"ජිම් යන්නේ නැතිව කිලෝ 25 ක් අඩු කරගත්තා." අම්මා කෙනෙකුගේ ඇත්තම කතාවක්
"මම ආසාවෙන් හිටියේ ලස්සන ගවුම් අඳින්න. ඇඟ මහතයි කියලා කාගෙන් හරි අහගන්නවට වඩා මටත් ලස්සනට ඇඳුම් අඳින්න ඇත්නම්. මගේ ඉනේ සයිස් එක ගැන මට ඇතිවෙලා තිබුණා."
අම්මා කෙනෙක් වුනාට පස්සේ බර අඩු කිරීම අපි කාටත් ප්‍රශ්නයක් වෙනවා. හැබැයි එක අම්මා කෙනෙකුට නම් එහෙම වුනේ නැහැ. ඇගේ කතාව කියවන්න.
මම හැමදේම කනවා. හැබැයි ක්‍රමානුකූලව. ඔබත් මේ ඉඟි ගැන සැලකිලිමත් වෙලා බලන්න.
හැබැයි මුලින්ම මම කියන්න ඕනේ මම ප්‍රවීණ කායවර්ධන විශේෂඥයෙක් නම් නෙමෙයි. අනාරක්ෂිත හා දුර්මත වලින් යුතු ක්‍රම අනුගමනය නොකර මම මගේ බර අඩුකර ගත්තා.
මම ආසාවෙන් හිටියේ ලස්සන ගවුම් අඳින්න. ඇඟ මහතයි කියලා කාගෙන් හරි අහගන්නවට වඩා මටත් ලස්සනට ඇඳුම් අඳින්න ඇත්නම්. මගේ ඉනේ සයිස් එක ගැන මට ඇතිවෙලා තිබුණා. මට මගේ ඇඟ ගැනම ලැජ්ජා හිතුනා. ඉතින් පින්තූරත් එක්කම මට මගේ අත්දැකීම් බෙදාගන්න ලැබෙන එක ලොකු අවස්ථාවක්. ඒක කාටහරිම උදව්වක් ලැබෙනවා නම් මට ඒක ලොකු සතුටක්.
මම මගේ බර ඉතාම ස්වාභාවික ආකාරයෙන් අඩු කරගත්ත නිසා ඒක පවතින බව මට විශ්වාසයි. මේක බඩගින්නේ ඉඳලා ආහාර පාලනය කරලවත් මැජික් එකකින්වත් සිදුවූ දෙයක් නම් නෙමෙයි.
මේ විශාලව ඉන්න මගේ පින්තූරය මීට අවුරුදු දෙකකට කලින් ගත්ත එකක්. එතකොට මගේ පළවෙනි බබාට අවුරුද්දක් විතර වෙනවා. මගේ පෞද්ගලික ජීවිතය වගේම වෘත්තීය ජීවිතයත් හුඟක් පීඩනයෙන් හිටියා. ඒ එක්කම මගේ ඇඟේ බර වැඩිවීගෙන එනකොට මම භීරාන්ත වුණා. මම අවුරුදු 33 බර කිලෝ 80 ක් වුණා. උස 5”5 ඉන අඟල් 34 යි. මට හිතුනේ නැහැ මගේ බර අඩුවෙයි කියලා.
මේ කෙට්ටුවට ඉන්න මගේ පින්තූරය දැන් මාස එක හමාරකට විතර ඉස්සෙල්ලා ගත්තු එකක්. දැන් මට වයස 35 බර කිලෝ 54 යි. ඉන 28 යි. දැන් මට ඕනේ මේ තත්වය පවත්වාගෙන යන්නයි.
බර අඩු කිරීම: මම කියන ඉඟි හුඟක් සරල වුනත් මාව විශ්වාස කරන්න. මේ පින්තූර වලින් ලැබුණු වෙනස ඊට හේතුව වුණා.
1. සීනි කපලා දැම්මා
වාසනාවකට මම එතරම් පැණි රසට කැමති නැහැ. පුංචි ඩාක් චොක්ලට් කෑල්ලක් තරම්වත් කන එක මම සහමුලින්ම නැවැත්තුවා. ඉස්සර දවසට දෙපාරක් සීනි තේ හැන්දක් දාලා තේ බීපු එක සීනි නොදා බොන්න පුරුදු වුණා. මුලින් අමාරු වුනත් දැන්නම් මට සීනි දාලා තේ බොන්න බැහැ.
