ගෙදර ඉඳලා බබා බලා ගන්න එකද අමාරු...එහෙම නැත්නම් බබා තියා රැකියාවට යාම අමාරුද?
මේ දෙකෙන් මොකද්ද ඇත්තටම වැඩියෙන් අමාරු?බබා තියා රැකියාවට යාමද?
හැම අම්මා කෙනෙක්ම තාත්තා කෙනෙක්ම වගේ තමන්ගේ දරුවාට ආදරෙයි. ඒකේ කිසිම සැකයක් නෑ. කොහොම උනත් පර්යේෂණයකින් සොයාගෙන තියනවා රස්සාවට ගිහින් එතන වැඩ කරනවාට වඩා ගෙදර ඉඳලා දරුවෝ බලා ගන්න එක අමාරු වැඩක් කියලා.
බබා තියා රැකියාවට යාම ගෙදර ඉන්නවාට පහසුයි කියලා හොයාගෙන තියනවා.
දරුවන්ට කවන්න ඕනි,
පොවන්න ඕනි,
නාවන්න ඕනි,
ඇඟ සෝදන්න ඕනි,
එයාලා එක්ක සෙල්ලම් කරන්න ඕනි,
අඬද්දි නලවන්න ඕනි,
සහෝදර සහෝදරියොත් ඉන්නවා නම් යුද්ධ බේරන්න ඕනි,
උඩක නගීද,
වැටෙයිද,
තුවල කර ගනීද,
වගේ සීයක් දේවල් ඇහැ ගහගෙන ඉන්න ඕනි. එයාලා පස්සෙන් දුවලා දවසෙන් බාගයක් යද්දිම බබාව ගෙදර ඉඳලා බලා ගන්න අම්මාගේ නැත්නම් තාත්තාගේ ශක්තිය හීන වෙලා.
හොඳම විදියට කියනවා නම් බැටරි බැහැලා වගේ. හොඳ පණ ගිහින්.බබා තියා රැකියාවට යාම හොඳයි කියකත් හිතෙන වාර අනන්තයි අම්මාට.
අපි අසීමාන්තික විදියට දරුවන්ට ආදරෙයි කියලා ඒ දැනෙන වෙහෙස අඩු වෙන්නේ නෑ.
විවිධ රැකියාවන් කරන දෙමව්පියන් 1500ක් යොදාගෙන අපූරු පර්යේෂණයක් කරලා තියනවා. ලංකාවේ නම් නෙමෙයි. මහා බ්‍රිතාන්‍යයේ තමයි මේ පර්යේෂණය කරලා තියෙන්නේ.
බබා තියා රැකියාවට යාම සහ ගෙදර ඉඳලා බබා බලා ගන්න එක - මේ පර්යේෂණයෙන් ආව ප්‍රතිපල මෙන්න මේ වගෙයි. මේ 1500 දෙනාගෙන් ;
31%ක් පවසනවා දරුවෝදරුවෝ බලාගෙන ගෙදර ඉන්න එක අමාරුයි රැකියාවක නියලෙනවාට වඩා කියලා.
25% ක් කියනවා බබෙක් ඉන්නවා සහ එයාව බලා ගන්නවා කියන්නේ අමාරු දෙයක් නෙමෙයි කියලා.
40%ක් දෙනා පවසනවා එයාලාත් දෙමව්පියන් උනාට පස්සේ අනිත් දෙමව්පියන්ව විනිශ්චය කරන එක, අනිත් දෙමව්පියන් මැසිවිලි නගන විට ඒවා විනිශ්චය කරන එක නවත්තලා දැම්මා කියලා. එයාලටත් ඒ දේවල් අත් දකින්නට සිදු උන නිසා තමයි එයාලා එහෙම පවසන්නේ.
45%ක් කාන්තාවන් පවසනවා එයාලාට එයාලාගේ අම්මලාගේ උදව් උපකාර, මැදිහත්වීම් නැතුව දරුවෝ බලා ගන්න එක හරිම අමාරු දෙයක් කියලා.
