ආච්චිගේ ප්‍රෙශර් පෙත්ත නැති වෙලා සිද්ධ වුනු හදිය
"දෙවියනේ උදේ මගේ ප්‍රෙෂර් පෙත්ත වැටුනා. හම්බවුනේ නැහැ "
දරුවන්ගේ රැකවරණය ගැන කතා කරන්න ඕනී තරම් දේවල් තියෙනවා. මමත් දරුවන්ගේ ආරක්ෂාව ගැන ලිපි ඕනී තරම් කියවලා තියෙනවා. ඒ වගේම ලිපි ඕනී තරම් ලියලාත් තියෙනවා. ඒත් දරුවෙකුට අනතුරක් වෙන්න යන්නේ එක නිමේෂයයි කියලා තේරුම් ගන්න එහෙම දෙයක් අපිට වෙන්නම ඕනී.
කොච්චර ආරක්ෂාව දාලා තිබ්බත් නොහිතු මොහොතක උදාවෙන නොහිතු නිමේෂයේදී ඔබේ පොඩ්ඩා අත පොවන්නේ නොහිතූ අනතුරකට වෙන්න පුළුවන්.
දරුවන්ගේ රැකවරණය: මං නොපැතු ඒ නොහිතූ නිමේෂය
මගේ පුංචි පුතා අවුරුදු දෙකයි මාස හයයි. ගෙදර චණ්ඩියා , වචන අමුණ අමුණ ගේ පුරාම ඇවිදින එක තමයි එයාගේ රාජකාරිය වුනේ.
ගෙදර සාලේ දෙපැත්තෙන්ම ගේට්ටු දාලා මම පුංචි ආරක්ෂිත කලාපයක් හදලා තිබුනේ. ලියන ගමන් වුනත් වරින් වර මගේ ඇස් දුවන්නේ එයා පස්සේ, මම හිතුවේ ඇත්තටම සියල්ල ආරක්ෂිතයි කියලා.
"අම්මා, බබා...බේයි...බූවා"
පුතා එහෙම කියාගෙන එයාගේ ආච්චි අම්මාගේ කාමරයෙන් එලියට ආවා. මම නැගිට්ටේ හුස්ම ගන්නත් අමතක වෙලා. බබාගේ ආච්චි අම්මා එයාගේ බෙහෙත් තියාගත්තේ කාමරයේ කියලා මතක් වෙද්දී මගේ ඇඟත් පණ නැති වුනා.
"දෙවියනේ උදේ මගේ ප්‍රෙෂර් පෙත්ත වැටුනා. හම්බවුනේ නැහැ. " ආච්චි අම්මාත් කෑගහගෙන එතැනට ආවා. ප්‍රෙශර් පෙත්තක් නැතිවෙලා.
"පුතා කියනවා එයා ඒක බිව්වාලු. මට නම් කරන්නේ මොකද්ද කියලාත් හිතාගන්න මොහොතක් ගියා."
ආච්චි අම්මාගෙයි, මගෙයි ප්‍රෙෂර් ඉහල ගියේ පුතාගේ ප්‍රෙෂර් අඩුවෙයිද කියලා බයෙන් වගේ,
"ඉක්මන් කරන්න පුතාව හොස්පිටල් අරන් යමු." මම කලබලයෙන් පුතාව අරන් පාරට දිව්වා. අපි ආවේ ලඟම තිබ්බ පෞද්ගලික රෝහලට.
"ඇයි බබාට අහුවෙන්න ඔය වගේ බෙහෙත් තියන්නේ. බලන්න මේක ගොඩාක් සැර බෙහෙතක්. "
ඩොක්ටර් තදින්ම අහද්දී මට කට උත්තර නැති වුනා. ඩොක්ටර් බබාගේ ප්‍රෙෂර් බැලුවා.
"දැනට නෝමල් , තව පැයකින් ආයේ ගේන්න." ඩොක්ටර් එහෙම කියද්දී මට සැනසුම් සුසුමක් හෙලුනා.
ආච්චි අම්මායි, මායි දෙන්නාම ගෙදර ගිය ගමන් මුළු කාමරයම පීරුවා. ඒ ප්‍රෙෂර් පෙත්ත හෙව්වා. අන්තිමට හම්බවුනා. හොද වේලාවට ඒක තිබ්බේ මෙට්ටේ අස්සට වීසිවෙලා.
කොයිකටත් පැයකට පස්සෙත් අපි ගිහින් බබාගේ ප්‍රෙෂර් ආය‌ෙමත් බැලුවා. ගැටළුවක් වුනේ නැති නිසා යාන්තමින් බේරුනා. දෙවියනේ ඒ බෙහෙත් පෙත්ත මගේ පුතා බිව්වා නම්?
මා උගත් පාඩමින් ඔබටත් පාඩමක්
පුංචි දරුවන් බොහෝ වේලාවට අනුකරණය කරනවා. ඒ නිසා ඔවුන්ට පේන්න බෙහෙත් ගන්න එක සුදුසු නැහැ .
ඒ වගේම ඔවුන් අතට අසුවෙන දේ ගිල දමන්න දක්ෂයි. ඒ නිසා අනිවාර්යයෙන්ම ඖෂධ දරුවා ගෙන් ඈත් කර තබන්න. ඒ වගේම භාවිතා කරන්න. මේ පිළිබඳ නිවසේ වැඩිහිටියන්ට අවබෝධ කරවන්න. ඔවුන් වගකීම‌ෙන් වැඩ කිරීම ගොඩාක් වැදගත් ව‌ෙනවා.
දරුවන්ගේ ආරක්ෂාව අංක එක විය යුතුයි. ඒ සඳහා නිවසේ ළමා ආරක්ෂාව තර කරන්න.
දරුවන් ගැන නිතර විමසිල්ලෙන් බලා සිටින්න. මගේ වාසනාවකට එදා මගේ දරුවාට කරදරයක් වුනේ නැහැ .
සමහර දේවල් අපිට පාලනය කරන්න බැරි වුනත් ඔබේ දරුවා රැක ගැනීම ඔබේ වගකීමයි. මට වැරදුන මේ පුංචි නිමේෂය ඔබටත් ඔබේ දරුවාගේ ආරක්ෂාව පිළිබඳ යමක් මතක් කරාවි කියලා මම හිතනවා.
*theAsianparent Sri Lanka හි පල කරනු ලබන ලිපි ජාත්‍යන්තර ප්‍රකාශන හිමිකම් නීති මගින් ආරක්ෂා කර ඇත. ඔබ මෙම ලිපිය theAsianparent Sri Lanka හි අවසරයකින් තොරව පිටපත් කිරීම හෝ භාවිතා කිරීම කරන්නේ නම් ඔබට එරෙහිව මෙම නීති යටතේ නඩු පැවරිය හැකිය.
