"මම අම්මා කෙනෙක් වුනාට පස්සේ මගේ වෘත්තිය ජීවිතය හුඟක් කළඑළි වුණා"
දක්ෂ ජනප්‍රිය රංගන ශිල්පිනියක් වන හිමාලි සයුරංගි ගෙන් අපේ අම්මලාට ගතහැකි පාඩම් බොහෝමයක් තියෙනවා. ඇයත් සමග නිසංසලා ලියනගේ සමීප සාකච්චාවක යෙදුනා...
මේ දවස් වල වැඩිපුර තිරයේ දක්වන දක්ෂතා නිසාම කතාබහට ලක්වෙන ඉතා දක්ෂ නිළියක් වන හිමාලි සයුරංගි සමග මාතෘත්වය හා ගැහැනියක් ලෙස ඇය පෙරටත් වඩා කරළියට පැමිණ රසික සිත් ආකර්ෂණය කරන්නට ලැබීමට හේතු ගැන අසන්නට හිතුනා.
මවක් වීමෙන් පසු ජීවිතයේ හුඟක් දේවල් කැප කරමින් යළි තම වෘත්තිය ජීවිතයට පිවිසුනත් පෙර මෙන් එතරම් සාර්ථකත්වයට පත්වීමට සමහර කාන්තාවන්ට ලැබෙන්නේ නැහැ.
නමුත් හිමාලි වර්තමානයේ මව් පදවිය දරමිනුත් වෙනදාටත් වඩා ජනප්‍රිය තලයේ ඉන්නට හේතුව අහන්න අපට හිතුනේ ඇය ආදරණීය දියණියකගේ ආදරණීය අම්මා කෙනෙක් නිසාමයි.
“කොයි අවස්ථාවකවත් මම මගේ දුවව මාධ්‍ය ඉදිරියේ නැතිනම් මගේ රසිකයන්ට ප්‍රසිද්ධියේ පෙන්වන්න මම ප්‍රතිපත්තියක් විදිහට කැමති නැහැ.
අපේ රටේ වගේම ලෝකයේත් තරු එහෙම කරන, නොකරන අය ඉන්නවා. එක් එක්කෙනාගේ පෞද්ගලික මතය. නමුත් මම මා විසින්ම දමාගත් වාරණයකට අනුව මගේ පවුලේ අය, මගේ පෞද්ගලිකත්වය ලෝකයට නිරාවරණය කරන්න කැමති නැහැ.
මූලිකවම මගේ දරුවාට, සැමියාට ලැබිය යුතු නිදහස් අයිතිය නැති කරන්න මම කැමති නැහැ. මම නිළියක් නම් මගේ දක්ෂතා ගැන කතා කරනවා මිස මගේ පවුල ගැන කතා කරනවට මම කැමති නැහැ”.
ඇය ඉතා තදින් ඇගේ ප්‍රතිපත්තියේ රැඳී සිටිමින් ඇගේ දියණිය හා පවුල ගැන ඇය දරන මතය විවෘතව අපිට කිව්වා. ඒ අදහසම නිසා ඇය තුළින් බොහෝ ජනප්‍රිය වීමට උත්සාහ කරන පිරිසට හොඳ ආදර්ශයක් ලබා ගත හැකි බව වැටහුණා.
වර්තමානයේ බොහෝ දෙනෙක් ප්‍රසිද්ධිය පතා අන්අයව යොදා ගන්නවා. නමුත් තමන් දක්ෂ නම් පවුලේ අය යොදාගෙන ප්‍රසිද්ධ වීමට අවශ්‍ය නැහැ. නර්තනයට, ගායනයට, රංගනයට එකසේ දක්ෂ ඇය එය පසුගියදා අවසන්වූ හිරු මෙගා ස්ටාර් තුළින් තවත් තහවුරු කළා.
නමුත් පෙර පාසල් වයසේ දියණියක් ඉන්න අම්මා කෙනෙකුට පාසල් යන යුවතියක් තරම් පෙනුමක් රඳවා ගනිමින් නිදහස් බවක් හිතේ තබා ගනිමින් වේදිකාවේ නිදහසේ රඟන්න පුළුවන්ද?