2. ලුණු, බැදුම්, තෙල් සහිත කෑම වෙනුවට නැවුම් එළවළු පලතුරු
මම හදන කෑම වලට ලුණු අඩුවෙන් දාන්න පටන් ගත්තා. මසකට එක්වරක් තරමින් වත් බැදපු කෑම කන එක නැවැත්තුවා. මුලින් අමාරු වුනත් ටික ටික ඇඟත් ඒකට පුරුදු වෙනකොට ඒක අපහසු නැහැ. මොකද එවිට අපි තෙල් සහිත කෑමක් ගන්න ගිය විට අපහසු ගතියක් දැනෙනවා. ඒ වගේම පුළුවන් තරම් නැවුම් එළවළු පලතුරු කන්න වගේම පෙර පිසූ මස් මාංශ කෑමත් නතර කළා.
3. දවල් කෑම දවල් 1 ට පෙරත් රෑ කෑම සවස 7 ට පෙරත් ගත්තා
ඉස්සර මම හුඟක් පරක්කු වෙලා දවල් හා රාත්‍රී ආහාර ගත්තත් දැන් 12.30 වෙනකොට දවල් කෑමත් රෑ කෑම 6.30 වෙනකොටත් ගන්නවා. අන්තිම වෙලාව රෑ 8 තමයි. මම හුඟක් රෑ වෙනතුරු වැඩ කරන නිසා බඩගිනි වුනත් අතර මැද තේ එකක් බිව්වහම ඒ ගතිය නැතිවෙනවා.
4. නිරන්තර ව්‍යායාම
ජිම් යන්න මම කැමති නැහැ. මම කැමති ඇවිදින්න. පටන් ගැන්මේදී 1km – 2km දක්වාත් පහු වෙනකොට 10km ක් පමණ මම ඇවිදිනවා. සතියකට දින 4-5 මම ඇවිදිනවා. ඔබට පහසු කාලයක් වෙන්කර ගෙන ඇවිදින එක හරි දුවන එක
හරි කරන්න පුළුවන්. අන්තර්ජාලයෙන් මම කැමති ව්‍යායාම තෝරාගෙන කරනවා. මම 16 වෙනි මහලේ ජීවත් වෙනවා. සතියකට 3 - 4 වතාවක් පඩිපෙළ නගින්න මම යොදාගන්නවා.
5. දවසකට ලීටර් 6 – 8 ක් විතර වතුර බොනවා
මම කොහොමත් හුඟක් වතුර බොනවා වගේම තවත් ස්වභාවික තේ වර්ග පානය කරනවා. ඉන් මගේ ඇඟට ජලය වැඩිපුර ලැබෙනවා.
6. කුඩා ප්‍රමාණ වලින් කනවා
මුලින් පොඩි ප්‍රමාණයක් බෙදා ගන්නවා. සෙමින් විකලා වැඩි වෙලාවක් අරගෙන ඒ කොටස ඉවර කරනවා. ඊට පස්සේ ඕනෙ නම් තවත් පොඩි ප්‍රමාණයක් ගන්නවා. ඉන් කෑම අපතේ යාම වගේම උවමනාවට වඩා කෑම ගැනීමත් වැළකෙනවා.
මේවා තමයි මගේ රහස්. ඇත්තටම මම නිරාහාරව නම් ඉන්නේ නැහැ. මම හැමදාම ක්‍රමානුකුලව කනවා. මේ ක්‍රම ටික අනුගමනය කළොත් දිගුකාලීනව සාර්ථක ප්‍රතිඵල ලැබෙනවා. ඉතින් ඔබටත් සාර්ථක ප්‍රතිඵල ලබුනොත් මටත් කියන්න.
ලස්සන ශරීරයක් කියන්නේ නිරෝගී බවේ ලක්ෂණයක්. ලස්සන හා නිරෝගී බව යන දෙකම එකවගේ වැදගත්. ඒනිසා ඒ ගැන theAsianparent Sri Lanka ඔබේ හොඳම මිතුරිය මේ තොරතුරු සොයා ඔබට කිව්වා.
theIndusParent හි අනුමැතිය ඇතිව පරිවර්තනය කර ප්‍රකාශිතයි.
පරිවර්තනය: නිසංසලා ලියනගේ
To read this story in English: Real mum speaks: How I lost more than 25 kilos without gymming
