කෑම කන්න හොර පොඩි පැටියා වෙනුවෙන් මේ දේවල් අනුගමනය කරලා බලන්න

ඕනෑම අම්මා කෙනෙකුගෙන් ඇහුවොත් දරුවාට කෑම කවන එක එතරම් ලේසි දෙයක් නම් කියන්නේ නැහැ. සමහර වෙලාවට කෑම කවන එක අත්හැරලා දාන්න තරම් තරහක් හා වේදනාවක් අම්මලාට දැනෙන්න පුළුවන්. දරුවන්ට කෑම ගැනීම ගැන තර්ජනය කිරීම වුනත් සාර්ථක නොවෙන්නේ දරුවන් සම්පුර්ණයෙන් කෑම ගැනීම නවත්වන්න ඉඩ ඇති නිසයි. ඉතින් කෑම කන්න හොර බබාලට කොහොමද කවන්නේ? 

කෑම කන්න හොර බබාලට කැවීම: ඉඟි 10ක්

1. ඉවුම් පිහුම් වලට එකතු කරගන්න

දරුවන්ට අවුරුදු 2 ක් වත් වෙනකොටම පාට පාට මුළුතැන්ගෙයි උපකරණ සෙල්ලම් කප් කේක්, එළවළු වගේ දේවල් අරගෙන දෙන්න.

ඔබ උයන අතරවාරයේ පිටි ටිකක් අරන් රොටි හදන්න වගේ දේවල් වලට දරුවන් එක්කර ගන්න පුළුවන් වගේම ඔවුන් එම උපකරණ වලින් එය පිළියෙළ කරගන්න කියන්නත් පුළුවන්. ඔවුන් උයන කෑම කන්න ඔවුන් කැමති වෙන නිසා ඔවුන් නිරායාසයෙන්ම එය විනෝදයක් බවට පත් කරගන්නවා.

2. කෑම හදන අලුත් ක්‍රම සොයාගන්න

සෙල්ලම් බඩු විතරක් නෙමෙයි කෑම හදන විවිධ උපකරණයන් තියෙනවා. ඔම්ලට් විවිධ ආකාරයෙන් හදන අච්චු, කේක් ආකෘති, විවිධ වර්ණ වල හැඩයේ හැඳි දරුවන් ආකර්ෂණය කරනවා. පලතුරු විවිධ ආකාරයෙන් කැපීම, සැරසීම, චීස් වලින් පිහියෙන් නම ලිවිම වගේ දේවල් විනෝදයෙන් කරන නිසා දරුවා නිකම්ම කෑමට පෙළඹෙනවා.

3. ආහාර වර්ණවත් කරන්න

වර්ණවත් පලතුරු ස්ට්‍රෝබෙරි, මිදී, ඩ්‍රැගන් ෆෘට් වැනි දේවල් වලින් ආහාර වලට විවිධ වර්ණ ගෙන එන්න පුළුවන්. ඉන් ගුණ වගේම ආකර්ෂනයත් ගෙන එනවා. ඔවුන් කැමති පාටින් ආහාර බෙදන්න. ඒ වගේම සුදු බත් වලට එළවළු ටිකක් මුසු කිරීමෙන් වර්ණ යොදන්නත් ඔබ අත්හදා බලන්න.

4. තෝරා ගැනීම් දෙන්න

ඒකාකාරී බවට දරුවන් කැමතිම නැහැ. කෑම නොකන දරුවන්ට කෑම තෝරන්නත් අවස්ථාවක් දෙන්න. ඔවුන් බත් සමග ඔම්ලට් , චීස් නැතිනම් පරිප්පු කන්න කැමති දැයි අසන්න. ඔවුන් කෑම කන්න සුදානම්ද යන්නට වඩා එය දරුවන් පොළඹවන්න පහසුයි. දරුවන්ට හැකි ලෙස තේරීම් කිහිපයක් දෙන්න. ඉන් එකක් තෝරන්න අවස්ථාව දෙන්න.

