්ත තත්ත්වය ඇති අය මහත් ආශාවක් දක්වනවා.
4. මුත්‍රාශය පිරුණු විට ඇති වන ලිංගික ආසාවන් (Omorashi)
මෙම තත්ත්වය ඇති අයවළුන් වඩාත් ආශා කරන්නේ හොඳින් පිරුණු මුත්‍රාශයක් සහිතව ලිංගික ක්‍රියාවල නිරත වීමට යි.
පිරුණු මුත්‍රාශයක් ඇති විට මුත්‍රා කිරීමේ අවශ්‍යතාව තදින් දැනෙන අතර, එය සිර කරගෙන 'අපහසුවෙන්' ලිංගික ක්‍රියාවල නිරත වීමේ දී ඔවුනට වෙනම ආශ්වාදයක් ලැබෙනවා.
මෙලෙස ලිංගික ක්‍රියාවල නිරතවීමේ දී අන්‍යොන්‍ය ශරීර මත මුත්‍රා කරගැනීමෙන් ද ඔවුන් තව දුරටත් ආශ්වාදයක් ලබනවා.
5. පොදු ස්ථාන වලදී ඇති වන අසාමාන්‍ය ලිංගික ආශාවන් (Frotteurism)
මේ තත්වය ඇති පුද්ගලයින් ආශා කරන්නේ පොදු ස්ථානවල දී යමෙක් නොදැනුවත්ව ඔවුන්ගේ අඟ පසඟ අතපත ගෑමට යි.
බස් රථ, දුම්රිය වැනි ඒවා ජනයාගෙන් පිරුණු පසු ඒවාට ගොඩ වී, එහි යන අයගේ අඟ පසඟවල අතපය වැද්දීම, සිය ලිංගික අවයව ඇතිල්ලීම වැනි දේවලින් මොවුන් ආශ්වාදයක් ලබනවා.
වඩාත් අසාමාන්‍යම කාරණාවක් වන්නේ මෙවැනි දේ සිදුකර, හසු වී බැනුම් ඇසීමට හෝ පහර කෑමට ද මොවුන්ගෙන් සමහරක් ලැදියාවක් දැක්වීම යි.
6. සමාජ රෝග වැළදුනු අය සමග එක්වීමට ඇති අශාව (Bug chasing)
මේ තත්ත්වය ඇති අයවළුන්ට ලිංගික තෘප්තියක් ඇතිවන්නේ ඒඩ්ස් ඇතුළු සමාජ රෝග සහිත අයවළුන් සමග අනාරක්ෂිතව ලිංගික ක්‍රියා සිදු කළ විට පමණ යි.
මේ හේතුව නිසා තමා දැන දැනම ඒඩ්ස් වැනි සමාජරෝග සාදාගත් මිනිසුන් ලොව වෙසෙනවා.
සිය ජීවිතාරක්ෂාවටත් වඩා කාමාශාව බලවත් වීම නිසා මොවුන් සමහරෙක් එම තත්ත්වය සමනය කරගන්නටවත් උත්සාහ කරන්නේ නැහැ.
රචනය: Dinindu Ekanayake
*theAsianparent Sri Lanka හි පල කරනු ලබන ලිපි ජාත්‍යන්තර ප්‍රකාශන හිමිකම් නීති මගින් ආරක්ෂා කර ඇත. ඔබ මෙම ලිපිය theAsianparent Sri Lanka හි අවසරයකින් තොරව පිටපත් කිරීම හෝ භාවිතා කිරීම කරන්නේ නම් ඔබට එරෙහිව මෙම නීති යටතේ නඩු පැවරිය හැකිය.
