ලොව පුරා ගිය අලුත උපන් බිළිදිය තාත්තාට පෑ හුරතල් හිනාව
විස්පස් හැවිරිදි ෆ්ලේවියෝ පිය සෙනෙහසින් උතුරා ගිය හදවතින් ඇය ඇමතුවේ මෙවන් විශ්මයක් බලාපොරොත්තුවෙන් නම් නොවෙයි...
ළදරු නාම උත්පාදකය
ස්ත්‍රී පුරුෂ භාවය
අකුර
ප්‍රභේදය
සොයාගත් ළදරු නම්
සොයාගත නොහැක
අලුත උපන් බබාගේ හිනාව ගැන අපූූරු අන්දරයක්. බ්‍රසීලයේ පියවරුන්ගේ දිනය වු අගෝස්තු 11 වෙනදා උදා වුයේ පුංචි ඇන්තනෙලාට සිය අලුත් ජීවිතය ලැබෙමිනි.
රියෝ ද ජැනීරෝහි උපන් ඇන්තනෙලා බරින් කිලෝ ග්‍රෑම් 3.1 ක් සහ උසින් සෙන්ටිමීටර 49 ක් පමණ වු හුරුබුහුටි දැරියක් වුනා.
ඇන්තනෙලාගේ පියා වු ෆ්ලේවියෝ බ්‍රසීලියානු නාවික සොල්දාදුවෙකු වු අතර මව ටාර්සිලා, දියණිය ඉපදෙනතුරු කෝකියෙකු ලෙස සේවය කළා.
මවගේ උණුසුමේ නිදන සිය බිළිදු දියණිය වෙත ඇයගේ පියා වු ෆ්ලේවියෝ සෙමින් සෙමින් පිය එසෙව්වා. විස්පස් හැවිරිදි ෆ්ලේවියෝ පිය සෙනෙහසින් උතුරා ගිය හදවතින් ඇය ඇමතුවේ මෙවන් විශ්මයක් බලාපොරොත්තුවෙන් නම් නොවෙයි.
ඒත් එකවරම බිළිදු ඇස් ඇරුනා. ඉන්පසු ඇයගේ කිරිකැටි මුව පුරා පැතිර ගියේ අපූරු හිනාවක්. මේ ලාබාල පියාට හුස්ම ගන්නත් අමතක වෙන්න ඇති. ඔබ මේ නැරඹුවේ ඒ අපූරු මොහොතේ ඡායා රූපයයි. හරිම ආදරණීයයි නේද?
දරුවෙක් අම්මා හා තාත්තා එක්ක බැඳීම ඇති කරගන්නේ මව් කුසේ ඉදලා කියන්න මේක හොඳම උදාහරණයක්. ඒ ගැන මේ පුංචි දියණියගේ මව හරි අපූරු කතාවක් කිව්වා.
"ෆ්ලේවියෝ දරු ගැබත් එක්ක වරු ගණන් කතා කලා. දරු ගැබත් එක්ක සෙල්ලම් කලා.
ඔහු හැමතිස්සේම 'මම ඔයාට ආදරෙයි' කියලා මගේ කුසට කිව්වා. මම රැකියාවට යද්දී 'සුභ උදෑසනක්' කියන්නත් ආපසු එද්දී 'සුභ සැන්දෑවක්' කියන්නත් ඔහු අමතක කලේ නැහැ.
ඇය මගේ කුස තුල දැඟලුවා. ඇය හැමදාම එකම වේලාවට දඟලන්න ගත්තේ මාව පුදුම කරමින්."
පුංචි ඇන්තනෙලා සිනාසුනේ ඇය මව්කුස තුල සිටියදී ඇයට පියා නිතර කියු ආදරණීය වදන් පෙළක් සවනත වැකීමෙනි. ෆ්ලේවියෝ, ඔහුගේ දරාගත නොහැකි හැඟීම වදන් කලේ මෙහෙමයි.