ඔබ ඔය තරම් දක්ෂ ලෙස නිදහසේ ඔබේ හැකියාවන් මව් පදවියෙන් පසුවත් ඉදිරිපත් කරන්නට කරන සුවිශේෂී දේවල් මොනවද? අපි ඇයගෙන් ඇහුවා.
“හුඟක් අම්මලාට දරුවන් ලැබුනහම තමන්ගේ වෘත්තිය නතර කරලා දාන්න සිදුවෙනවා. මටත් ඒ ගැටලුව ඇති වුණා. ඒත් මම කිසිම ආයතනයකට බැඳිලා නැති නිසා මම ස්වාධීනව මගේ රැකියාව ගැන තීරණය කළා. නිළියක් වුනත් සාමාන්‍ය අම්මා කෙනෙක් මුහුණ දෙන සියලු අත්දැකීම් වලට මමත් මුහුණ දුන්නා.
මාස 6ක් දුවට මව්කිරි විතරක් දුන්නා. අවුරුද්දක් යනතුරු මම කිසිදු දෙයකට සහභාගී වුනේ නැහැ. නමුත් මා තුළ මගේ වෘත්තිය තවදුරටත් ඉදිරියට ගෙන යායුතුයි කියන අරමුණ තිබුණා. දරුවා වෙනුවෙන් කැපවෙමින් සැමියාගේ යුතුකම් ඇතුළු ගෙදර වගකීම් ඉටුකරමින් මම නැවත මගේ වෘත්තියේ නියැලෙන්න උත්සාහ කළා.
ඊට මට මගේ සැමියාගේ දෙමාපියන් වගේම මගේ දෙමාපියන් හුඟක් උදවූ කළා. ඒත් මම අනිත් හැම අම්මා කෙනෙක් වගේම ගෙදර කෑම හදන්න, මැදියම් රෑ වෙනතුරු වුනත් බබාගේ රෙදි හෝදලා, අයන් කරලා, පසුවදා කන කෑම බීම සුදානම් කරලා තියන්න පසුබට වුනේ නැහැ”.
“කිසි දවසක මම වෘත්තිය නිසා මගේ දරුවාගේත් ගෙදර වගකීමුත් පැහැර හැරියේ නැහැ. ඒ නිසාම ගෙදරින් එළියට යනකොට මගේ මනස නිරවුල්ව තිබුණා”.
“මගේ දූ ලැබුනට පස්සේ මගේ රංගන ජීවිතය තවත් කළඑළි වුණා කියලා මම හිතන්නේ. මම නොකඩවා සම්මාන උළෙලවල් වල හොඳම නිළියට නිර්දේශ වෙමින් හොඳම නිළිය ලෙස සම්මානයට පවා පාත්‍ර වුනේ දූ ලැබුනට පස්සෙයි”.
“හුඟක් නිළියන්ට මේ වාසනාව ගිලිහි යන්නේ දක්ෂතාවය තිබුනත් ගෙදර වගකීම් වලින් මිදෙන්න හිතට මානසික නිදහසක් නොමැතිකම නිසයි”.
නමුත් හැම ගැහැනියකටම මෙය කළ හැකි බව හිමාලි කියනවා. පිරිමින්ට මෙන් නොව කාන්තාවන්ට එකවිට කාර්යන් කිහිපයක නිරතවිය හැකි බව හුඟක් සාර්ථක කාන්තාවන් වගේම ඇයත් විශ්වාස කරනවා.
ඒ ගැහැණු ශක්තිය, උවමනාව ඇගේ සාර්ථකත්වයට හේතු වන බව හිමාලි කියන්නේ සතුටින්. ඇය එදා වගේම ඇගේ ශරීරයේ හැඩය හා පෙනුම පවත්වාගෙන යනවා. අපි ඒ ගැනත් ඇගෙන් ඇසුවා. “මම දුවලා පැනලා වැඩකරනවා. හුඟක් අම්මලා වගේමයි. උදව්වට කෙනෙක් නැති වෙලාවල් ඕනෑතරම් උදාවෙලා තියෙනවා. ඒ වෙලාවට මම හැමදේම තනිවම කරගන්නවා”.
