ඇමරිකාවේ හාර්වර්ඩ් සරසවියේ ආචාර්ය එලිසබෙත් ඩියර්ස්මාගේ නායකත්වයෙන් මෑතකදී කල පර්යේෂණවලින් හෙළි වී ඇත්තේ මවෙකු විසින් දරුවකුට කතන්දර කියා දෙනවාට වඩා විශාල ලෙස පියෙකු විසින් කතන්දර කියවීම දරුවෙකුගේ වර්ධනය සඳහා වඩා යෝග්‍ය බවයි.
පියවරුන් සහ දරුවන් අතර හොඳ සබඳතාවක් වර්ධනය කරන ඕනෑම දෙයක් අපි මහත් සේ අගය කරමු. ඉතින් මේ නිසාත්, කියවීම කොහොමටත් ඉතාම හිතකර ක්‍රියාවක් නිසාත් පියවරුන් විසින් දරුවන්ට කතන්දර කියා දිය යුතු බලවත් හේතු පහක් ඔබ වෙත ගෙන එන්නේ සතුටින්.
1. මෙය දරුවන් සහ පියවරුන් අතර සබඳතාව තිවර කරයි
සාමාන්‍යයෙන් දරුවා නින්දට දැමීම, කතන්දර කියවීම වැනි දෛනික ක්‍රියා සිරුවන්නේ මවගේ අතින්. නමුත් ඇත්තවශයෙන්ම සිතා බැලුවහොත් පියෙකු විසින් දරුවන්ට නින්දට පෙර කතන්දර කියා දීමෙන් දරුවන් සහ පියවරුන් අතර සබඳතාව කෙතරම් ශක්තිමත් වේද?
විශේෂයෙන්ම දවස් වැඩි හරියක් පියා නිවසෙන් බැහැරව සිටී නම් මෙය තවත් දරුවාට විශේෂ අවස්ථාවක් වනවා නොවේද?
කතන්දර කියවීමෙන් පසුව තව දුරටත් දරුවා හුරතල් කොට තුරුළු කරගෙන ඔවුන්ගේ දවසේ කටයුතු ගැන කතා බහ කිරීමට සොඳුරු අවස්ථාවකුත් පියවරුන්ට ලැබෙනවා.
මේ සෑම දෙයක්ම දරුවාගේ සමස්ත වර්ධනය සඳහා ඉතා වැදගත් වන බව සමීක්ෂණ වලින් සොයා ගෙන තිබෙනවා.
2. කතන්දරයෙන් ඔබ්බට දුර දැකීමේ හැකියාව පියකු සතු වේ
මව හෝ පියා හෝ කවුරු හෝ වේවා, කතන්දරයෙන් දරුවාට වාසි රැසක් ඇතිවන බවට කිසිදු සැකයක් නැත.
මේ වාසි අතුරින් භාෂා නිපුණතාවය ප්‍රවර්ධනය වීම මූලික වාසියක් වනවා. නමුත් පියෙකු විසින් කතන්දර කියා දීමේදී මීට අමතරව ඔහු සාමාන්‍යයෙන් දරුවාට වඩා වැදගත් යමක් විස්තර කරන්නේ කතාවේ ආඛ්යානය හරහා බව ප්‍රවීණ කතුවරයෙක් වන රොබට් කීම් විසින් (The Telegraph) සඟරාවට පවසා සිටියා.
මේ නිසා කුඩා දරුවන්ට කතන්දර කියවීමේදී මවක් විසින් බොහෝ විට චිත්තවේග හැඟීම් කෙරෙහි අවධානය යොමු කරන අතර, පියෙකු තම දරුවාට අත්දැකීම් තුළින් සම්බන්ධ විය හැකි දෙයක් වෙත කථාව සම්බන්ධ කිරීමට යුහුසුළු වන බව කියවෙනවා.
