අම්මාගෙන් පුතුට ලියුමක්: "ඔයාව මුලු ලෝකයම කරගත් තවත් කෙනෙක් ඉන්නවා. ඒ ඔයාගේ තාත්තා."

මිහිබට සියලු අම්මාවරුන්ගේ හදවතේ සිට මෙලොව බිහි වු, බිහිවෙමින් සිටින හා ඉදිරියේදී බිහිවීමට නියමිත සියලුම දරු පැටව්න්ට අම්මාගෙන් ලිපියක්.

අම්මාගෙන් පුතුට ලියුමක්

ආදරණීය පැටියෝ,

• ඔයා ඔය දකින ලෝකය හරිම පුංචියි. දවසක් ඒවි ඔයාට ඔයාගේ ඇස් දෙකෙන් බලලා ඔයාටම තීරණ ගන්න පුලුවන් වෙන, එදාට මේ අම්මා කිව්වේ මොන තරම් සත්‍ය කථාවක්ද කියලා ඔයා තේරූම් ගනිවි,

•ඔව් ඔයා මගේ මුලු ලෝකයම, ඒත් ඔයාව මුලු ලෝකයම කරගත් තවත් කෙනෙක් ඉන්නවා. ඒ ඔයාගේ තාත්තා. එයාගේ මුලු ලෝකේම වුනේ ඔයා, සමහර වෙලාවට මට හිතෙනවා එයාගේ ලෝකේ මට තිබුන ඉඩත් ඔයාටම වෙන්වුනාද කියලා.

• ඔව් මං ඔයාව මාස දහයක්ම කුසේ තියාගෙන අපමණ දුක් විදිමින් මගේ ඇට ලේ මස් දිය කරලා කුස තුලම ලොකු මහත් කලා. ඒත් පුතේ අපමණ මෙහෙයක් කරපු ඔයා නොදැකපු කෙනෙක් හිටියා ඒ තමා ඔයාගේ තාත්තා.

ඔයාට ඔය ජීවිතේ දෙන්න දායක වුන සෛල දෙකෙන් එකක් දායක කලේ එයා තමයි. මං කන්න බැරිව දුක්විදිද්දී මං කන්න ආස දේවල් හොයලා ඇවිද්දේ එයා, මගේ හැම වේදනාවකදීම ගොඩාක් හිතින් දුක් වින්දේ එයා, මට ඕනී බෙහෙත් ගෙනත් දුන්නේ එයා.

අම්මාගෙන් පුතුට ලියුමක්

• ඔව් එදා ඔයාගේ ඉපදුන දා මං හිටියේ ජීවිතයත් මරණයත් අතර මාව කැපුවා. මගේ ලේ වැගිරුනා. මං මහ.ත් වේදනාවකින් පෙලුනා. ඒත් ඒ වේලාවේ හදවතින් මැරි මැරි අවිනිශ්චිත මොහොතක් ගතකරමින් කෙනෙක් වුන්නා. ඒ තමා ඔයාගේ  තාත්තා. එයාගේ ඇස්දෙක වගේ වුනු අපි දෙන්නාගේ ජීවත වෙද හෙද මඩුල්ලකට භාර කරලා බලාගෙන ඉන්න වුනේ එයාට, මං හිතන්නේ එයා ඉවසීමේ හොදම පාඩම ඉගෙන ගත්තේ එදා.

• ඔව් මගේ ලේ කිරට හැරුනා තමයි. ඒ මගේ පුතාට ඇති සෙනෙහසින්, ඒත් මගේ පුතාට බොන්න කිරි හැදෙන්න අම්මාව පෝෂණය කරපු කෙනෙක් හිටියා, ඒ  තමයි ඔයාගේ තාත්තා.

මේවා ගුණ කෑම, ඕවා කන්න එපා පුතාටත් අජීර්ණ වෙයි, එහෙම කිව්වේ එයා, පෝෂ්‍ය ගුණය වැඩි ආහාර ගෙනත් දුන්නේ එයා.

• ඔව් ඔයාගේ පලවෙනි හීනාවේ ඉදලා හැම හුරතල් පටන් ගැන්මක්ම මං ඇස්දෙකින් වින්දා. ඒත් ඒ වාසනාව නොලබපු ඒ හැම අවස්ථාවකම ඔයා වෙනුවෙන් දහඩිය හෙලුව අත් වල කර ගැට එනකම් වැඩ කල කෙනෙක් හිටියා, ඒ තමා ඔයාගේ තාත්තා.

උදේ රැයින් ගෙදරින් පිටවෙලා යන එයා හැමදාම ආවේ රෑ වෙලා පුතේ , ඒ මගේ පුතාට හෙට දවසක් හදන්න එයා රැකියාවත් එක්ක කාර්‍යබහුල වුන නිසා.

• ඔව් ඔයාව හැමදාම රැකබලා ගත්තේ මම ,තුරුල් කරගෙන නිදා ගත්තේ මම, ඒත් ඔයාව රැකබලා ගන්න දිරිදීපු, මගේ උණුසුම ආදරය ඔයා වෙනුවෙන් කැප කරලා තනියම නිදාගත්ත කෙනෙක් හිටියා. ඒ තමයි ඔයාගේ තාත්තා.

ඔයාව රැකබලා ගැනීම ගැන  එයා වදවුන තරම්, ඔයාට පුංචි හෝ හිරිහැරයක් වේවි කියලා එයා මටත් චුට්ටක් සැර කරපු වේලාවලුත් තිබුනා. ආදරය ඔයාගේ අවශ්‍යතා  වෙනුවෙන් එයා තමන්ගේ ආදරය අවශ්‍යතා කැප කලා.

• ඔව් මම ඔයාට රස බොජුන් හදලා දුන්නා. ලස්සන ඇදුම් හොයලා අරන් දුන්නා. වටිනා පොත පත අරන් දුන්නා. ඒත් ඒ සියල්ලටම දුක් මහන්සියෙන් හොයපු කාසි වැය කරපු කෙනෙක් හිටියා ඒ තමයි ඔයාගේ තාත්තා.

අම්මාගෙන් පුතුට ලියුමක්…

එයා ඔයා වෙනුවෙන් වියදම් කරන්න ලෝභ වුනේ නැහැ. එයා වියදම් කරපු කිසිම මුදලක ගණන් මිනුම් බැලුවේ නැහැ.

ඉතින් රත්තරන් පුතේ මේ මං ඔයාට කිව්වේ ඒ යෝධ මනුෂ්‍යයාගේ අසීමිත නොවෙනස් ආදරය ගැන හරිම චුට්ටක්,

ඔව් මං දන්නවා මගේ ආදරය වගේ ඔයාට එයාගේ ආදරය දැනුනේ නැහැ. ඒත් එයා ඔයාට ආදරය කරන ගමන් ඔයා වෙනුවෙන් මගේ හිතේ ඇති ආදරයට ශක්තියක් වුනා. එයා මං වගේ ඔයාට කෙලින්ම ආදරය කලේ නැහැ. එයා ඔයාට ආදරය කලේ මගේ ආදරය තුලින්, අන්න ඒකයි පුතේ ඔයා ඒ සුවිසල් ආදරය නොදැක්කේ.

ඔයා අම්මාට ආදරය කරන තරම්ම ඔයාගේ ඒ අහිංසක තාත්තාටත් ආදරය කරන්න. ඒක තමයි පුතේ ඔයාට ඒ අසහාය මිනිසාට දෙන්න පුලුවන් ලොකුම තිළිණය,

මම,

ඔයාගේ අම්මා