“ලෝකයේ වඩාත්ම අවංක සිනහව මගේ ඇස් වලින් දකින කම්ම මම හිතාගෙන හිටියේ සැබෑ ආදරය කියන්නේ මොකද්ද කියලා මම දන්නවා කියලායි. ඒත් මම සැබෑ ආදරය ඉගෙන ගත්තේ දියණිය ඇයගේ නිර්මල හිනාව පෑ ඒ මොහොතෙයි."
අලුත උපන් බබාගේ හිනාව: දරුවා කුස තුල සිටියදී නිතර කතාබහ කල යුත්තේ ඇයි?
දරුවා හා අම්මා අතර බැදීම ඇති වන්නේ මව්කුස පිළිසිඳ ගත්දායි. දරුවාට ඇහෙන පළමු හඬ අම්මාගේ හදවතේ හඩයි. ඊලඟට අම්මාගේ ආදරණීය ලස්සන කටහඬ, හැබැයි දරුවා කුස තුලදී තාත්තාගේ සෙනෙහෙබර කටහඩත් අහන්නත් කැමතියි.
කුස තුල දී ඇහෙන ආදරණීය හඩවල් එක්ක දරුවා උපතින් පසුද බැදෙන බව පසක් කර ගන්නට ඇන්තනෙලාගේ කතාව ඔබට හොඳ උදාහරණයක් වේවි.
දරුවා කුස තුල සිටියදී නිතර කතාබහ කිරීමෙන් දරුවාට ලැබෙන වාසී
- දරුවාට ආරක්ෂාව පිළිබඳ හැඟීමක් ලැබෙනවා.
- පසුකාලීන කථන හා භාෂා සංවර්ධනයට අත්වැලක් වෙනවා.
දරුවා කුස තුල සිටියදී නිතර කතාබහ කිරීමෙන් දෙමාපියන්ට ලැබෙන වාසී
- මුළු පවුලටම ආදරයෙන් බැදෙන්න අවස්ථාව ලැබෙනවා.
- ඔබේ ආතතිය අඩුවෙනවා.
සති 14 ක් පමණ වන විට කුස තුල සිටින දරුවාට ඇහෙන්න පටන් ගන්නවා. ශ්‍රවණය මඟින් ඔබට දරුවා හා සම්බන්ධතා පවත්වන්න ගොඩාක් ක්‍රම තියෙනවා.
අලුත උපන් බබාගේ හිනාව: කුස තුල සිටින දරුවා සමඟ අම්මාටයි තාත්තාටයි සංනිවේදනය කල හැකි ආකාර
- දරුවාට ඇහෙන්න ගීත ගායනා කරන්න.
- පුවත්පතක් හෝ ළමා කතාවක් ශබ්ද නඟා කියවන්න
- ඔබ තනිව සිටින විට දරුවා සමඟ කතා කරන්න.
- ඔබ බෞද්ධ නම් දරුවාට පිරිත් ඇසෙන්න සලස්වන්න පුළුවන්. වෙනත් ආගමක වුවත් ආගමානුකූල මෘදු දේවල් දරුවාට අසන්න සලස්වන්න පුළුවන් .
සමහර මව්වරුන් කුසට හෙඩ් ෆෝන් එක ලං කරනවා. ඒත් ඔබගේ මුවින් පිටවෙන ආදරණීය වදනක් තරම් හෙඩ් ෆෝන් එකෙන් අසන දේවල් දරුවාට සොඳුරු නොවේවි.
ඉතින් අම්මේ තාත්තේ ඔබේ ආදරණීය පැටියා ඉන්න බණ්ඩියට නිතරම කතා කරන්න . ආදරය කරන්න.
*theAsianparent Sri Lanka හි පල කරනු ලබන ලිපි ජාත්‍යන්තර ප්‍රකාශන හිමිකම් නීති මගින් ආරක්ෂා කර ඇත. ඔබ මෙම ලිපිය theAsianparent Sri Lanka හි අවසරයකින් තොරව පිටපත් කිරීම හෝ භාවිතා කිරීම කරන්නේ නම් ඔබට එරෙහිව මෙම නීති යටතේ නඩු පැවරිය හැකිය.
මුලාශ්‍ර - Consult The Fertility Center