37% ක් දෙමව්පියන් එක හෙලාම කියනවා දරුවෝ බ්ලා ගන්න එක හරිම වෙහෙසකරයි වගේම ඒ වෙහෙස එක දිගටම දැනෙනවා කියලා.
42%ක් පවසනවා එයාලා එයාලාගේ කුළුඳුල් දරුවාගේ උපතින් පස්සේ සීමා මායිම් නැති ආදරය අත්දුටුවා කියලා.
22%ක් දෙනා දරුවාගේ ආහාර ගැනීමේ පුරුදු ගැන වද වෙනවා.
දෙමාපියන් වීම කියන සංසිද්ධිය ඇතුලේ ගොඩාක් දුක් වීම්, කලකිරීම්, වෙහෙස වීම්, සිත් රිදීම්, මනසට ආතතීන් ගෙන දෙන්නක් උනත් දෙමව්පියන් වෙන එක හරිම විශිෂ්ඨයි දෙයක්.
ගෙදර ඉඳලා දරුවා බලා ගන්න මව්වරු ලොකු කැප කිරීමක් කරනවා ඔවුන්ව පරිස්සමින් බලා ගන්න. ඔවුන් පැය 8 රැකියාවක් නොව පැය 24 රැකියාවක් දවස් 365ම වැටුපක් නොගෙනම කරනවා. ඔවුන් අසනීප නිවාඩු, බැංකු නිවාඩු, පොදු නිවාඩු කිසිවක්ම ගන්නේ නැහැ. ඉතින් ගෙදර ඉඳලා දරුවෝ බලන අම්මලාව හෑල්ලු කරන්න එපා. තමන්ගේ දරුවන්ව පිරිසිදුවට, ලස්සනට වගේම නිරෝගීව තියා ගන්න අම්මා කෙනෙක්
නිවසේ පොඩි හරි අපිලිවෙලක් දැකලා, "දවසම ගෙදර ඉඳලාත් ඔයා මොකද්ද කලේ.." කියලා අහන, "අනේ මගේ බිරිඳ රැකියාවක් කරන්නේ නෑ..එයා නිදහසේ ගෙදරට වෙලා දරුවෝ බලන් ඉන්නේ.." කියන, "අනේ ඔයාට ගෙදර ඉඳලාත් උයා ගන්න, කන්න, අස් පස් කරන්න, නා ගන්න බැරි උනාද?.." කියලා අහන සැමියෙක් නම් ඔබේ රැකියාවෙන් නිවාඩු දමා බිරිඳව ඇයගේ මව ළඟට හෝ යවලා එක දවසක් දරුවන් බලා ගෙන බලන්න. එවිට එහි ලෙහෙසි පහසුව ඔබ හිතනවා වගේද කියා තේරේවි.
රැකියාවට යන මව්වරු
මෙහෙදී රැකියාවට යන මව්වරුන්වද අගය කල යුතුමයි. මොකද ඔවුන් පවුලේ ආර්ථියට උර දෙනවා. දරුවන් සමඟ රැඳෙන්නට කාල වේල අඩු නිසා ඔවුන් හිතින් දුක් වෙනවා. ඔවුනුත් දරුවාට ආදරේ මව්වරුන්. දරුවාගේ අනාගතය සරු සාර කරන්නටයි ඔවුන් වෙහෙසෙන්නේ.
සටහන :- ඈන් නිර්මාණි අත්තනායක
*theAsianparent Sri Lanka හි පල කරනු ලබන ලිපි ජාත්‍යන්තර ප්‍රකාශන හිමිකම් නීති මගින් ආරක්ෂා කර ඇත. ඔබ මෙම ලිපිය theAsianparent Sri Lanka හි අවසරයකින් තොරව පිටපත් කිරීම හෝ භාවිතා කිරීම කරන්නේ නම් ඔබට එරෙහිව මෙම නීති යටතේ නඩු පැවරිය හැකිය
