️මාරාන්තික නව කොරෝනා වෛරසයෙන් අපිත් බේරී අපේ දරුවනුත් බේරා ගනිමු

මේ දවස් වල නිතරම ඇහෙනවා මේ කොරෝනා වෛරසය ගැන. කොරොනා සහ දරුවන් ගැන හිතද්දිත් බයයි නේද?

චීනයෙන් පටන් ගත්තාට දැන් ඒක ලෝකේ රටවල් කීපයකටම පැතිරිලා ඉවරයි.

තව කීයකට පැතිරේවිද දැන්නේ නෑ. දැන් ඒක ලංකාවටත් ඇවිල්ලා.

ඒ නිසා අපි වෙනදාට වඩා කල්පනාවෙන් ඉන්න ඕනි.

ඒ වගේම තමයි අපි වෙනදාට වඩා අපේ සෞඛ්‍ය පුරුදු ගැන සැලකිලිමත් වෙන්න ඕනි.

• නව කොරෝනා වෛරසය ශරීරගත වෙලා දවස් 12ක් 14ක් යනකල් බාහිරට කිසිම රෝග ලක්ෂණයක් නොපෙන්වන්නට පුලුවන්.
• නමුත් මේ කාලයේදී කිස්ම රෝග ලක්ෂණයක් නොපෙන්නුවත්, ආසාදිතයෙක්ගෙන් නිරෝගී පුද්ගලයෙක්ට වැළඳෙන්නට පුලුවන්.
• ඒ නිසා රෝග ලක්ෂණ මතු උනාට පස්සේ ආරක්ශිත උපක්‍රම පාවිච්චි කලාට වැඩක් වෙන්නේ නෑ.

බයම කාරණාව අපේ දරු පැටවුන්. අපේ පැටවුන්ට පොඩි හෙම්බිරිස්සාවක් හැදුණාත් දෙමව්පියන් විදියට අපි කොච්චර වද වෙනවාද?

අනේ ඒ නිසා කරුණාකරලා මේ තත්වය පාලනය කරනකල් හරි, මේ අයහපත් තත්වය සමනය වෙනකල් හරි දරු පැටවුන්ගේ ආරක්ෂාව හිතන්න.

ඒ වගේමයි වැඩිහිටි ඔබත්. ආරක්ශිත උපක්‍රම පාවිච්චි කරන්න.

කොරොනා සහ දරුවන්: කොහොමද අපියි දරුවොයි පරිස්සම් වෙන්නේ?

• මේ දවස් වල ගමන් බිමන් යොදාගෙන තියනවා නම් ඒවා මේ තත්වය සමනය උනාම වෙන දවසක දා ගන්න. මේ දින වල දරුවොත් අරගෙන රට පුරා සංචාරය කරන්නට එපා.
• යන්නට අවශ්‍ය අනිවාර්ය ගමනක් නම් සැනිටයිසර් එකක් පාවිච්චි කරන්න, නාසය, මුඛය වැසෙන විදියට ආවරණයක් පළඳින්න.
• සෙනඟ ගැවසෙන තැන් වලට යන්න එපා. විශේෂයෙන්ම පොඩි දරුවන්ව නම් අරගෙන යන්නම එපා.

• ගෙදරින් පිට ඕනෑම පිට තැනකට ගිහින් ආවාම දෑත්, මුහුණ සෝදා පිරිසිදු කර ගන්න.
• රෝහල් වලට පොඩි දරුවෝ අරගෙන යන්න එපා ඔවුන්ට ප්‍රතිකාර ගැනීමේ අවශ්‍යතාවයක් නැත්නම්.

වැඩිහිටි ඔබත් ඒ වගේ රෝගීම් ගැවසෙන ස්ථාන මඟ හරින්න.

• හැම වෙලාවේම ලොකු පොඩි හැමෝම ගෙදර කෑම පිලියෙල කර අනුභව කරන්න.
• මස්, මාලු ආහාරයට ගන්නවා නම් වැඩි වේලාවක් පිස ගන්න. හැකි නම් මේ දින වල ඒවා අවම කරන්න.
• නිවසින් පිටතට ගියාම නාසය ඇල්ලීමට, මුඛය ඇල්ලීමට, ඇස් කැසීමට නොයන්න.

තේරෙන වයසේ දරුවන්වත් එයින් වළක්වන්න.

ඔවුන්ටත් අත කටේ දමා ගැනීමට එහෙම නොදෙන්න. නිතරම දරුවෝ ගැන, එයාලාගේ ක්‍රියාවම් ගැන විමසිල්ලෙන් ඉන්න.

• කිවිසුම් යන විට, කැස්සක් එන විට ඔබටම කියා ලේන්සුවක් හෝ ටිෂූස් ළඟ තමා ගෙන ඒවායින් නාසය, මුඛය ආවරණය වන ලෙස කිවිසුම් යැවීම හෝ කහින එක කරන්න.

ලේන්සුවක් හරි ටිෂූස් හරි ළඟ නැත්නම් ඔබේ අතේ වැලමිටෙහි ඇතුල් පැත්තෙන් නාසය සහ මුඛය ආවරණය කර ගන්න.

• උණ රෝගීන්, හෙම්බිරිස්සාව, කැස්ස ඇති රෝගීන් සමඟ ළඟින් අත පත ගාමින් ආශ්‍රයට නොයන්න. ඔවුන්ට උපස්ථාන කරනවා නම් ඔබ ආරක්ශිතය උපක්‍රම භාවිතා කරන්න.