3. ගැහැණු පිරිමි දරුවන් දෙගොල්ලෝම පියෙකු විසින් කතන්දර කීමෙන් වාසි අත්දකිති
ආචාර්ය ඩියුර්ස්මාගේ අධ්යයනය තුලින් පෙනී ගියේ පියවරුන් කියවන විට එය ගැහැණු දරුවන්ගේ සංවර්ධන කටයුතු සඳහා ප්‍රයෝජනවත් වූ අතර අනෙකුත් අධ්යයනයන් මගින් පෙන්නුම් කෙරුනේ මෙම ක්‍රියාදාමය පියවරුන් හා පුතුන් අතර බැඳීම ප්‍රභල ලෙස ශක්තිමත් කරන බවයි.
4. දරුවන්ට කතන්දර කියා දීමෙන් පියවරුන්ටද සැනසීමක් ගෙන දේ
මානසික හා ශාරීරික ආතතිය වැඩි වුනු අද සමාජයේ නින්ද පෙර දරුවන්ට කථාන්තර කියවීමේ චර්යාව තුලින් දරුවන් සන්සුන් කරනවා පමණක් නොව එය පියවරුන්වද සංසුන් කරන බව පෙන්වා දෙනවා.
සසක්ස් විශ්ව විද්යාලය විසින් කරන ලද පර්යේෂණයන් අනුව කෙම්ප් විසින් අවධාරණය කරන්නේ කියැවීම යනු මානසික ආතතිය දුරු කිරන විශේෂ ක්‍රියාදාමයක් ලෙසයි.
"විනාඩි හයක කාලයක් තුළ පිටු පෙරලමින් කියවීමෙන් මාංශ පේශි සන්සුන් කොට ආතතිය සහ හෘද ස්පන්දනය සන්සුන් ලෙස පවත්වාගත හැකි වූ බව වාර්තා වනවා."
5. දරුවන් තුළ ගැහැණු පිරිමි සමානාත්මතාව පවත්වාගෙන යාමට කියවීම උපකාර වනවා
මවක් විසින් දරුවන්ගේ සියලුම කටයුතු කර පියා ඉඳහිට පමණක් උපකාර කිරීමේ කාලය දැන් යල් පැන ගොස් ඇත. අද කාලයේ පියවරුන් මව හා සමානව ගේදොර හා දරුවන් රැකබලාගැනීමේ කටයුතු සඳහා දායක වේ.
කුඩා දරුවන්ට නිදන්නට පෙර කතන්දර කියවීම තුලින් පියවරුන් තව දුරට මේ තත්වයට සාක්ෂි දරන්නේ ලෝකය තුළ පවතින පුරුෂාධිපත්‍යය පිළිබඳ ඇති මානසික විශ්වාස වලට නව අර්ථ දැක්වීමක් එක් කරමින්.
පියවරුන් වෙත පැනවෙන සම්ප්‍රදායික චරිතයන් මිදී දරුවා නින්දට දැමීම, නින්දට පෙර කතන්දර කීම වැනි දෛනික චර්යා වල නියැලීම තුලින් ඔවුන් දෙමව්පියගේ සාමුහික ක්‍රියාවලිය පසක් කරමින් දරුවන්ගේ පරිපූර්ණ වර්ධනය සඳහා විශාල දායකත්වයක් සපයනවා.
ඉතින් අම්මේ, ඔබේ නිවසේ දරුවන්ට කතන්දර කියා දෙන්නේ ඔබද? නැතිනම් ඔබේ ස්වාමි පුරුෂයාද? තාත්තේ, ඔබ දරුවාට කියවූ ප්‍රියතම කතාන්දරය කුමක්ද? ඒ ගැන දැනගන්න අපගේ රසිකයන් කැමැත්තෙන් සිටිනවා නියතයි.
TheAsianparent හි අනුමැතිය ඇතිව පරිවර්තනය කර ප්‍රකාශිතයි.
පරිවර්තනය: නිලුෆ පෙරේරා
