ගී මිශ්‍ර දුන්තෙල් බත් එකක් හදාගන්නේ මෙහෙමයි
වියළි පලතුරු හා සැර නැති අමුද්‍රව්‍ය මුසුකරමින් සාදාගන්න මේ බත් එකට දරුවන් හුඟක් ආසා කරනවා. ඉතින් ගී මිශ්‍ර බත් හදන විදිහ අත්හදා බලන්න ඔබටත් පුළුවන්.
ගී මිශ්‍ර දුන්තෙල් බත් ගැන ඇහෙන කොට මට ඇස්දෙක පියාගෙන වුනත් දුන්තෙල් බත් රසවිඳින හැටි මතක් කරගන්න පුළුවන්.
බත් මිශ්‍රණය තරමක් තුනපහ මුසු කරියක් සහ ලූණු සලාදයක් සමග පිළිගැන්වෙනවා. එහි සුවඳ සිත් ආකර්ෂණය කරන අතර මෙය දකුණු කේරලයේ ඉතා ප්‍රසිද්ධ ඉන්දියානු ආහාරයක්. සමහර වෙලාවට ගෙදර නොයෙක් වැඩ රාජකාරි අතර කාලය සමග සටන් කරන අපේ අම්මලාට විවිධ බවක් එක් කරන්න මෙය හොඳ අවස්ථාවක් වෙන්න පුළුවන්.
ගී මිශ්‍ර බත් හදාගන්නේ කොහොමද?
තුනපහ හා වියළි පලතුරු මුසු වීම මෙහි විශේෂත්වයක්. නමුත් දරුවන්ගේ කැමැත්ත අනුව ඔබට මීට යොදන අමුද්‍රව්‍ය වෙනස් කර ගන්න පුළුවන්. එතකොට දැන් අපි ගී මිශ්‍ර බත් එකක් සාදාගන්නේ කොහොමද කියලා බලමු.
අවශ්‍ය ද්‍රව්‍ය
බාස්මති සහල් කෝප්ප 1
ගී මේස හැඳි 2
කුඩා කුරුඳු කැබැල්ලක්
කරදමුංගු 1ක්
කරාබු නැටි 2ක්
කරපිංචා
රම්ප
රටලුණු ගෙඩි එකක්
කජු කැබලි
වියළි මිදී
ඉඟුරු, සුදු ලුණු තේ හැඳි ½ක්
හොඳින් පොඩි කරගත් කොත්තමල්ලි කොළ තේ හැඳි 1ක්
රස අනුව ලුණු
පියවර
- බාස්මති සහල් හොඳින් සෝදා ගෙන මිනිත්තු 10-15 දක්වා පෙඟෙන්න හරින්න.
- ගී තේ හැඳි භාගයක් පමණ දමා පෑන් එක රත් කර කජු කැබලි රන් පැහැ වන තුරු බැදගන්න.
- නැවත ගී තේ හැඳි ½ කට වියළි මිදි දමා බැදගන්න.
- එම පෑන් එකටම සියලුම කුළුබඩු එක්කර ලූණු, ඉඟුරු, සුදු ලුණු සමග හොඳින් තෙම්පරාදු කර ගන්න.
- පෙඟුණ බාස්මති හාල් වතුර පෙරා ඊට එක්කර ටික වෙලාවක් තබා මිශ්‍රණයට එක්කර හොඳින් මිශ්‍ර කරන්න.
- අවශ්‍ය පරිදි ලුණු දමා උතුරන වතුර කෝප්ප 2ක් පෑන් එකට දමා මූඩියකින් වසා තබන්න.
- විටින් විට හැඳි ගාමින් අඩිය නොඇලෙන ලෙස තැම්බේ දැයි පරීක්ෂාවෙන් ඉන්න.
- හොඳින් ඉඳුන පසු පෑන් එකෙන් බත් ඉවත් කර වෙනත් භාජනයකට බෙදාගන්න.
- නැතිනම් ඔබට මේ සඳහා ප්‍රෙෂර් කුකර් එකක් වුනත් පාවිච්චි කරන්න පුළුවන්.
- ඉන්පසු කොත්තමල්ලි කොළ හා වියළි මිදි මිශ්‍ර කර බත් එක සරසා ගන්නත් අවශ්‍ය නම් තවත් ගී ටිකක් එකතු කර ගන්නත් පුළුවන්.
උපක්‍රම
- ඉඳුණු පසු රම්ප කරපිංචා වැනි කුළු බඩු බත් එකෙන් ඉවත් කර ගැනීමෙන් දරුවන්ට සැර රසයක් එන්නේ නැහැ.
- ගී බත් සමග තැම්බූ බිත්තර වලට දරුවන් කැමතියි.
- කැමති නම් සාදන අතර කැරට් හෝ මිංචි කොළ කැමැත්ත අනුව එක්කර ගන්න පුළුවන්.
- ගෙදරම හදාගත්ත ගී වලින් වලින් සදාගන්නවා නම් රස තවත් ඉහළයි.
දරුවන්ට රසවත් කෑම වේලක් හදලා දෙන්න අම්මලා කවුරුත් කැමතියි. ඒ වෙනුවෙන් theAsianparent Sri Lanka මේ ලිපිය ඔබට ගෙන ආවා.
theAsianparent හි අනුමැතිය ඇතිව පරිවර්තනය කර ප්‍රකාශිතයි.
පරිවර්තනය: නිසංසලා ලියනගේ
