තාත්තාගේ දිනපොතෙන්: ඔයාගේ අම්මා වෙනුවට මම ගර්භණි පියෙක් වූවා නම්....

මගේ දරුවා අද එයාගේ හත්වන උපන් දිනය සමරනවා. අලුත් දෙමාපියන්ට නම් මෙය අපුරු ගවේෂණයක්.  මගේ බිරිඳත් මමත් එදා හවස තේ බොමින් සිටියේ. අපි දෙන්නා පසුගිය වසරේ මතකයන් අලුත් කරමින් අපූරු කතා බහක හිටියා.

“මේක හරියන්නේ නැහැ. හැම කටයුත්තක්ම සමව බෙදෙන්න ඕනේ. අපි දෙන්නගෙන් එක්කෙනෙක් ගර්භණි වෙලා අනෙක් කෙනා දරුවාට මවුකිරි දෙන්න ඕනේ.” ඇය කීවා. ම‍ගේ බිරිඳ සිනහසෙමින් කී ඒ කතාව ගැන මම මදක් නැවතී කල්පනා කළා. ඇත්තෙන්ම ඇය වෙනුවට දරුවා කුස දරා සිටියේ මා නම්, ගර්භණි වූයේ මා නම්, තත්වය මොන වාගේ වේවිද? අපි දෙදෙනාගේ කාර්යභාරය සම්පුර්ණයෙන්ම අප දෙදෙනා අතර හුවමාරු වුවහොත් එය මොන වාගේ තත්වයක් වේවිද?

ඇත්තවශයෙන්ම කියනවා නම්, මෙම මුළුමහත් ගර්භණි සමයම මට මහත් වූ ආශ්චර්යයක් සේ හැඟෙනවා. මුලින්ම ගැබිණි වීම සඳහා සියලුම දේවල් නිසි වෙලාවට, නිසි ආකාරයට සිදු විය යුතුයි. සියල්ල නිසි ලෙස සිදු වී, ගර්භණි වූ පසුවත් මවක් සිටින්නේ ඉතාම සුපරික්ෂාකාරිව. දරුවා සැකවින් ස්ථානගත වී සියල්ල සක් සුදක් සේ පිළිවෙලට තිබුනද, මවක් කිසි සේත්ම එය සුළු කොට සලකන්නේ නැහැ. උපරිම ලෙස ප්‍රවේසම් වීමට අමතක කරන්නේ නැහැ.

හනේ දෙවියනේ! දස මසක් පුරාවට, මගේ කුස තුළ රඳවාගත් බිලිඳාගේ වගකීම මට තනියෙම ගන්නට සිදු වුනා නම්...  මට මේ දෙය හිතාගන්නවත් බැරි වුනා.

1 ජෛව ඔරලෝසුව

වයස අවුරුදු 30 ඉක්මවූ පසු මවක් වන්නට පෙරුම් පුරන කාන්තාවකගේ ජිවිතයේ ව්‍යාකුලම අවධියක් ලෙසයි මා මේ අවධිය දකින්නේ. මම මාගේ බිරිඳ වූවා නම් ඇය මුහුණ දෙන්නට ඇති පීඩනය ගැන මට හිතා ගන්නවත් බැහැ! කාන්තාවක් විවාහ වූ සැනින්, අප සමාජය විසින් ‘පවුලක අනාගතය’ නිර්මාණය කිරීමේ සම්පුර්ණ වගකීම පැටවෙන්නේ ඇයගේ හිස මත.  මා දන්නා මිතුරියන් බොහෝ දෙනෙක් විවාහ වී වසරක් ගත වන්නට මත්තෙන් මව් පදවිය ලැබීමට ප්‍රමාද වීම් ගැන උපකල්පන මෙන්ම උසුළු විසුළු වලට පවා පාත්‍ර වුනා.

මෙවන් පීඩනයකට මුහුණ දෙන්නට හැකියාවක් මට තිබේවිද කියා නම් මට හිතා ගන්නට බැහැ. කිට්ටු ඥාතීන්ගෙන් මෙන්ම ආගන්තුකයින්ගෙන් පවා ලක් වන පීඩනයට මවුවරුනි ඔබ, කොහොම මුහුණ දෙනවද කියා මට හිතාගන්නට බැහැ. ඇත්තෙන්ම ඔබ විශිෂ්ඨයි!

