ඉඳුල් කට ගෑම හෙවත් ප්‍රථම බත් කැවීමේ මංගල්‍යය
මව්කිරි බිව්ව පුංචි පැටියා ඉස්සෙල්ලාම බත් කන්නයි ලෑස්තිය. පුංචි පැටියාට හොඳ වේලාවක කන්න පටන් ගත්තේ නැත්තම් එයා කන්න හොර වෙනවාලු.
ඉඳුල් කට ගෑම හෙවත් ප්‍රථම බත් කැවීමේ මංගල්‍යය ගැන පුංචි මගප‌ෙන්වීමක්. මව්කිරි බිව්ව පුංචි පැටියා ඉස්සෙල්ලාම බත් කන්නයි ලෑස්තිය. පුංචි පැටියාට හොඳ වේලාවක කන්න පටන් ගත්තේ නැත්තම් එයා කන්න හොර වෙනවාලු. ආච්චි අම්මා එහෙම කියලා දුවලා යන්නේ සුභම සුභ නැකතක් බලාගෙන එන්න.
මොකද්ද මේ ඉඳුල් කට ගෑම නැතිනම් ප්‍රථම බත් කැවීම කියන්නේ?
දරුවාට ඉස්සෙල්ලාම ඝන ආහාර හදුන්වා දීම සුභ වේලාවකින් කිරීම ඈත අතීතයේ සිටම අප සංස්කෘතිය තුල පැවත එන්නක්. මේ හා බැදුන චාරිත්‍ර වාරිත්‍ර බොහොමයක් තියෙනවා. නමුත් මේ චාරිත්‍ර ප‍්‍රදේශයෙන් ප‍්‍රදේශයට යම් යම් වෙනස් කම් පවතිනවා.
මේ සඳහා සුදුසු වයස
පිරිමි දරුවන්ට වයස 6, 8, 10, වැනි ඉරට්‌ටේ මාසයකින්ද ගැහැණු දරුවන්ට වයස මාස 7, 9, 11 ආදී ඔත්තේ මාසයකින්ද ඉඳුල් කටගෑම සිදු කිරීම සුදුසු වෙනවා.
ඉඳුල් කට ගෑමේ චාරිත්‍ර
- දරුවාගේ වේල පත්කඩය අනුව සුභ දවසක්, සුභ වේලාවක් හා සුභ දිශාවක් තෝරා ගන්න. නැකැත් දින දහවල් 12ට පෙර ඉඳුල් කට ගෑම සුදුසුයි.
- ඇල් සහල් හෝ හීනටි හෝ සුවදැල්, සම්බා හෝ රතු කැකුළු සහල් අලුත් මුට්ටියක පිස ගන්න.සමහර ප්‍රදේශ වල කිරි බතක් සහ සියලු තුනපහ දාපු කිරි හොද්දක් පිළියෙළ කරනු ලබනවා.
- දරුවා පිරිසිදු කර සුදානම් කරන්න. සමහර ප්‍රදේශ වල දරුවාට සුදු පැහැ වස්ත්‍ර ඇන්ඳවීම කරනවා. ගෙබිම අතුගා කහ දියර ඉස පිරිසිදුකර ගෙන එහි මැද පැඳුරක් එලා ඒ මත පොල්තෙල් පහනක් දල්වන්න.
- ඉන්පසු පැඳුර මත කැවුම්, කිරි බත්,බත්, ව්‍යාංජන, පළතුරු, රෙදි පිළි,රසකැවිලි, ක්‍රීඩා භාණ්‌ඩ පොත් පත්, රං රිදී, මුදල්, මුහුණ බලන කණ්ණාඩියක්, යන සියල්ල තබන්න.
- දරුවා සුභ දිශාවට මුහුණලා වාඩි කරවන්න. ඔබේ ආගම අනුකූලව ආගම සිහිකරන්න.බෞද්ධ නම් බුදුන් වැද සියළු දෙවියන්‍ට පින් අනුමෝදන් කරන්න.
- සුභ මොහොත එළඹුන පසු සුභ දිශාව දෙස බලා පුතාට මව විසින්ද දුවට පියා විසින්ද ඉඳුල් කට ගෑම කරන්න පුළුවන්.
- ඉන්පසු දරුවාට පැඳුර මත වු දේවල් වලින් කැමති දෙයක් අතට ගන්න ඉඩදෙනු ලබනවා.
