අන්තර්ජාලයේ මානසික රෝගින්ගේ බිල්ලක් වීමට ඔබේ දියණියට ඉඩ නොදෙන්න 

අන්තර්ජාලයේ මානසික රෝගින්ගේ බිල්ලක් වීමට ඔබේ දියණියට ඉඩ නොදෙන්න 

දුවෙක් කියන්නේ අවමානයක් නොවෙයි අභිමානයක්, ඇය දිනෙක ලොව උතුම් පදවියක් වු මව් පදවියෙන් පිදුම් ලබන්න නියමිතයි.  ඒ නිසා ඇයගේ ඡායාරූප වලට අපහස කරන්න එපා.

දියණිය‌ගේ ඡායාරූප සම්බන්ධව ඇත්තනේම  ගොඩාක් දෙනා කතා කරන්නත් ඇති, ලිපි ලියන්නත් ඇති, ඒත් කිසිම දෙයක් නතර වෙලා නැහැ . 

අදටත් අහිංසක දියණියන්ගේ ඡායාරූප අන්තර්ජාලයේ සමාජ ජාල වල මානසික රෝගින්ගේ බිල්ලක් වෙනවා.

ඇත්තටම මමත් මවක්, දියණියකගේ මවක්, මෙය එක්තරා ආකාරයකට ඛේදවාචකයක් විදියට මම දකිනවා. 

මේ ලඟදීත් මේ ගැන ලිය වුන පෝස්ට් එකක් මම දැක්කා. ඒ ලේඛකයා එවන් ඡායාරූප හා කමෙන්ට් බොහොමයක ඡායාරූප එම ලිපිය සමග එක්කරලා තිබුනා. 

පුංචි දැරිවියන්ට, පාසැල් වියේ ඉන්න පුංචි  මල් වලට කියලා තිබුන දේවල් ඉතාම පිළිකුල් සහගතයි. 

අපි මීට පෙර අහිංසක ගැබිණි මව්වරුන්ගේ ඡායාරූප රූප දඩයමක් ගැන කතා කලා ඔබට මතක ඇති, 

ඒ ලිපිය ඔබ කියෙව්වා නම් මෙතැන සිදුවන්නේද එවැනි ශෝචනීය තත්වයක් බව මම මතක් කරන්න කැමතියි.

දුවෙක් කියන්නේ අවමානයක් නොවෙයි අභිමානයක්, ඇය දිනෙක ලොව උතුම් පදවියක් වු මව් පදවියෙන් පිදුම් ලබන්න නියමිතයි. 

අපේ මානව වර්ගයාගේ පැවැත්ම ගෙනියන්න දිනෙක බර උසුලන්නී ඇයයි. 

අපි හැමෝම උපත ලබන්නේ මවක ගෙන්, එවන් ස්ත්‍රීයකගේ ලෙය විසිරුවා උපන් එහෙත් අධමයන් පිරිසක් අදටත් ස්ත්‍රීත්වය තමන්ගේ මානසික තෘප්තිය උදෙසා අවභාවිතා කරන ආකාරය හරිම නින්දිතයි.

මලක් වගේ හදන දියණියකගේ ඡායාරූපයක් හුදෙක් තමන්ගේ ලිංගික ආශ්වාදය වෙනුවෙන් කෙනෙක් වාචිකව හෝ දූෂණය කරනවා දකින්න කිසිම මවක්, පියෙක් කැමති වෙන්නේ නැහැ. 

දියණිය නිවසක නම්බුවයි. ඒ නම්බුව සමාජ ජාලා ඔස්සේ වාචික දූෂණයකට ලක්වෙනවා කියා සමහර විට ඒ දියණියගේ දෙමාපියන් හෝ ඒ දියණියන් නොදන්නවා වෙන්න පුළුවන්.

ඒ බොහොමයක් ඡායාරූප දෙමාපියන් හිතාමතාම තම සමාජ ජාලා වෙත එකතු කලා යැයි සිතන්න අමාරුයි. සමහර විට ඒවා ඔබ නොහිතපු මොහොතක ඔබ නොහිතපු ආකාරයට ඔවුන් අතට පත්වන්නට ඇති,

දියණිය‌ගේ ඡායාරූප: ඔබේ ඡායාරූප අනාරක්ෂිත වෙන අවස්ථා 
  • ඔබ ඔබේ සමාජ ජාල ගිණුම තුලට ඡායාරූප  එකතු කිරීම
  • ඔබ අන්තර්ජාලයට එකතු කරන ඡායාරූප හරහා
  • ඔබේ ඡායාරූප සහිත දුරකථනය ,පරිඝණකය අලුත් වැඩියා කටයුතු වලට ලබා දීමෙන්
  • ඡායාරූප සහිත දුරකථනය හෝ පරිඝණකය හැක් වීමෙන්
  • ඔබේ දියණිය නොදැනුවත්වම ඡායාරූප ගත කිරීම 
  • විශේෂ උත්සව හා සාද වලදී ගන්නා පොදු ඡායාරූප හේතුවෙන් 
මෙවන් සිදුවීම් වළක්වා ගන්න නම්
  • ඔබේ ඡායාරූප ඔබේ සමාජ ජාල ගිණුම තුල සුරක්ෂිත කරන්න 
  • ඔබගේ සමාජ ජාල ගිණුමට අවිශ්වාස පුද්ගලයන් ඇතුල් කර ගන්න එපා
  • සමාජය තුල දී දරුවන්ගේ සුරක්ෂිතතාවය ගැන සැලකිලිමත් වෙන්න.
  • ඔබේ දුරකථනය හෝ පරිඝණකය අලුත් වැඩියා කරන්න දෙන විට ඔබගේ ඡායාරූප ඉවත් කරන්න.
  • ඔබගේ කැමරාව වෙන කෙනෙකුට දෙන විට, ඡායාරූප මුද්‍රණයට දෙන විට සැලකිලිමත් වෙන්න.
  • එවැනි දේ සිදුවෙන ගෲප් එකක් හෝ පිටුවක් දුටු විට රිපෝර්ට් කරන්න.
  • දියණිය ඇසුරු කරන්නන් පිලිබඳ සොයා බලන්න.

ඉහත අපි ලබා දුන්න උපදෙස් ඔබට කරන්න අපහසු දේවල් නොවෙයි. 

ඔබගේ දියණියගේ ආරක්ෂාව තහවුරු කරන්න. දියණිය‌ගේ ඡායාරූප ආරක්ෂිිත කරන්න.

ඔබගේ දියණියගේ පමණක් නොව පුතනුවන්ගේද ආරක්ෂාව තහවුරු කිරීම අද සමාජය තුල බොහෝ වැදගත් වෙනවා.

ඔබේ දරුවා  මෙවන් අන්තර්ජාල පාපතරයින්ගේ ගොඳුරු වීමට ඉඩ නොතබන්න.

(Image credit: Chronicle Live)