2 මුල් ගර්භනී අවධියේදී ඇතිවන ඔක්කාරය

මගේ මුලු ජීවිතය පුරාවටම මට දහ ගමනකට වඩා ඔක්කාරය ඇති වී නැහැ. ඔක්කාරය කියන සිතුවිල්ල පවා මට නුහුරුයි, අප්‍රසන්නයි! එහි ගඳ, පසු රස වගේ සිතිවිල්ලක් පවා මට අප්‍රසන්නයි. මොහොතක වමනයකට පසු හරියට කන්නවත් මට බැහැ.

එහෙම තියෙද්දී මම ගැබිණි වුවහොත්?? ඔව් ඔක්කාරය පුද්ගලයාගෙන් පුද්ගලයාට වෙනස් විය හැකි බව මම පිලිගන්නවා නමුත් මෙයට ගැබිණි මව්වරුන් වැඩි ප්‍රමාණයකටම මුහුණ දෙන්නට සිදු වනවා. කුසේ වැඩෙන දරුවා නිසා මේ තත්වය පාලනය කරන්නට වැඩිය බේත් හේත් ගන්නත් බැහැ. මෙම තත්වයට නිර්භීතව මුහුණ දෙන මව්වරුන්ව මා හදවතින්ම අගය කරන්නේ මේ නිසයි.

3 දිගටම පවතින ඇඟපත වේදනාව

මගේ බිරිඳගේ ගර්භණි අවධියේ දෙවන වාරයේදී තම උදරයේ ඇති වන අමුතු වේදනාවක් ගැන ඇය විටින් විට මට කීවා. එය අස්ථිබන්ධ වල ඇදීමක් ලෙස සිදු වන්නක් කියා දැනගත්තා.

දිනෙන් දින වැඩෙන කලලයට අවශ්‍ය උපකාරක සැපයීමට ශරීරයේ සුදානමක් ලෙස සිරුරේ නොයෙක් අස්ථිබන්ධ හා මාංශපේශි වල ඇදීම් හා වෙනස් වීම් සිදුවන අතර මේ හේතුවෙන් නොයෙක් ශාරීරික වේදනාවන් ඇති වනවා. ඒ විතරක් නම් මොකද? ගර්භණි අවධියේ අවසාන වාරයේදී ගර්භාශයේ පෙර හැකිලීම්, ඉදිමුණු වළලුකර, රිදෙන දෙපා, වේදනාබරිත පියයුරු, කොන්ද රිදීම් ආදී මෙකී නොකී අමාරුකම් වලට මුහුණ දෙන්නට ගර්භණි මවකට සිදු වනවා.

වසර දොළහකට පමණ පෙර මගේ වළලුකර පෙරලුනා. මගේ වළලුකරේ උපරිම වේදනාව මම එදා වින්දා. අහ් ඊට අමතරව මට ඇපෙන්ඩිසයිටිස් ශල්‍යකර්මය කළා. ඒ ගැන විස්තර පසුවට!

වේදනාව දරාගැනීමේ හොඳ ශක්තියක් මට තිබෙන මුත්, විටින් විට පැන නගින මේ වේදනාවල් කෙතරම් පීඩාකාරී ඇත්ද? මේ සියල්ල මධ්‍යයේ, කාන්තාවන්ගෙන් පිරිමින් තරමටම සම ලෙස රාජකාරිය කිරීමට රැකියා ස්ථාන වලින් බලාපොරුත්තු වනවා.

ඇත්තමයි මවුවරුනි! ඔබේ ශක්තිය ඇදහිය නොහැකියි.

4 මග බලා හුන් ප්‍රසුත දිනය

ප්‍රසූත වේදනාව අස්ථි කිහිපයක් එකට බිඳෙද්දී ඇති වන වේදනාව හා සමාන යැයි මම කොතැනක හෝ කියෙව්වා මතකයි.  මෙම වේදනාව කෙබඳුදැයි කියවීමෙන් පමණක් පිරිමියෙකුට ග්‍රහණය කරගන්න අමාරුයි.

