රසම රස බටර් චිකන් රෙසිපියක්

රසම රස බටර් චිකන් රෙසිපියක්

පුංචි දියණියක් පහසුවෙන් හදන මේ රසවත් කුකුල් මස් බටර් චිකන් ව්‍යංජනය ඔබත් හදා ගන්න. වෙනස්ම රසයක් ගෙන දෙන මෙය ඔබේ ප්‍රනිතම ආහාර ලැයිස්තුවට එක් වනවා නොඅනුමානයි.

අද ඔබ සමඟ බෙදා ගන්නේ අපේ එකොළොස් හැවිරිදි පුංචි දූ අපව මවිතයට පත් කිරීමේ අරමුණින් අපට පිළියෙළ කර දුන් රසම රස බටර් චිකන් ව්‍යංජනයක් ඉතාම පහසුවෙන් හදා ගන්නා ආකාරයයි.

ඔබට මෙය පහසුවෙන් හදා ගත හැකි වන අතර ඔබේ දෝණිත් ඉවුම් පිහුම් වලට කැමති නම් මේ කෑම වට්ටෝරුව පිළියෙළ කරන්න ගොඩාක් සතුටු වෙයි.  

බටර් චිකන්: අවශ්‍ය කළමණා

කටු රහිත කැබලි කපාගත් කුකුල් මස් ග්‍රෑම් 500ක්

කොත්තමල්ලි කොළ ඉති 3ක් හෝ 4ක්

කපාගත් තක්කාලි ගෙඩි 2ක්

කපාගත් ලොකු ළුණු ගෙඩි 1ක්

සුදු ළුණු බික් 6ක්

නැවුම් ක්‍රීම් (fresh cream) කෝප්ප ¼ක් (ක්‍රීම් වෙනුවට එළ කිරි ආදේශ කර ගත හැක.)

මිරිස් කුඩු තේ හැඳි 4ක් පමණ

ගම්මිරිස් කුඩු ස්වල්පයක්

ලුණු කුඩු ස්වල්පයක්

සීනි අවශ්‍ය පමණ

වතුර තේ කෝප්ප 1ක්  

තෙල් ස්වල්පයක්

බටර් චිකන් සාදාගන්නා ආකාරය

  1. කුකුල් මස් වලට මිරිස් කුඩු, ගම්මිරිස් කුඩු, ලුණු, කපාගත් සුදු ළුණු බික් තුනක් දමා හොඳින් අතගා විනාඩි 20ක් පමණ තිබෙන්නට හරින්න.
  2. දැන් තෙල් ටිකක් ලිප තබා එයට කුකුල් මස් ටික දමා යන්තම් බදාගෙන මදක් මෙලෙක් වන තුරු වසා පිසගන්න.
  3. කුකුල් මස් ටික පිස ගත් පසු එය දීසියකට අයින් කර, එම බඳුනේම සුදු ළුණු සහ ළුණු එක් කර රන් වන් පාට වන තෙක් බැදෙන්නට හරින්න.
  4. දැන් මෙයට තක්කාලි හා කොත්තමල්ලි කොළ එක් කොට විනාඩියක් පමණ කූරු ගාගන්න.
  5. දැන් මෙයට වතුර කෝප්පය එක් කොට උතුරන්නට හරින්න.
  6. ලිප නිවා මිශ්‍රණය යන්නම් නිවුණු පසු හොඳින් බෙලෙන්ඩර් කරගන්න.
  7. දැන් මෙය නැවත ලිපේ තබා එයට මස් ටික එකතු කරන්න.
  8. ෆ්‍රෙෂ් ක්‍රීම් හෝ එළකිරි ටිකත් එකතු කර හොඳින් කලවම් කර ගන්න.
  9. ළුණු හා සීනි ඔබේ රසට අනුව මුසු කර ආහාරයට ගන්න.

බටර් චිකන් නාන් රොටි හෝ පරාටා සමඟ කදිමට මුසු වන අතර රත් පැහැ ගතිය වැඩි කර ගැනීමට නම් මිරිස් කුඩු හෝ පැකට් කල තක්කාලි පේස්ට් ටිකක් භාවිතා කර ගන්න පුළුවන්. නොබෝ දිනකින් ඔබට පහසුවෙන් නාන් රොටි හදා ගන්නා හැටි කියා දෙන්නම්.

Written by

Niloufer Perera