5. බඩු මිලදී ගන්න එක්කගෙන යන්න

දරුවා සුපර්මාකට් එක තුළ තොරතෝංචියක් නැතිව බඩු ගන්න එක හිසරදයක් වුනත් හැම ආකාරයකටම දරුවා හුරු කිරීම වැදගත්. එහිදී දරුවන් විවිධ කෑම දක්වනවා. ඒ දිහා බලනවා. සමහර විට කන්න ආස කරන්නත් පෙළඹෙන්නත් ගන්නවා. ඔහු තෝරන වර්ගය ප්‍රමිතියෙන් යුතු නම් ඉඳ හිට ඔවුන්ගේ තේරීමට ඉඩ දෙන්න. ගෙදර ආපසු එය සකසා දෙන්න.

6. සෞක්‍ය සම්පන්න ආහාර පාන

සතියකට වරක්වත් දරුවන් එළියට ගිහින් කෑම කන්න රස බලන්න කැමතියි. දරුවන් ප්‍රසිද්ධ ආපනශාලා වලට යන්න යෝජනා කළත් ඔවුන්ගේ සෞක්‍යට හිතකර තැන් තෝරා ගන්න පුළුවන්. හොඳ අයිස්ක්‍රීම්, පලතුරු යුෂ ආදිය දරුවන්ට තෝරා බේරා ගන්න දෙන්න පුළුවන්.

7. ඉවුම් පිහුම් පන්ති

දරුවන් වෙනුවෙන් නිවාඩු කාලයේ ඉවුම් පිහුම් කියා දෙන වැඩමුළු වැනි දේවල් වලට සහභාගි කරන්න පුළුවන්. ඒවා ගෙදරදී අත්හදා බලන්නත් ඉන්පසුව ඔවුන්ට අවස්ථාව දෙන්න.

8. ඇගයීම

දරුවන් ඔවුන්ගේ ආකාරයට වුනත් කෑමක් හැදූ විට පුංචි අත් පුඩියකින් හරි ඔහුව දිරිගන්වන්න. දරුවා කතා නොකළත් අංග චලනයෙන් ඔහු එයට ප්‍රතිචාර දක්වනවා. දරුවා දිරිගැන්වීමෙන් කෑම ගැනීමට උනන්දු වෙනවා. ඒ වගේම ඉන් ලැබෙන ශක්තිය ගැනත් කියාදෙන්න පුළුවන්.

9. විනෝදයෙන් කන්න අවස්ථාවක්

ඉඳහිට කෑම නොකන දරුවන්ට රූපවාහිනිය නරඹමින් කෑම කන්න දීම වරදක් නැතත් එයට ඇබ්බැහි නොවීමට ඔබ වගබලා ගන්න. කෑම ප්‍රතික්ෂේප කරන දරුවන්ට විනෝදය යම් උපකාරයක් වන නිසා ආරම්භයක් ලෙස ඔවුන් කැමති දෙයක නිරත වන්නට ඉඩදීම කාලෝචිත වන්නට පුළුවන්.

10. සුළු ආහාර වර්ග හඳුන්වා දෙන්න

අපේ ලාංකික කෑමම හදනවාට වඩා ඉඳහිට වෙනත් රටවල කෑමත් දරුවන්ට හදලා දෙන්න උත්සාහ කරන්න. ඉඳහිට හැන්දෙන්, චෝප්ස්ටික් වලින් කන්නත් වෙනත් සංස්කෘතීන් අනුකරණය කරමින් කන්නත් ඒවායේ රස බෙදා ගන්නත් උත්සාහ කරන්න.

දරුවන්ගේ කෑම රසවත් වන්නේ අම්මලාගේ ආදරය එයට මුසුවුනහමයි. ඒ ආදරය වෙනුවෙන් theAsianparent Sri Lanka මේ ලිපිය සකස් කළා.

 theAsianparent හි අනුමැතිය ඇතිව පරිවර්තනය කර ප්‍රකාශිතයි.

පරිවර්තනය: නිසංසලා ලියනගේ