එහෙත්, කෙනෙකු කියන්නට පුළුවන් සිසේරියන් සැත්කම් හෝ එපිඩියුරල් ඖෂධ මගින් වේදනාව අඩු කරගන්නට පුළුවන් බව. මේ මොනවා තිබුනත් ප්‍රසුත අත්දැකීම  කිසි සේත්ම වේදනාව රහිත එකක් වන්නේ නැහැ.

සිසේරියන් සැත්කමක් වුවද සිහි නැති කොට සිදු කරන මුත්, සිහිය එමෙන් පසුව වේදනා නාශක භාවිතා කරන්නට සිදු වනවා. මෙම වේදනාව සති කිහිපයක් හෝ මාස කිහිපයක් පුරා පවතින්නේ ඇල වීමේදී, හැරීමේදී, නැමිමේදී හා වාඩි වීමේදී පවා වේදනාවක් ගෙන දෙමින්.

මම වරක් ශල්‍යකර්මයකට භාජනය වුනා. ඒ ඇපෙන්ඩිසයිටිස් ශල්‍යකර්මය. ඉන් ඉතිරි වූ කැළල හුඟක්ම පුංචි එකක්. නමුත් කුඩා බරක් හෝ ඉසිලීමට මා පැකිලුනා.  නමුත් සිසේරියන් ශල්‍යකර්මයකට භාජනය වූ මවකට අනෙකුත් මවුවරුන් කරන සියලුම ක්‍රියා වල නිරත වීමට සිදු වනවා. දරුවා ඉසිලීම, මව්කිරි දීම, නැපි මාරු කිරීම ඇතුළු තව දහසකුත් කාර්යයන් වල නිරත වන්නට ඇයට සිදු වනවා.

මටනම් සාමාන්‍යය ප්‍රසුතියක් කෙසේ වෙතත් සිසේරියන් සැත්කමකටවත් භාජනය වන්නට බැහැ; එපිඩියුරල් දුන්නත් බැහැ.

5 මව්කිරි දීම

කවුරුන් හෝ කියනවා නම් මව්කිරි දීම බොහොම සුළු කාර්යයක් කියා ඒක නිවැරදි මානසික තත්වයකින් කියන දෙයක් නෙවෙයි.  ඕනෑම අම්මා කෙනෙක්ගෙන් ඇසුවොත් කියයි, දරුවාගේ මුඛය මුල් වරට තනපුඩු වලට යොමු කොට මුල් කිරි වේල් කිහිපය දීම කෙතරම් අභියෝගයක්ද කියා. තුවාල වූ හෝ තනපුඩු, ඉදිමුණු පියයුරු, කිරි ගල් වීමේ වේදනා ඇතුළු නොයෙක් අපහසුතාව වලට මුහුණ දෙමින් මවක් තම දරුවාට දිගින් දිගටම මව්කිරි දෙන්නේ ඇයට මොහොතක හෝ කුසගින්නක් නොතිබෙන්නටයි.

මේ තත්ව උඩ මට මව්කිරි දෙන්නට සිදු වුයේ නම්, මගේ දරුවාට උපරිම දෙවේලක් මව් කිරි දීමෙන් පසු මම පිටිකිරි දෙනවා නොඅනුමානයි.

ආවර්ජනයක්

ඇය හා සිදු කල මේ කතා බහෙන් පිරිමියෙකු වීම කෙතරම් භාග්‍යයක් වන්නේද යන්න මට හැඟුණු නමුත් ගැහැනියක් වීම කෙතරම් උත්තරිතද යන්නයි. ජිවයකට පන පෙවීම කල හැක්කේ ගැහැනියකට පමණයි. එය ලොව කිසිම දෙකට සම කල නොහැකියි. ජිවයකට පන දුන් හෝ පන පොවමින් සිටිනා ආදරණිය මව්වරුනි. මගේ මුළු හදවතින්ම ඔබට හිස නමා ආචාර කරමි.

TheAsianparent හි අනුමැතිය ඇතිව පරිවර්තනය කර ප්‍රකාශිතයි.

පරිවර්තනය: නිලුෆ පෙරේරා