ඇය ජනප්‍රිය නිළියක් වුනත් අම්මා කියන චරිතය ඇයටත් පොදුයි. ඇය ඒ ගැනත් කිව්වා. “මමත් සාමාන්‍ය ගැහැනියක්. ඒ නිසාම මටත් ආදරය, දුක, සතුට එකලෙස දැනෙනවා. මම නිතරම විශ්වාස කරන්නේ පුංචි කාලයේ දරුවන් එක්ක දෙමාපියන් රැඳිය යුතුයි කියලයි. මම එක දිගටම වැඩ කළොත් එකදිගටම දුවත් එක්ක කාලය ගත කරනවා”.
හිමාලි සයුරංගි කියන්නේ දරුවන්ගේ හැසිරීම් හා දෙමාපියන්ගේ හැසිරීම් එකිනෙකට මුහුවීම තුළින් බැඳීම් වැඩිවෙනවා කියලයි. “මම මාකට් ගියත්, කොන්ඩේ කපන්න ගියත්, වෙනත් වැඩකට ගියත් හැකි හැම වෙලාවකම දුවත් එක්ක ඉන්න උත්සාහ කරනවා.
එතකොට අපි දෙන්නටම අපි දෙන්නව මග හැරෙන්නේ නැහැ. ඒ නිසා දුවගේ ළමා කාලය මම කොයිතරම් කාර්යබහුල වුනත් විඳින්න අවස්ථාවක් හදාගන්න මම කටයුතු සුදානම් කරනවා”.
මවක් ලෙස කොතරම් කාර්යබහුල වුනත් අපිට හැමදේම විඳින්න පුළුවන් ඊට අවශ්‍ය උවමනාව, උනන්දුව විතරමයි. හිමාලි සයුරංගි නමැති දක්ෂ ජනප්‍රිය රංගන ශිල්පිනිය ගෙන් අපේ අම්මලාට ගතහැකි පාඩම් බොහෝමයක් තියෙනවා.
- කොයිතරම් කාර්යබහුල වුනත් පවුල සහ දරුවන් වෙන් නොවන ලෙස කටයුතු සැලසුම් කිරීම.
- මවක් වුනත් තම හැකියාවන් මරා නොදමා ඊට මනා කළමනාකරණයකින් කටයුතු කිරීම.
- තමන්ගේ අරමුණු වෙනුවෙන් අන් අය යමක් ඉටුකරන තුරු බලා නොඉඳ තම අරමුණ කරා ගමන් කිරීම.
- නිවසේම නොරැඳුනත් හැකි හැමවිටම දරුවා හා එක්ව අනෙක් කටයුතු වලට එක්වීම.
- ජනප්‍රියත්වය හෝ ප්‍රසිද්ධිය වෙනුවෙන් තමාගේ දක්ෂතාවය මිස පවුලේ සාමාජිකයන්ගේ තොරතුරු හෝ ඕපදුප ඊට අදාල කර නොගැනීම.
- පවුල සුවිශේෂී නිසාත්, ජනප්‍රිය චරිතයක් නිසාත් ඕපදුප සොයන අයට තමන් මාතෘකාවක් නොවීමට මවක් ලෙස කටයුතු කිරීම.
- තමන්ගේ වෘත්තියට තම දරුවන් තල්ලු නොකිරීම හා ඔවුන්ගේ නිදහසට, තීරණ වලට ගරු කිරීම.
මේ හැම කාරණයක්ම එක්වී ඇයට නිරවුල් සිටින මවක ලෙසත් සාර්ථක රංගන ශිල්පිනියක ලෙස කටයුතු කරන්නට අද වන විට වාසනාව ලැබී තිබෙනවා.
ඒ හිමාලි සයුරංගි ජීවිතයේ මනා කළමනාකරණයකිනුත් හුදු ජනප්‍රියත්වය උදෙසා නොව පවුල වෙනුවෙන් කැපවෙමින් කටයුතු කරන නිසා යැයි අපට සිතෙනවා. ඇයට ආදරය කරන ඔබට ඇගෙන් උගත හැකි බොහෝ දේ ඇතැයි theAsianparent Sri Lanka අපි විශ්වාස කරනවා.