මෙම රෝගය වැළඳුන අය සමඟ කටයුතු කරනවා නම් ඔවුන් සමඟ භාණ්ඩ හුවමාරු කර නොගන්න.

කුමන හෝ රෝගීන් අසලින් දරුවන්ව ඈත් කරන්න. නැවත ඔබ දරුවන් කරා යාමට පෙර හොඳින් පිරිසිදු වී යන්න.

• නිවසේ උනත් නිතර නිතර ස්පර්ශ වෙන දොරේ අගුල වැනි ස්ථාන විෂබීජ නාශක දියරයකින් නිතර පිස දමන්න.
• දන්නා හඳුනන පිටස්තර අය මඟ තොටේදී හමු උනාම අතට අත දී, වැළඳගෙන ආචාර සමාචාර කිරීමට නොයන්න.

ඒ වගේම පිටස්තර අයට දරුවාව අත පත ගෑමට, හුරතල් කිරීමට නොදෙන්න.

• නිවසින් බැහැරව ගොස් නැවත ආ සැනින් අත්, මුහුණ, කකුල් හොඳින් සබන් ගා සෝදා පිරිසිදු වන්න.

අත සෝදන විට අවම වශයෙන් තත්පර 20ක් වත් සබන් ගාලා සෝදන්න. ඇඟ සෝදා ගැනීමට හැකි නම් ඉතාමත්ම හොඳයි.

• සංචාරකයන්, මිනිසුන් බහුල ස්ථාන වලට නොයන්න. හෝටල්, නැරඹුම් ස්ථාන, නාන තටාක ආදියෙහි නොයන්න.

සෙනඟ ගැවසෙන ඇඳුම් කඩ වලට, ආපනශාලා වලට, වෙළඳ සංකීර්ණයන් වලට දරුවන්ව රැගෙන යන්න එපා.

වැඩිහිටි ඔබත් නොගිහින් ඉන්න පුලුවන් නම් හොඳයි.

දරුවන්ව හැකි තරම් නිවසේම තබන්න. නිවසේ සිටීමයි ආරක්ෂිතම විදිය.

• පාසල් යන වයසේ දරුවන් නම්, ඔවුන්ට උණ, හෙම්බිරිස්සාව , කැස්ස තිබේ නම් ඔවුන්ට සුව වන තෙක් නිවසේ ඉන්නට දෙන්න. වෛද්‍ය ප්‍රතිකාර අනිවාර්යයෙන්ම ලබා ගන්න.
• මේ දින වල පොඩි හෙම්බිරිස්සාවක් හැදුනත් අනිවාර්යයෙන්ම බෙහෙත් ගන්න. අනේ හොඳ වෙයි කියලා ඉන්න එපා. දරුවන්ට විශේෂයි.
• පොදු ප්‍රවාහන සේවය භාවිතයේදී මුඛ, නාස් ආවරණ පළඳින්න.

මාරක කොරෝනා වෛරසයේ මූලික රෝග ලක්ෂණ 

කැස්ස, උණ, හුස්ම ගැනීමෙ අපහසුව කියලා කියන්නේ.

ඊට අමතරව පාචනය, ඔක්කාරය, වමනය, ඇඟට සීතලක් දැනීම, වෙව්ලීම, විඩාබර ගතිය, මහන්සිය, තෙහෙට්ටු ගතිය, සෙම ගතියක් වගේ දැනෙන්නට පුලුවන්.

සංකූලතා වැඩි වත්ම සහ තත්වය බරපතල වත්ම නියුමෝනියා තත්වයන්ට වගේම වකුගඩු, හදවත අකර්මණ්‍ය වීමටත්, අවසානයේ මරණය ඇති වෙන්නටත් පුලුවන්.

දැනට මෙයට ප්‍රතිකාර ලෙස, දියර වර්ග වැඩිපුර දිය යුතුයි වගේම, විවේකය හරිම වැදගත්.

හුස්ම ගැනීමේ අපහසුව නැති කිරීමට ඔක්සිජන් දීම මෙන්ම, වේදනාව අඩු කිරීමට වේදනා නාශක ඖෂධ ලබා දීම වෛද්‍ය උපදෙස් මත සිදු කරන්න පුලුවන්.

කොහොම උනත් පොඩිම හරි සැකයක් මතු උනොත් මේ ලෙඩේ තමයි හැදිලා තියෙන්නේ කියලා හැකි ඉක්මනින් රෝහල් ගත වෙන්න.

මේ වෙනකල් මේ රෝගය වැළක්වීමට එන්නතක් හෝ ඖෂධයක් හොයාගෙන නෑ.

ඒ නිසා කරන්න පුලුවන් එකම දේ යහපත් සෞඛ්‍ය සනීපාරක්ෂක කටයුතු පුරුදු වීමයි. එමඟින් රෝගය පැතිරීම අවම කර ගන්න් පුලුවන්.

අපේ දරුවන්ව පරිස්සම් කර ගමු.

ඒ වගේම දරුවෙක් කුස දරාගෙන ඉන්න අම්මලාටත් චූටි දරුවෙක්ව පරිස්සම් කරන විදියටම පරිස්සම් වෙන්න වෙනවා.

ලොව පුරා ඇති වෙලා තියන මේ තත්වය ඉක්මනින් හොඳ ඇතර හැරෙන්න කියලායි, ආසාදිත හැම කෙනෙක්ගේම ජීවිත ආරක්ෂා වෙන්න කියලයි, තව අයට මේ වෛරසය ආසදනය නොවේවා කියලායි ප්‍රර්තනා කරමු.