යෞවනයේ දොරකඩ ඉන්න පුංචි දූගේ මල්වර දිනය ට ලොකු සාදයක් ගන්නවාට වඩා දෙමාපියන්ට කළහැකි හුඟක් දේවල් තියෙනවා.

අපේ සම්ප්‍රදායට පිටින් යන්නට අපි ඔබට කියන්නේ නැහැ. නමුත් එය යථාර්තයට ඔබින ලෙස මුහුණ දෙන්නට පුළුවන් යැයි අපි හිතනවා.

දැරියකගේ මල්වර දිනය  මංගල්‍යක් ලෙස සැමරීම ලංකාවේ චාරිත්‍රයක් ලෙස නිදන්ගත වුනත් එහි යථාර්තය දුවට තේරුම් කරල දීම ඊට වඩා වැදගත් යැයි අපි හිතනවා.

මල්වර දිනය: දියණිය දැන් ටිකක් ලොකු වෙලා

පුංචි දියණියගේ ශරීරයේ පුංචි පුංචි වෙනස්කම් වෙනකොට අපේ සමහර අය අම්මලාට කියන්නේ දැන් උත්සවයක් ළඟයි කියලයි. එතනදීම අපි සමාජයක් ලෙස ගැහැණිය දිහා බලන හැටි වෙනස් විය යුතු බව ඔබට තීරණය කරන්න පුළුවන්. මල්වර වීමේ විද්‍යාත්මක පැත්ත ඔබ දූට කියා දුන්නද?

මල්වර දිනය: ජිවිතේ පළමු ඔසප් වීම

දියණියකගේ ජිවිතයේ පළමු ඔසප් වීම මංගල්‍යක් ලෙස සැමරිය යුතුද? නැතිනම් එය ඊට වඩා වැදගත්ද? හුඟක් වෙලාවට පුංචි දුව ඇයට මොනවද වෙලා තියෙන්නේ කියලවත් දන්නේ නැතිව අසරණ වෙනවා. ගෙදර අය මහ ලොකු සාදයකට ලෑස්ති වෙනවා.

ඔබ දෙමාපියන් ලෙස දියණියකට කියා දිය යුත්තේ මොනවද?

• මෙය ඕනෑම ගැහැණු දරුවෙකුට සිදුවෙන ඉතාම සාමාන්‍ය දෙයක් බව ඇයට මුලින්ම වටහා දෙන්න.
• කාන්තාවක් මවක් වීමට මෙම ක්‍රියාවලිය ශරීරය තුළම ස්වභාවිකව සිදුවන නිසා ඇය දැන් ප්‍රවේසම් විය යුතු බව ඇගේ වයස අනුව ඉතා සරලව කියාදෙන්න.
• වෙනත් නොදන්නා අයගෙන් ඇය ප්‍රවේසම් විය යුතු ආකාරය කියා දෙන්න.
• ඔසප් චක්‍රය ගැන කියා දෙන්න.
• ඒ දින වලට ඇය පිරිසිදුව සිටිය යුතු පිළිවෙත් ගැන දැනුවත් වෙන්න.
• ඇය හොඳ පෝෂණීය ආහාර වේලක් ලබාගත යුතු බව කියා දෙන්න.

මල්වර දිනය: මේ ගැන රටටම ඇසෙන්න බෙර ගැසිය යුතුද?

• අපට සම්ප්‍රදායෙන් ලැබුණු චාරිත්‍ර දෙමාපියන් ලෙස දූට ඉටු කිරීමේ කිසිදු වරදක් නැහැ.
• නමුත් ඒ ගැන ලෝකයම දැනගත යුතු නැති බව ඔබ අවබෝධ කරගන්න.
• තම දියණියට පළමු ඔසප් වීම සිදුවීම මධුවිත පානය කරමින් සැමරිය යුතු අවස්ථාවක් නොවන බව වටහා ගන්න. ඥාතීන්ටත් ඒ ගැන අවබෝධ කර දෙන්න.
• ඇයට තෑගි බෝග දීම වගේම ඇය දැන් වෙනදාටත් වඩා වටිනා පුංචි දෝනිය බව හඟවන්න. දැන් ඇය ලොකු ළමයෙක් බව කියා ඔබේ උණුසුමෙන් ඇයව ඈත්කරන්න එපා.
• වෙනදා වගේම තාත්තා ළඟ අයියා ළඟ නිදහසේ ඇයට දුව පැන නටන්න ඉඩ දෙන්න.
• ලෝකය මේ බව දැනගත යුතු කාරණයක් නොවුනත් ඔබේ වගකීම් ගැන ගැඹුරින් සිතන්න.
• ඔබේ වගකීම ලෝකයටම ඇසෙන්නට රටම රැස්වී සාදයක් ගැනීම නොව තම දියණියගේ ආරක්ෂාව ගැන වගකීම් ගැන පෙරට වඩා සිතීම බව සිතන්න.

සම්ප්‍රදායට ගරු කරමින් එය යථාර්තයට අනුව ගලපා ගන්න පුළුවන් නම් දෙමාපියන් ලෙස ඔබට ඔබේ දියණියට ජීවිතය පිළිබඳ වටිනා පාඩම් රැසක් කියා දෙන්න පුළුවන්. 

එසේ කරන ඔබ ඔබේ දියණියට

• ජීවිතයේ සැබෑ යථාර්තය කියා දෙනවා.
• ඇය තම යෞවනත්වය හොඳින් වටහා ගන්නවා.
• ඇගේ ආරක්ෂාව ගැන දැනුවත් වෙනවා.
• සමහර දරුවන්ට මෙවැනි උත්සව ලැජ්ජාවක් වන්නට පුළුවන් නිසා ඇගේ ආත්ම විශ්වාසය අඩු කිරීම වැළකෙනවා.
• ඇයට ඇති අභියෝග හා කඩයිම් ගැන ඇය මනා අවබෝධයක් ලබා ගන්නවා.
• යෞවනියක වුනත් ඔබත් ඇයත් අතර ඇති බැඳීම ශක්තිමත් වෙනවා.

ඇගේ ලෝකය මල්බර කරන්න අලුතෙන් හිතන්න. theAsianparent Sri Lanka ලෝකය ගැන අරුත්බරව දකින නිසාම මේ පණිවිඩය ඔබට කියන්නට සිතුවා.  

(Featured image credit: Transitional Justice in Sri Lanka)