මේ හා බැදුනු විවිධ මතිමතාන්තර
පිරිමි දරුවන්ට වයස ඉරට්‌ටේ මාසයකින්ද ගැහැණු දරුවන්ට වයස ඔත්තේ මාසයකින්ද ඉඳුල් කටගෑම සිදු කරනවා.
සමහර පිරිස් දරුවාට මාස හයෙන් පසු ඝන ආහාර ලබාදීම කරන අතර ඉඳුල් කටගෑම සිදුකිරීමේදී කුළුබඩු හා පොල්කිරි යෙදු ආහාර පළමු වරට දරුවාට හඳුන්වාදෙනවා.
සාමාන්‍යයෙන් පුතාට මව විසින්ද දුවට පියා විසින්ද ඉඳුල් කට ගෑම සිදු කල යුතු යැයි සැලකෙනවා.
අම්මා, තාත්තා හැරුනු කොට දරුවාට වඩාත් ආදරය කරන වැඩිහිටියකු මේ ඉඳුල් කටගෑම කරන අවස්ථා තියෙනවා.
දරුවා පැඳුර මතදී අතට ගන්නා දේවල් අනුව ඔහුගේ හෝ ඇයගේ අනාගතය ගැන යමක් පෙන්නුම් කරන බව සැලකෙනවා.
එදිනට දරුවාට ආදරය කරනු ලබන වැඩිහිටියන්ට පමණක් ආරාධනා කරනු ලබන අතර උත්සවයක් නොගන්නේ දරුවාට ඇස්වහ කටවහ වදිවී යැයි ඇතිවෙන බිය නිසායි. සමහර ප්‍රදේශ වල මාසික ශුද්ධිය සිදුවෙන කාන්තාවන් මේ අවස්ථාවට සහභාගී කර ගන්නේ නැහැ.
දරුවා මුලින් ම කටට දමා ගන්නා දේ නුසුදුසු දෙයක් නම් එය දරුවාට අසුභ යැයි විශ්වාස කරනු ලබනවා.
ඉඳුල් කට ගෑම හා නුතන සමාජය
ඉඳුල් කට ගෑම අද වෙන විට සමාජයෙන් ඈත් වී යන චාරිත්‍රයක්, දෙමාපියන් කාර්‍යබහුල වීමත් සමඟ මාස 6 වෙද්දී දරුවාට ඝන ආහාර හඳුන්වා දීමත් දරුවාගේ පෝෂණ අවශ්‍යතා අනුව අනෙක් ආහාර ඒ හා යමින් හඳුන්වා දීමත් නිසා බොහෝ දුරට ඒ සඳහා නැකතක් වෙනුවෙන් දෙමාපියන් බලාගෙන ඉන්නේ නැහැ .
තවද බොහෝ නාගරික නිවෙස් වල මෙම චාරිත්‍ර හුදෙක් චාරිත්‍රයක් ඉටු කිරීම සේ සලකා සම්ප්‍රදායෙන් ඔබ්බට යමින් තමන් කැමති ආකාරයට ඉටු කරනු ලබනවා.
සමහර දෙමාපියන් රාහු කාලය හැර දරුවාට මංගල බත් පිඬ මුව තබන අතර සමහර දරුවෙන් එම චාරිත්‍ර ඉටු කිරීමක් වෙන්නේ නැහැ. ඔබ දරුවාට ඉඳුල් කට ගෑම නොකලේ යැයි ඔබ දැන් කණගාටු වෙන්න එපා.
ඉඳුල් කට ගෑම දරුවාගේ ආහාර ගැනීමේ රටාවට හෝ අනාගතයට කිසියම් බලපෑමක් කරන්නේ නැහැ. එය අපේ සම්ප්‍රදාය හා බැදුනු චාරිත්‍රයක් පමණයි. එය කිරීම හෝ නොකිරීම ඔබේ මනාපය අනුව ඔබට තීරණය කරන්න පුළුවන්.
*theAsianparent Sri Lanka හි පල කරනු ලබන ලිපි ජාත්‍යන්තර ප්‍රකාශන හිමිකම් නීති මගින් ආරක්ෂා කර ඇත. ඔබ මෙම ලිපිය theAsianparent Sri Lanka හි අවසරයකින් තොරව පිටපත් කිරීම හෝ භාවිතා කිරීම කරන්නේ නම් ඔබට එරෙහිව මෙම නීති යටතේ නඩු පැවරිය හැකිය.
Featured image: YouTube
කතන්දර ලිපි
