නත්තල් කේක් කල් ඇතිව සදා තැබීමෙන් නත්තල් ලං වන විට තවත් හොඳින් රසවත් වනවා. ඉතින් අද ඔබ වෙත ගෙන එන්නේ රසට රසේ හදාගන්න පුළුවන් නත්තල් කේක් රෙසිපියක්.
නත්තල් කේක්: අවශ්‍ය ද්‍රව්‍ය
මෙහි දැක්වෙන්නේ කේක් කෑලි 25 ක් පමණ සාදා ගැනීමට අවශ්‍ය වන ප්‍රමාණයයි.
රේසින්ස් ග්‍රෑම් 50 යි
කරන්ට්ස් ග්‍රෑම් 37 යි
සුල්තානා ග්‍රෑම් 50 යි
චව් චව් ග්‍රෑම් 37 යි
ඉඟුරු දෝසි ග්‍රෑම් 37 යි
කජු ග්‍රෑම් 50 යි
කැන්ඩිට් ෆීල් ග්‍රෑම් 12 යි
පුහුල් දෝසි ග්‍රෑම් 50 යි
ගෝල්ඩන් සිරප් මේස හැඳි 01 යි
මීපැණි මේස හැඳි 01 යි
වැනිලා මේස හැඳි 01 යි
බ්‍රැන්ඩි මේස හැඳි 01 යි
මෙහි දෙවැනි පියවර සඳහා :
බටර් ග්‍රෑම් 37 යි
සීනි ග්‍රෑම් 75 යි
රුලං ග්‍රෑම් 75 යි
බිත්තර 03 යි
ආමන්ඩ් එසන්ස් මේස හැඳි 01 යි
සුවඳ කුඩු තේ හැඳි 01 යි
නත්තල් කේක් සාදාගන්නා අකාරය.
පලතුරු සියල්ල තරමක කැබලි වලට කපා එයට ගෝල්ඩන් සිරප්, මී පැණි, වැනිලා, බ්‍රැන්ඩි, සුවඳ කුඩු, ආමන්ඩ් එසන්ස් එක්කර හොඳින් වසා දවස් 3 ක් තබන්න
.
දින 3 හොදින් වසා තබා සාදා ගත් ඉහත මිශ්‍රණය ගෙන මඳක් රත් කර ගත් රුලං සමඟ කළවම් කරගන්න.
බිත්තර කහමද වෙන්කර ගන්න.
මුලින්ම බිත්තර සුදු මද බීට්කර එයද මෙම මිශ්‍රණය එක්කර ගන්න. ඉන්පසු බිත්තර කහමද, බටර් සහ සීනි බීට් කර එයද පළමු මිශ්‍රණයට දමා කළවම් කර ගන්න.
පත්තර පිටු 8 ක් පමණ අතුරා එයට උඩින් තෙල් කඩදාසි දමා සූදානම් කරගත් තැටියට මිශ්‍රණය දමාගන්න.
ෆැරන්හයිට් අංශක 100 - 125 උෂ්ණත්වය යටතේ පැය 2 ක් 2 1/2 ක් පමණ බේක් කරගන්න.
බේක් කර ගත් කේක් එක කැබලි වලට කඩා ගන්න. මෙම මිශ්‍රණය සිසිල් වූ පසු පදම් වූ පලතුරු සමඟ මිශ්‍ර කොට හොඳින් කලවම් කරගත යුතුයි.
දැන් මෙය පැතලි මේසයක් මත තෙල් කොළ දමා එක් මට්ටමකට පැතලි කළ යුතුයි.
මීළඟට අවශ්‍ය ප්‍රමාණ වලට කපාගෙන අලංකාර නත්තල් තෑගි කොළ වලින් හෝ වෙනත් නිර්මාණශීලි ක්‍රමයකට ඔතා අමුත්තන්ට පිළිගැන්විය හැකියි.
සැ. යු: වෙඩින් කේක් සෑදිමටද මෙම රෙසිපිය එලෙසින්ම යොදාගත හැක.
වෙනසකට සිදු වන්නේ නත්තල් කේක් මත ආමන්ඩ් පේස්ට් ස්තරයක් නොදැමීමයි.
මූලාශ්‍රය: ප්‍රවීණ ශිල්පිනි දුශාන්ති මදනායකගේ උපදෙස් අනුව තරුණි පුවත්පතේ පල වූ ලිපියක් ඇසුරෙනි.
